भांगरभूंय | प्रतिनिधी
भांगरभूंय। संजय कोमरपंत
काणकोणः गोय मुक्ती चळवळींत गांवडोंगरी पंचायत वाठारांतल्या थायणी गांवांतल्या कृष्णा देसाय, रामनाथ देसाय, मंजू देसाय,नारायण देसाय आनी रत्नाकर देसाय हांणी वांटो घेतलो. 1961 वर्सा पोर्तुगेज राजवटींतल्या गोंय मुक्त जालें. मात शोकांतिका म्हणल्यार ज्या थायणी गांवान सुटके झुजारी दिले त्या गांवांत मुक्त जाल्ल्या गोंयचें अस्तित्व खंय दिश्टी पडना. गांवांत लायटीचे फकत तीन खांबे पावल्यात. ना नळाचें उदक, ना डांबरी रस्तो. ताका लागून थंयच्या देसाय घराब्यांक भुरग्यांच्या फुडाराचो विचार करून चावडी, नगर्शेंस भाटपाल हांगा स्थलांतरण करचें पडलां.
जीण जगपाक लागतात त्यो तरी मुळाव्यो सुविधा उपलब्द करून दियात अशी मागणी 1964 सावन गांवचे लोक करीत आयल्यात. गणबा देसाय, मंजू गांवकार, जीवा गांवकार, वासू पायक गांवकार, जगदीश आचार्य, इजिदोर फर्नांडीस, संजय बांदेकार, रमेश तवडकार ह्या सगल्या आमदारां कडेन तांणी गांवांतल्या रस्त्याचेर डांबर घालपाची मागणी केली. मात अजून त्या रस्त्याचेर डांबर पडना. थायणी म्हणून एक गांव हासा हें राज्यकर्ते घडये विसरून गेले आसुये अशें ग्रामस्थ दिलीप देसाय हाणे सांगलें.
सातोर्लीच्यान सुमार ती किलोमीटराचो रस्तो केल्यार थायणी मेरेन आमका गाडयो व्हरपाक मेळटाशिल्ल्यो. दुयेंत जाल्ल्यांक हॉस्पिटलांत व्हरप सोपें जाताशिल्लें. चार वर्सा आदी सातोर्ली वॉर्डाचो पंच कुष्ठा गांवकाराच्या यत्नांतल्यान वाटेचें रुपांतर कच्च्या रस्त्यांत जालें. जगदीश आचार्याचे कृपेन लायट मेळ्ळी. कुंभेगाळ हांगच्या बंधाऱ्याचेर पांयपूल बांदून सातोर्लीच्यान रस्तो करून दिवचो अशी लोकांची मागणी अजून पुराय जावंक ना अशें ताणे सांगलें.
गिमाळ्यांत गांवांत पियेवपाचें उदक मेळना. व्हाळांत फोंण मारून उदक हाडचें पडटा. चवथीक पर्तगाळच्यान कुंभेगाळ न्हय हुपून गणपती हाडचे पडटात. सातोर्लीच्यान ते हाडपाक 18 किलोमीटर परस चड प्रवास करचो पडटा. गांवांत शेतां. काजू, बागायती, सुपारी, आंबे- पणस आसात. मात येरादारीचो खर्च उत्पन्ना परस चड जाता अशी म्हायती ताणे दिली.
गांवांत कसल्योच सुविधा नाशिल्ल्यान भोवेत घराब्यांक स्थलांतर करचें पडले. लोक गांवांतल्यान भायर पडले तरी देव गांवांतूच आसात. चवथ, दिवाळी, दसरो आनी शिमग्याक लोकांक गांवांत येवचेंच पडटा. तेन्ना बाजारांतल्यान बाटलीबंद उदक हाडचें पडटा. गोंय मुक्त करपाक आमच्या वाड वडिलांनी त्याग केलो. मात ताची फळां मात आमकां अजून मेळपाक शकली नांत अशी खंत उमेश देसायान उक्तायली. गांवान सरकारी शौचालयां लेगीत पळयलीं नात. कांय लोकांनी गांव सोडलो तरी गांवां कडेन आशिल्ली नाळ तोडली ना. मतदार वळेरेंतल्यान नांवां काडलीं नात. आमकां रस्तो दियात इतलीच आमची मागणी आसा अशें ताणे सांगलें.
पंचायत तशेंच विधानसभा वेंचणुकेच्या वेळार आमी रस्त्याची मागणी उमेदवारां कडेन करतात. ते वेंचून आयल्यार रस्तो करपाचें आस्वासन दितात. वेंचून येतगीर आपलें तोंणूय दाखयनात अशें एका सर्गेस्त सुटके झुजाऱ्याची घरकान्न ममता देसाय (75) हिणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
