भांगरभूंय | प्रतिनिधी
काँग्रेसीचें उदका स्रोत खात्याक निवेदन
म्हापशें: टँकरांतल्यान गोंयच्या लोकांक भलायकीक बर्याक पडटलें अशें उदक उपलब्ध जातलें हाची जतनाय घेवची आनी ते खातीर गरजेचीं पावलां उबारचीं अशी मागणी प्रदेश काँग्रेसीन निवेदनां वरवीं उदका स्रोत खात्या कडेन केल्या.
शुक्रारा सांजवेळा पर्वरे उदका स्रोत खात्याचे कचेरेंत काँग्रेसीचे प्रदेशाध्यक्ष अमीत पाटकार हांच्या फुडारपणा खाला काँग्रेस पदाधिकारी आनी कार्यकर्त्यांनी अभियंते बदामी हांची भेट घेवन तांकां मागण्यांचें निवेदन सादर केलें.
ह्या वेळार महिला प्रदेशाध्यक्ष बिना नायक, म्हणयारे अमरनाथ पणजीकार, कॅ. व्हिरिएटो फर्नांडीस, विजय भिके, संजय बर्डे, अॅड. श्रीनिवास खलप, जिल्होध्यक्ष विरेंद्र शिरोडकार, सुदिन नायक, राजेंद्र कोरगांवकार आनी हेर मानेस्त हाजीर आशिल्ले.
सांकवाळे हालींच कांय नागरिकांनी उदका पुरवण करपी टँकरांत घाणयारें उदक भरत आशिल्ल्याचो प्रकार उक्तडार हाडिल्लो. हे फाटभुंयेर ह्या प्रकाराचेर उदका स्रोत खात्यान कसली कारवाय केली हाची म्हायती दिवची अशी मागणी प्रदेश काँग्रेसीन मुखेल अभियंतो प्रमोद बदामी हांचे कडेन केली. पूण ते ह्या प्रकारा विशीं अनभिन्न आशिल्ल्याचें काँग्रेस कार्यकर्त्यांक दिसून आयलें.
काँगेस प्रदेशाध्यक्ष अमीत पाटकार हांणी ह्या वेळार गोंयांत कितलें उदक पुरवण करपी टँकर खात्या कडेन नोंदणीकृत आसात असो प्रस्न केलो, पूण अभियंते बदामी हांकां नेमको आंकडो सांगूंक आयलो ना. ह्या वेळार काँग्रेस पदाधिकार्यांनी तांचेर प्रस्नांचो भडिमार करून तांकां धारेर धरलो.
फाटल्या विधानसभा अधिवेशनांत गोंयांतल्या तीन म्हालांनी वट्ट 879 टँकर कार्यरत आसून तांचे वतीन वट्ट 25 लाख रुपया महसूल मेळिल्ल्याची जाप दिल्ली. जाल्यार हेर णव म्हालांतल्या टँकराची नोंद केल्ली ना. हाचे वयल्यान सरकाराचें कामकाज दिसून येता.
गोंयांत उदका पुरवण करपी टँकराचेर देखरेख दवरची. भलायकेक घातक अशी उदका पुरवण आसल्यार तांचेर खर कारवाय करची. उदक पुरवण करपी सगल्या टँकराची नोंदणी करची, दरेक टँकराचेर पियेवपा योग्य उदक, अशी छपाय करची, जेणे करून लोकांक भलायकेक बर्याक पडपी उदक मेळटलें अश्यो सुचोवण्यो काँग्रेस पदाधिकार्यांनी ह्या वेळार केल्यो.
लोकांनी सादुरतायेची शिटकावणी म्हूण स्टील बॉडी आशिल्ल्या टँकरांतलेंच उदक वापरचें अशें ह्या वेळार मुखेल अभियंते प्रमोद बदामी हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
