भांगरभूंय | प्रतिनिधी
फोंडें: धारबांदोडें सरकारी इमारतींत शुक्रारा सकाळीं नगर नियोजन खात्याच्या कचेरेचें उक्तावण नगर नियोजन मंत्री बाबूश मोंसेरात हांचे हस्तुकीं केलें.
ह्या वेळार गोंय राज्य पर्यटन विकास म्हामंडळाचे अध्यक्ष आनी आमदार गणेश गांवकार, सरपंच विनायक उर्फ बालाजी गांवस, दक्षीण गोंय जिल्हो पंचायतीचे अध्यक्ष सुवर्णा तेंडुलकार, धारबांदोडें मतदारसंघाचे जिल्हो पंचायत वांगडी सुधाकर गांवकार, खात्याचे सचीव संदीप जेकीस, संचालक जॉन्सन फर्नांडीस, उपसंचालक मंदार नायक बी मानेस्त माचयेर हाजीर आशिल्ले.
म्हालांत नगर नियोजन खात्याची कचेरी सुरू केल्ल्यान म्हालांतल्या लोकांक उपेगी थारतली. हाचे पयलीं लोकांक म्हत्वाचीं कागदपत्रां घेवपा खातीर केप्यां वचचें पडटालें. पूण म्हालांत कचेरी सुरू जाल्ल्यान लोकांक सुविधाचो लाव घेवपाची गरज आशिल्ल्याचें नगर नियोजन मंत्री बाबूश मोंसेरात हांणी सांगलें.
आमदार गणेश गांवकार हांणी सरकारी इमारतींत सगल्या खात्याच्यो कचेर्यो सुरू करपाचें सपन पुराय जायत आसा. विवीध कचेर्यो सुरू केल्ल्यान म्हालांतल्या लोकांक बर्यो सुविधा उपलब्ध जातल्यो. खात्याच्या अधिकार्यांनी लेगीत कचेरेंत येवपी लोकांक बरी सेवा दिवपाचो यत्न करूंक जाय अशें सांगलें.
मंदार नायक हांणी येवकार दिलो जाल्यार जॉन्सन फर्नांडीस हांणी उपकार मानले. कार्यावळीचें सुत्रसंचालन विराज प्रभुदेसाय हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
