भांगरभूंय | प्रतिनिधी
तकली, चेरो, गळो, हात-पांय हांगा मारलो घांस
वास्को: मायमोळ्यां बिमल सुर्यवंशी (28) हे लग्न जाल्ले बायलेक मंगळारा सांजवेळा 6.30 वरांच्या सुमाराक थंयच्या रस्ताद सुण्यांनी अचकीत हल्लो करून जखमी केली. ते बायलेची तकली, चेरो, गळो, हात-पांय बी हांगा रस्ताद सुण्यांनी घांस मारल्यात. हाचे पयलीं तीन चार चलयांचेर त्या रस्ताद सुण्यांनी हल्लो करून जखमी केल्लें. ताका लागून थंयची रस्ताद सुणीं चर्चेंत आयलीं.
ह्या सुण्यांचो बंदोबस्त कसो करचो हो मोटो प्रस्न संबंदितां मुखार उबो आसा. त्या सुण्यांचो बंदोबस्त करतना ल्हानशी चूक जायत जाल्यार संबंदितांक प्राणी मोगींचे कारवायेक सामकार वचचे पडत म्हूण भिरांत आसा. ह्या सुण्यांच्या बंदोबस्ता खातीर मदलो मार्ग सादपाचो कोणूय यत्न करीत? हो प्रस्त सद्या उपस्थीत करतात.
मायमोळ्यां एके इमारतींत रावपी बिमल सुर्यवंशी मंगळारा सांजवेळा थंय सावन वता आसतना अचकीत आयिल्ल्या रस्ताद सुण्यांनी तिचेर हल्लो केलो. सुण्याच्या हल्ल्याक लागून ती सकयल पडली आनी तिचे तकलेक, चेर्याचेर, गळ्याक, हाता पांयाक घांस मारलो. तिची कोणे तरी सुटका केले उपरांत त्या रस्ताद सुण्यांनी धांव मारली.
ते बायलेक पयली चिखलेच्या उपजिल्हो हॉस्पिटलांत दाखल केले. पूण तांकां गंभीर स्वरुपाच्यो जखमो जाल्ल्यान थंय मुळावे उपचार केले उपरांत तांकां गोंय वैजकी म्हाविद्यालय हॉस्पिटलांत दाखल केले. थंयच्या उपचारा उपरांत बुधवारा सांजवेळा तांकां घरा धाडून दिली. तांकां दोन ल्हान भुरगीं आशिल्ल्यान तांचेर जाल्ल्या ह्या हल्ल्या खातीर थळाव्यां लोकांनी दुख्ख उक्तायलें.
हीं रस्ताद सुणीं थंयच्या दोंगराळ वाठारांत रावतात. पूण अचकीत येवन तीं हल्लो करतात. आतां मेरेन तांणी चार-पांच जाणांचेर हल्लो केला. एके बायलेचेर सुण्यांनी हल्लो केल्ल्याचें समजतकूच प्रभागाच्यो नगरसेविका देविता आरोलकार हांणी त्या रस्ताद सुण्यांक धरपा खातीर पिपल्स फॉर अॅनिमल संस्थेची मजत घेतली.
मजगतीं, ते संस्थेचे वाहन पळयतकूच त्या सुण्यांनी धांव मारली. हाचे पयलीं तांकां धरून वासिनीकरण आनी निर्बिजीकरण करपाचो यत्न केल्लो. पूण तीं रस्ताद सुणीं सांपडनात. ताका लागून तांकां कशें धरप हो प्रस्न आसा. तशेंच तांकां धरून व्हेले उपरांत तांकां रॅबीज विरोधी वासीन दिवन आनी निर्बिजीकरण करून परतून थंयच हाडून सोडटात. ताका लागून तीं परतून थंय आयले उपरांत हल्लो करतात अशें कांय जाणांनी सांगलें.
ह्या सुण्यांक धरपा खातीर पिपल्स फॉर अॅनिमल संस्थेन थंय नेमान येवपाची गरज आसा. जेणे करून तीं केन्ना तरी सांपडटलीं अशें रहिवाशांनी सांगलें.
तांचो बंदोबस्त करपा खातीर रहिवाशांनी आनी प्राणी मोगींनी एकठांय येवन समजिकायेन उपाय काडपाची गरज आसा. नाजाल्यार त्या सुण्यांचे हल्ले चालूच उरतले आनी एखाद्याक आपलो जीव व्हगडावचो पडटलो अशी प्रतिक्रिया लोक उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
