भांगरभूंय | प्रतिनिधी
दिवचल: शिवाजी महाराज मैदानाचे फाटले वटेन आशिल्ल्या वासुदेव आर्केड इमारतींत चोरांनी एकाच रातीं आठ कचेर्यो फोडून सुमार साडेचार लाख रुपयांची रोख रक्कम तशेंच लॅपटॉप आनी हेर सामानाची चोरी केल्ल्यान एकूच खवदळ पडला.
रातच्या वेळार चोरांनी एकेच पद्दतीन कचेर्यांचीं कुलपां तोडून प्रवेश केलो आनी सामान, फायली जळामळां उडयल्यो. तशेंच लॅपटॉपूय फारायलो.
अॅड. निलेश वेर्णेंकार हांचे कचेरेचेें दार मोडून कचेरेंत आशिल्ली चार लाख रुपया रोख रक्कम फारायली. हे विशीं तांणी दिवचल पुलिशेंत कागाळ नोंद केल्या.
ह्या इमारतीचे फाटले वटेन एक मनीस रातच्या एक ते चार वरां मजगतीं आयिल्ल्याचें सीसी फुटेजींत दिसून आयिल्ल्याचें सांगलें. विवीध आठ कचेर्यांचीं दारां मोडून चोरांनी चोरी केली.
ह्या एकूच चोरीच्या प्रकाराक लागून एखाद्री टोळी कार्यरत आसुये अशी भिरांत आसून दिवचल पुलिसांनी रातची गस्त वाडोवची अशी सुचोवणी आमदार चंद्रकांत शेट्ये हांणी केल्या.
दिवचलचे पुलीस निरिक्षक सुरज गांवस हांणी हे विशींचो तपास सुरू आशिल्ल्याचें सांगलें.
ठशे तज्ञ आनी वास घेवपी सुण्यांक हाडून सोद घेवपाचो त्न केलो. ह्या प्रकरणांत विवीध वटांनी तपास सुरू आसा अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
