वास्को शाराचो चेरो बदलतले

भांगरभूंय | प्रतिनिधी

कृष्णा साळकार: येरादारींत बदल करपाचो प्रस्ताव

वास्को: फुडारांत वास्को शाराचो चेरो बदलतले. स्वातंत्र्य पथ आनी एफएल गोम्स मार्गाचें सोबितीकरण करतले. सद्या ह्या दोनूय मार्गा वयल्यान दोनूय वटांनी येरादारी सुरू आसा. फुडारांत ती एके वटेन करपाचो विचार आसा. ते नदरेन पावलां उबारल्यांत. ते खातीर भलायकी मंत्री विश्वजीत राणे हांचें व्हड सहकार्य मेळत आशिल्ल्याचें आमदार कृष्णा साळकार हांणी सांगलें.
एफएल गोम्स मार्ग आनी स्वातंत्र्य पथाच्या सोबितीकरणा खातीर भलायकी मंत्र्या मुखार आपणे प्रस्ताव दवरिल्लो. ह्या प्रस्तावाक तांणी मंजूरी दिल्ल्यान हो प्रकल्प नियोजनाच्या टप्प्यार आसा. ह्या प्रकल्पा खातीर सुमार 25 कोटी रुपया खर्च अपेक्षीत आसा अशें साळकार हांणी स्पश्ट केलें.
शारांत प्रवेश करतात वा शारांतल्यान भायर वतात तेन्ना अशीर रस्ते, पार्कींग समस्या, दुदर्श जाल्ले पदपथ, कांय सुवातांनी गटारां वयल्या सिमेंटाची मोडतोड जाल्ल्यो लादयो दिसतात. ताका लागून शारा विशीं प्रथमदर्शनी वेगळेंच मत जाता. ह्या मताक फांटो दिवपा खातीर आमी शाराचे सोबितीकरण करपा खातीर पावलां उबारल्यांत.
आमकां नियोजनबद्द आनी सुशोबीत अशें वास्को शार करपाचें आसा. दोनूय मार्गा वयली ड्रिनेज वेवस्था, लँडस्केपींग, सोबितीकरण हे संबंदी सद्या नियाळ घेतात अशी म्हायती साळकार हांणी दिली.
ह्या दोनूय मार्गाच्या सोबितीकरणा संबंदी कितें करूं येतलें हे संबंदी नियाळ घेवपा खातीर मुंबयंतल्या दोन सल्लागारांनी वास्को शाराक भेट दिवन पळोवणी केल्या. ह्या वेळार आमदार साळकार हांचे सयत नगराध्यक्ष लिओ रॉड्रिगीश, नगरसेविका शमी साळकार, नगरसेवक दामोदर कासकार, नगरसेवक प्रजय मयेंकार, गिरीश बोरकार, दामोदर नायक हाजीर आशिल्ले.
स्वातंत्र्य पथार भुंयगत वीज वाहिन्यो घालतले. थंयच्या पदपथा संबंदी योग्य तो निर्णय घेतले. स्वातंत्र्य पथ आनी एफएल गोम्स मार्गा वयल्यान एके वटेन येरादारी सुरू करपाचो प्रस्ताव आसून ते संबंदी रोखडेच नवी दिल्लींतले सल्लागार वास्को शाराक भेट दिवन अहवाल तयार करतले. उपरांत योग्य तो निर्णय घेतले अशें साळकार हांणी सांगलें.
वास्को शाराच्या विकासा खातीर आनी सोबितीकरणा खातीर मुरगांव पालिका आमदार साळकार हांकां योग्य तें सहकार्य करतले अशें नगराध्यक्ष रॉड्रिगीश हांणी सांगलें.