भांगरभूंय | प्रतिनिधी
भांगरभूंय । प्रतिनिधी
मडगाव : मडगांव पालिका मंडळाक जी सुडाच्या नियोजनाविशीं कसलीच म्हायती दिल्ली ना. प्रकल्पाचो आराखडो आनी ताची उबारणी कितल्या म्हयन्यांत जातली ही म्हायती लेगीत दिल्ली ना. म्हाका वा पालिकेच्या तंत्रीक विभागाक हाची कसलीच म्हायती दिली ना. ताका लागून पालिके वतीन कसलोच उणाव उरचो न्हय हे खातीर जीसुडा कडेन आराखडो आनी हेर म्हायती मागयल्या अशें नगराध्यक्ष दामोदर शिरोडकारान सांगलें.
पार्किंग प्लाझा विशी म्हायती दितना ताणें सांगलें की पालिकेचो सोपो कर एकठांय करपा खातीर निविदा काडल्ली. ते खातीर 77 लाख आनी जीएसटी असो दर दवरिल्लो. मात एक लेगीत बोली आयली ना. तेन्ना लक्षांत आयले की फेस्ताची फेरी जाता ते सुवातेर पार्किंग प्लाझा जाता. ताका लागून ताची फायल मागयली. जीसुडा कडेन आराखडो मागयला. पालिके कडल्यान जमीन केन्ना जीसुडा कडेन हस्तांतरीत करपाची आनी कितल्या दिसांत प्रकल्प पुराय जातलो हाची म्हायती दिवपाक सांगलां अशें शिरोडकारान प्रसार माध्यमांक सांगलें.
फेस्ताचे फेरयेची सुवात सोडून पार्किंक प्रकल्प करपाचो काय कितें हाचो विचार करतले. पांच ते सात म्हयने प्रकल्पा खातीर लागल्यार आनी फेस्ताचे फेरयेंत सबंदीत सुवात दाखयल्यार नवी समस्या उप्रासपाक शकता तीन म्हयन्यां पयलीं सगळे सोपस्कार करून काम सुरू करपाचो आदेश दिला. सगल्या नगरसेवकांक पावसाच्या 20 दिसां आदीं गटारां नितळ करून घेवपाक सांगलां. 15 मे मेरेन पावसा पयलींची कामां पुराय करतले अशी म्हायती तांणे दिली.
पावसाच्या दिसांनी पालिकेच्या 25 वॉर्डां खातीर आपत्कालीन यंत्रणा तयार दवोरतले. कसलोय अनुचीत प्रकार जातल्या पालिके कडेन एक गाडी दवोरतले. तिचेर एक मोबायल आसतलो आनी ताचो नंबर सगल्या नगरसेवकांक दितले अशें शिरोडकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
