भांगरभूंय | प्रतिनिधी
भांगरभूंय । प्रतिनिधी
मडगांवः कथीत वीज घोटाळो प्रकरणातले दुबावीत पंचायत मंत्री माविन गुदिन्हो हांका सुनावणे वेळार प्रत्यक्ष न्यायालयांत हजर रावपाचो आदेश मडगांवच्या विशेश न्यायालयान दिला. सुनावणी सुरू जाय सावन गुदिन्हो न्यायालयांत केन्नाच हाजीर रावले नात हाची दखल घेवन विशेश न्यायाधीशांनी ताका 28 एप्रिलाक सुनावणे वेळार न्यायालयांत हजर रावपाक सांगलां.
शुक्राराक ह्या प्रकरणाची सुनावणी जाली तेन्ना गुदिन्होच्या वकीलान सुनावणीक हजर रावपा पसून सूट मेळची हे खातीर अर्ज केल्लो. न्यायाधीशान तो स्विकारलो आनी आयचे पुरती सूट दिली मात फुडले सुनावणी वेळार ताका हजर रावपाक सांगलां. वीज घोटाळ्याची विशेश न्यायालयांत सुनावणी सुरू जाय सावन गुदिन्हो केन्नाच हाजीर रावले नात हे न्यायाधीशांनी वकिलाचे नदरेक हाडून दिलें.
शुक्राराक ह्या घोटाळ्यांतले आनीक एक दुबावीत टी नागराज सुनावणेक आयलो ना. हाचे पयलीं सुनावणेक गैरहाजीर रावपी राधाकृष्णन हाचे आड न्यायालयाक जामिन मेळनाशिल्लें वॉरन्ट काडचें पडल्लें. तेन्ना वीज मंत्री आशिल्लो माविन गुदिन्हो, टी नागराजन, कृष्णकुमार आनी के राधाकृष्ण, मेसर्स मार्मगोवा स्टील कंपनी आी ग्लास फायबर बिनानी झिंक ह्या वीज घोटाळो प्रकरणातले दुबावीत आसात. मनोहर पर्रीकार विरोधी पक्ष फुडारी आसतना तांणी 19 मे 1998 दिसा माविन गुदिन्हो आड वीज घोटाळे केल्ले खातीर पुलीस कागाळ केल्ली. फाटल्या 24 वर्सां सावन हें प्रकरण न्यायालयांत आसा. चड वीज वापरपी कंपन्यांच्या वीज बिलांत 25 टक्के सवलत दिवपाची फाटीं घेतिल्ली अधिसूचोवणी परत नव्यान जारी करपाक मंत्रिमंडळाची मंजुरी घेतली ना आनी सरकाराचे कोट्यांनी रुपयांचें लुकसाण केल्ल्याचो आरोप आशिल्लो. 1998 वर्सा गुन्यांन अन्वेशण फाट्यान ह्या वीज घोटाळ्याची चवकशी करून गुन्यांव नोंद केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
