भांगरभूंय | प्रतिनिधी
साखळे 57, फोंड्यां 52 उमेदवारांचे अर्ज
बिरेस्तारा जातलें चित्र स्पश्टः साखळेचें नगराध्यक्षपद बायलां खातीर (लायट)
भांगरभूंय । प्रतिनिधी
दिवचल। फोंडेंः साखळी आनी फोडें पालिका मंडळांच्या वेंचणुकां खातीर उमेदवारी भरपाच्या मंगळारच्या निमाण्या दिसा साखळे 26 उमेदवारांनी जाल्यार फोंड्यां 12 उमेदवारांनी अर्ज सादर केले. साखळे आतां वट्ट 57 जाणांनी आनी फोंड्यांत वट्ट 52 जाणांनी उमेदवारी अर्ज सादर केल्या. आयज ( बुधवार) सगल्या अर्जांची छाननी जातली आनी बिरेस्तारा उमेदवारी अर्ज फाटीं घेवपाचो दीस आसा. ते उपरांत दोनूय पालिकेचें वेंचणूक चित्र स्पश्ट जातलें. साखळी पालिकेचें नगराध्यक्षपद बायलां खातीर राखीव दवोरपाचो निर्णय राज्य वेंचणूक आयोगान जाहीर केला.
साखळे 57 जाणांचे अर्ज
साखळे पालिका वेंचणुके खातीर मंगळाराक निमाण्या दिसा आनीक 26 उमेदवारी अर्ज आयले. वट्ट 57 अर्ज सादर केल्यात अशी म्हायती निर्वाचन अधिकारी राजाराम परब हाणे दिली. मंगळाराक प्रभाग एकांतल्यान संतोष हरवळकार, दीप्ती चोपडेकार, उमेश पेडणेकार, भाग्यश्री ब्लेगन हांणी प्रभाग दोनांतल्यान प्रवीण ब्लेगन, प्रसादिनी कुडणेकार, आकांशा सुतार, ज्योती गोसावी, नूरजहाँ खान, प्रभाग चारांतल्यान धर्मेश सगलानी, निशा पोकळे, अजीत देसाय, गिरीश परब, प्रभाग पांचातल्यान भाग्यश्री ब्लॅगन,सुरज नायक, सहांतल्यान मरिकुट्टी हसन, भाग्यश्री ब्लेगंन, गीता बोर्येकार, प्रभाग सातांतल्यान विनोद पेडणेकार, आठांतल्यान रियास खान, दिवानी जयेश नानजी, शेख मुंजरीन, अँसिरा खान, शेख अब्दुला, प्रभाग णवांतल्यान भाग्यश्री ब्लेगन, धर्मेश सगलानी ह्या उमेदवारांनी अर्ज दाखल केले.
उमेदवारांचो प्रभागवार आंकडो फुडले भशेन आसा- प्रभाग एक – 8, प्रभाग दोन – 8, प्रभाग तीन- 2, प्रभाग चार- 6, प्रभाग पांच – 4, प्रभाग स – 6, प्रभाग सात- 5, प्रभाग आठ- 7, प्रभाग णव- 3, प्रभाग धा- 3, प्रभाग इकरा- 2, प्रभाग बारा- 3. प्रभाग 2, 11 हातूंत दरेकी दोन उमेदवार आशिल्ल्यान सरळ लडत जातली. हेर प्रभागांतलें चित्र बिरेस्ताराक स्पश्ट जातलें. भाजप आनी टू गेदर फॉर साखळी ह्या पॅनलांत प्रतिश्ठेची लडत जातली. कांय उमेदवारांनी बिनविरोध वेंचून येवपा खातीर यत्न चलयल्यात
मजगतीं साखळी पालिका वेंचणुके खातीर गोंय राज्य ओबीसी वित्त उदरगत म्हामंडळाचो वेवस्थापकीय संचालक प्रसाद वळवयकार हांची निरीक्षक म्हणून नियुक्ती केल्या.
फोंड्या 52 उमेदवारांचे अर्ज
फोंडें पालिकेच्या 15 प्रभागां खातीर निमाण्या दिसा 12 उमेदवारांनी अर्ज सादर केले. 52 उमेदवारांच्या अर्जांचो वट्ट आंकडो 61 जाला. बुधवारा तांची छाननी जातली. 2, 7, 13 आनी 15 प्रभागांत दुरंगी लडत जातली. प्रभाग 7तलो उमेदवार आनी फोंडें भाजपा मंडळाचो अध्यक्ष विश्वनाथ दळवी हाका बिनविरोध वेंचून हाडपा खातीर सध्या यत्न सुरू आसात. बिरेस्ताराक वेंचणुकेचें खरें चित्र दिसून येतलें.
मंगळारच्या अर्ज भरपाच्या निमाण्या दिसा तुषार ऊर्फ लवलेश कवळेकार, नंदकुमार डांगी (प्रभाग 1), सलोनी शांतो नायक (प्रभाग 4), मंगेश कुंडयकार, (प्रभाग 6), तोशिता कुंडयकार, सायमन आगियर, पद्मजा नायक (प्रभाग 6), वेदिका वळवयकार, (प्रभाग 11), अजय मामलेकार, अजित पारकार, निधी मामलेकार, सुरज नाईक (प्रभाग 12) हांणी उमेदवारी अर्ज सादर केल्यात.
उमेदवारी अर्ज सादर केल्ल्यां मदी नव्या उमेदवारांचो आसपाव आसा. 1, 4 आनी 14 प्रभागांत पांच उमेदवारी अर्ज, 1 आनी 12 प्रभागांत चार, 5, 8, 9 आनी 11 प्रभागांत तीन उमेदवारांनी अर्ज सादर केल्यात. भाजपान आपले उमेदवार निश्चीत केल्यात. हेर राजकी पक्षांनी बऱ्या उमेदवारांक तेंको दिवपाचो निर्णय घेतला. आम आदमी पक्षाचे अॅड सुरेल तिळऴे हांणी लेगीत बऱ्या उमेदवारांक तेंको दितले अशें सांगलां. प्रभाग 7त विश्वनाथ दळवी हाचे आड भारत पुरोहित हांणे उमेदवारी अर्ज भरला. तरीय दवळी हाका बिनविरोध वेंचून हाडपाचो यत्न सरकारी पावंड्या वयल्यान चल्ला अशी खबर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
