भांगरभूंय | प्रतिनिधी
मुख्यमंत्री: मायमेळें तळें नितळ जातकूच लोकांनी निगा राखची
वास्को: केंद्र सरकारच्या अमृत सरोवर येवजणे खाला दक्षीण आनी उत्तर गोंयांतल्या दरेकी 75 अशे वट्ट 150 उदका थळांचें पुनरुज्जीवन करतले अशी म्हायती मुख्यमंत्री डॉ. प्रमोद सावंत हांणी दिली.
डॉ. सावंत गोवा शिपयार्डांत एके कार्यावळीक हाजीर रावले उपरांत तांणी मायमोळें तळ्याक भेट दिवन तळ्याच्या नितळसाण कामाची पळोवणी केली. ह्या वेळार तांचे बरोबर वास्कोचे आमदार कृष्णा साळकार, नगरसेविका शमी साळकार, नगरसेवक गिरीश बोरकार, नगरसेवक अमेय चोपडेकार, नगरसेवक दीपक नायक, जिल्हो पंचायत वांगडी अनिता थोरात हाजीर आशिल्ले.
अमृत सरोवर येवजणे खाला माायमोळें तळें नितळ करतले. हें तळें नितळ केले उपरांत त्या तळ्याची योग्य निगा राखपाची जापसालदारकी नागरिकांची आसतली अशें डॉ. सावंत हांणी सांगलें. गोंयांतल्या सगल्या उदका थळांची योग्य ती जतनाय घेतले. ते खातीर अमृत सरोवर येवजणेचो लाव घेतले अशें तांणी स्पश्ट केलें.
आमदार कृष्णा साळकार हांणी मायमोळें तळ्यांत व्हड प्रमाणां तयार जाल्ली जलर्पण वनस्पती काडपाचें काम हातांत घेतले अशें सांगलें. पावसाच्या उदकाचो निचरो योग्य रितीन जावचो हे खातीर मायमोळें तळ्याची नितळसाण करप गरजेची आसा. मायमोळें तळ्यांतल्या सैमीक उदका स्रोताचे पुनरुज्जीवन करपा खातीर उदका स्रोत विभागाचो आदार घेतले अशें साळकारान सांगलें.
आमी कोमुनिदादी कडल्यान थंय पपींग स्टेशन उबारपा खातीर हरकत ना दाखलो घेतला. आशिकुशीच्या वाठारांतले घाणयारें उदक मायमोळें तळ्यांत वचचें न्हय हे खातीर योग्य ती प्रक्रिया सुरू केल्या. पपींग स्टेशन उबारचें आनी तळ्याचें पुनरुज्जीवन करपाचे एकाच वेळार हातांत घेतले अशें आमदार कृष्णा साळकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
