भांगरभूंय | प्रतिनिधी
39 जाणां कडेन कागदपत्रां नाशिल्ल्यान अटक
म्हापशें: मुशीरवाडो कोलवाळे पुलिसांनी भाडेकारांची पडटाळणी मोहीम राबोवन 101 जाणांक ताब्यांत घेतल्यात. गरजेचीं कागदपत्रां नाशिल्ल्या 39 जाणांक अटक केल्या.
पुलीस निरिक्षक सोमनाथ माजीक, उपनिरिक्षक मंदार परब, कुणाल नायक, सहाय्यक उपनिरिक्षक रामचंद्र सावंत, संतोष आर्लेकार आनी हेर कर्मचाऱ्यांनी हातूंत वांटो घेतलो.
कोलवाळ पुलीस निरिक्षक सोमनाथ माजीक हांणी सांगलें, मुशीरवाडो वाठारांत आमी बिरेस्तारा सकाळीं 6 वरां सावन तपासणी मोहीम राबयली. ह्या वेळार 101 भाडेकारांक तांच्या घर धनया सयत ताब्यांत घेतल्यात. हातूंतल्या 39 जाणां कडेन कसलीच कागदपत्रां नाशिल्लीं. तशेंच तांणी टेन्टंट व्हेरिफिकेशन फॉर्म भरूंक नाशिल्लो.
हाचे पयलीं आमी अशीच मोहीम थिये लाला की बस्तींत राबयिल्ली. देशांतल्या विवीध राज्यांतल्यान लोक गोंयांत येवन राबितो करतात. पूण तांचे कडेन गरजेचीं कागदपत्रां वा हेर दस्तावेज नासतात. खूबशे फावटी हे लोक गुन्यांव करतात आनी आपल्या मूळ गांवांत पळ काडटात. तांची म्हायती उपलब्ध नाशिल्ल्यान तांकां धरपाक आडमेळीं येता. हाका लागून पुलिसांनी वेळावेळार घर धनयांक सुचोवणी करून भाडेकारांचे टेन्टंट व्हेरिफिकेशन फॉर्म भरपाक सुचीत करतात. तरी लेगीत कांय जाण ताचे कडेन आडनदर करतात अशें माजीक हांणी म्हणलें.
मजगतीं, अस्नोड्यां रस्त्या वेले येरादारीक आडखळ हाडपी 13 जाणांक कोलवाळ पुलिसांनी भादंसंच्या 34 कलमा खाला गुन्यांव नोंद करून अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
