भांगरभूंय | प्रतिनिधी
विस्वासांत घेना, ह्या आरोपाक कसलोच अर्थ ना: दिप्ती नायक
केपें: शेल्डें पंचायतीच्यो सरपंच दिप्ती नायक हांचेर उपसरपंचा सयत 8 पंच वांगड्यांनी अविस्वास थाराव हाडलो तो 8 आड 3 मतांनी संमत जालो. नव्या सरपंचाची निवड जाय मेरेन पंचायतीचो ताबो उपसरपंचा कडेन आसतलो. शेल्डें पंचायतींत 11 पंचायत वांगड्यांचो आस्पाव आसा.
कुडचडें मतदारसंघांत आस्पाविल्ली आनी भौशीक बांदकाम मंत्री निलेश काब्राल हांचें वर्चस्व आशिल्ली शेल्डें पंचायतींत सरपंचाचेर अचकीत सरपंच विकासकामां करतना विस्वासांत घेनाशिल्ल्याचो आरोप करून 8 पंच वांगड्यांनी सरपंच दिप्ती नायक हांचेर अविस्वास थाराव हाडलो.
सरपंच दिप्ती नायक हांणी पत्रकार परिशद घेवन शेल्डें पंचायतीच्या 8 पंच वांगड्यांनी हाडिल्ल्या अविस्वास थारावाक कसलोच अर्थ ना अशें सांगलें. जेन्ना बिडिओ बराबर बसका जाली तेन्ना तुमकां हांवें केन्ना विस्वासांत घेवंक ना. एक तरी काम तुमकां विचारिनासतना केलां अशें विचारतकूच तांचे कडेन कसलीच जाप नाशिल्ली अशें दिप्ती नायक हांणी सांगलें.
पूण अविस्वास हाडिल्ल्या पंच वांगड्यांनी सरपंच विकासकामां करतना विस्वासंत घेनाशिल्ल्याचें म्हणलां.
सरपंच दिप्ती नायक हांकां मंत्री निलेश काब्राल हांणी सरपंचपदार बसयिल्लें. पूण अवघ्या सात म्हयन्यां भितर सरपंचपदा वयल्यान सकयल देंवयलें. शेल्डें पंचायतीचेर काब्राल हांचे समर्थक पंच वांगडी आसतना असो अचकीत फेरबदल जाल्ल्याची चर्चा मात शेल्डें वाठारांत रंगल्या.
शेल्डें पंचायत बायल सरपंचपदा खातीर राखीव आसा. सद्या उपसरपंचा कडेन ताबो दिला. पूण मंत्री निलेश काब्राल हे नव्या सरपंचपदा खातीर कोणाची निवड करतात हाचे कडेन सगल्यांचे लक्ष लागून आसा.
कांय दिसां पयलीं नवेमोड्डी हांगासरल्या ग्रामस्थांनी रस्त्याच्या विशया वयल्यान पंचायतीचेर मोर्चा हाडिल्लो. ह्या मोर्चा उपरांत पंच वांगड्यां मदीं दोन गट पडिल्ले. सरपंच लोकांच्या समर्थनांत आशिल्ल्यान वाद आनीक वाडलो, आनी ह्याच कारणा वयल्यान सरपंचाक आपलें पद व्हगडावचें पडलें अशी सद्या लोकां मदीं चर्चा आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
