तीन येवजण्यां खाला 5.82 कोटी मदले 1.36 कोटी वितरीत

भांगरभूंय | प्रतिनिधी

4.54 कोटींचो निधी पडून, सरकारी अहवालांतल्यान उक्तें

पणजी: आदिवासी कल्याण खात्याक तीन येवजण्यां खातीर केंद्र सरकारान फाटल्या वर्सा मंजूर केल्लो सुमार 5.82 कोटीं मदलो फक्त 1.36 कोटी निधीच लाभार्थ्यांक वितरण केलें. उरिल्ले 4.54 कोटींचो निधी तसोच पडून आशिल्ल्याचें नियोजन, सांख्यिकी आनी मुल्यमापन विभागा कडल्यान उजवाडायिल्ल्या अहवालांतल्यान मुखार आयलां.

अटल आसरो, मातृत्व आनी उण्या काळा खातीर वेवसायीक प्रशिक्षण ह्या तीन येवजण्यां खातीर राज्य आदिवासी कल्याण खात्याक केंद्र सरकारा कडल्यान फाटल्या वर्सा वळेरेन 3 कोटी, 2.70 कोटी आनी 11.90 लाख असो वट्ट 5.82 कोटींचो निधी मंजूर जाल्लो. तातूंतल्या अटल आसरांतल्यान 368 लाभार्थ्यांक सुमार 88.68 लाख, मातृत्व येवजणेंतल्यान 39 लाभार्थ्यांक सुमार 42.10 लाख आनी उण्या काळा खातीर वेवसायीक प्रशिक्षण येवजणेंतल्या 179 लाभार्थ्यांक 5.70 लाख अशे वट्ट 1.36 कोटींच्या निधीचें वितरण खात्या कडल्यान केलां अशें अहवालांतल्यान दिसून येता.

आदिवासी समाजाचो समाजीक आनी अर्थीक विकास सादपा खातीर ह्यो तीन येवजण्यो म्हत्वपूर्ण आसात. अटल आसरो येवजणे खाला आदिवासी समाजांतल्या नागरिकांक घर बांदकाम आनी दुरुस्ते खातीर, मातृत्व येवजणे खाला आदिवासी बायलांक तांच्या पयल्या भुरग्याच्या जल्मा उपरांत अर्थीक सहाय्य दितात. जाल्यार आदिवासी समाजांतल्या तरणाट्यांक कुशळटाय विकास प्रशिक्षण आनी आपरोजगारा खातीर अर्थीक मजत दितात.

मजगतीं, गोंयांत सद्या आदिवासी समाजाची लोकसंख्या सुमार देड लाख इतली आसा. तातूंत उत्तर गोंयांत 56 हजार आनी दक्षीण गोंयांत 92 हजार नागरीक राबित्याक आसात.

———————–

तीन येवजण्यांचो नियाळ

येवजण निधी प्राप्त लाभार्थी वितरीत निधी

अटल आसरो : 3 कोटी : 368 : 88.68 लाख

मातृत्व 2.70 कोटी 39 42.10 लाख

वेवसायीक प्रशिक्षण 11.90 लाख 179 5.70 लाख

वट्ट 5.81 कोटी 586 1.36 कोटी