भांगरभूंय | प्रतिनिधी
सांगेंः 50 दीस जाले आमी शेत आनी सैम वाटावपा खातीर धरणें आंदोलनाक बसल्यात. पूण थळावे आमदार आनी मंत्री सुभाष फळदेसाय एकूय उतर आयकून घेवपाक तयार नात. वेल्यान आपूण सांग्यार आयआयटी हाडटलोंच अशे नेटान सांगतात. इतले दीस पाशियेंस काडिल्ल्या शेतकारांनी आनी सैममोगींनी काल (मंगळारा) मंत्री सुभाष फळदेसाय हांकां काळे बावटे दाखोवन तांचो निशेध केलो. सांग्यार थळाव्या आमदाराक काळे बावटे दाखोवपाचो प्रकार पयलेच खेपे घडटा. ‘आमचो दोंगोर आमकां जाय, आमची शेतां आमकां जाय, आमचो सैम आमकां जाय’ हे खातीर हे खातीर आमी झगडटात अशे शेतकार सांगतात.
सांग्यार चडांत चड लोकांचो ह्या प्रकल्पाक विरोध आसतना थळावे आमदार आनी मंत्री सुभाष फळदेसाय आनी मुख्यमंत्री डॉ. प्रमोद सावंत आपल्या फायद्या खातीर सैमाचो इबाड करून हो प्रकल्प हाडपाक सोदतात. सैमाचें लुकसाण करून आमी हो प्रकल्प हाडूंक दिवचेनात अशेंय शेतकार आनी सैममोगी पोटतिडकीन उलयतात.
ह्या आंदोलनाक तेंको दितना आप पक्षाचे फुडारी अॅड. अमीत पालेकार हांणी म्हणलें, ज्या जाग्यार आयआयटी येता तो जागो शेतांचो आनी सैमसासायेन भरिल्लो. सैम पेड्डेर करून सरकार जर आयआयटी हाडूंक सोदता जाल्यार तें चुकीचें आसा. उत्तर गोंयांत कितलेशेच जागे सरकाराच्या नांवार आसात. सरकार त्या जाग्यार आयआयटी हाडूंक कित्याक सोदिना? अशें तांणी म्हणलें.
सरकार एके वटेन शेतां रोयात म्हूण सांगता आनी दुसरे वटेन शेतां पुरयता. हे शेतकार आयआयटीक विरोध करिनात. ते फक्त शेतां पुरोवन, दोंगर कापून सैमाचें लुकसाण करून आयआयटी नाका म्हणटात अशें पालेकार हांणी म्हणलें.
ह्या वेळार संदेश तळेकार, फादर बोलमेक्स हांचेंय उलोवप जालें.
काल सांग्यार नगरपालीकेची बसका आशिल्ली. बसका पूर्ण करून थळावे आमदार तशेंच समाज कल्याण मंत्री सुभाष फळदेसाय हे सभाघरांतल्यान भायर सरले उपरांत शेतकारांनी आनी सैममोगींनी काळे बावटे दाखोवन मंत्र्याचो निशेध करून शेतकार आनी सैममोगींनी घोशणा दिल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
