भांगरभूंय | प्रतिनिधी
दक्षता खात्या कडेन 9 हजार प्रकरणां प्रलंबीत
म्हापशें: सीबीआय, दक्षता खातें हे सारक्यो तपास यंत्रणा सरकारा कडेन आसात. पूण हे प्रणालीक कमजोर करपाचो यत्न सरकारी पांवड्यार सुरू आसा. दक्षता खात्या कडेन 9 हजार प्रकरणां प्रलंबीत आसात आनी सरकार अधिकाऱ्यांचेर चेपण हाडीत आशिल्ल्यान ही प्रकरणां अजून तशींच पडून आसात असो आरोप काँग्रेसीचे फुडारी एल्वीस गोम्स हांणी केलो.
सोमारा म्हापश्यां काँग्रेस कचेरेंत आयोजीत केल्ले पत्रकार परिशदेंत ते उलयताले ह्या वेळार उत्तर गोंय जिल्हो अध्यक्ष विरेंद्र शिरोडकार, म्हणयारे संजय बर्डे, विजय भिके, जॉन नाझारेथ, राजन कोरगांवकार आनी हेर पदाधिकारी हाजीर आशिल्ले.
सीबीआय आसूं वा दक्षता ह्या खात्यां कडेन येवपी कागाळदारांची सुरक्षा म्हत्वाची आसता. तांची वळख उक्ती जावची न्हय हे खातीर जतनाय घेवंक जाय. एके वटेन सरकार दक्षता सप्तक मनयता तें फक्त नांवां पुरतेंच. गाजिल्ले घोटाळे आनी हाय प्रोफायल्स प्रकरणांत विद्यामान स्थिती विशींची म्हायती लोकांक दिवन सरकारान खरी जागृताय करपाची गरज आसा अशें गोम्स हांणी म्हणलें.
एका काळार एसईझॅड जमीन घोटाळो, पुलीस स्टेशनार फातार मारप, खाण घाटोळो, लुईस बर्जर प्रकरण, पुलीस भरती घोटाळ्याचेर भाजपाच्या लोकांनी बोवाळ घाल्लो. पूण ज्या लोकांचेर आरोप आशिल्ले ते लोक आतां भाजपांत आशिल्ल्यानूच सगल्यो गजाली थंड पडल्यात असो आरोपूय गोम्स हांणी केलो.
विजय भिकेन म्हणलें, गोंयाक भ्रश्टाचार मुक्त करपा खातीर काँग्रेस पक्ष यत्न करतलो. ताका लागून गोंयचे विशय मुखेलपणान आमी हातांत घेतले. तेच प्रमाण गोंयचे सीबीआय कचेरेंतलो लॅण्डलायन फोन तशेंच थंयचें संकेतथळ चलना. मुळांत सरकार तपास यंत्रणा कमजोर करपाचो यत्न करीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
