भांगरभूंय | प्रतिनिधी
इमारत घातक स्थितींत, कर्मचाऱ्यांचो उणाव, दुरुस्ती कडेन जाता आडनदर
म्हापशें: उत्तर गोंय कोमुनिदाद प्रशासक ही वारसो इमारत सद्या घातक स्थितींत आसून जिर्णोद्धाराचे प्रतिक्षेंत आसा. सरकारान हे इमारती कडेन खूबशा दसकां सावन आडनदर केल्ल्यान इमारतीची दुर्दशा जाल्या. तशेंच प्रशासक कचेरेंतल्या कर्मचाऱ्यांचो उणाव आनी दुरुस्ती कडेन जावपी आडनदर अशा द्विधा स्थितींत ही इमारत दीस काडटा.
म्हापशें कोमुनिदादीच्या मालकीच्या कोर्ट जंक्शनार आशिल्ल्या ह्या प्रशासकी वारसो इमारतीक अॅडमिनीस्ट्रीट ऑफ कोमुनिदाद दी बार्देस ह्या नांवांनूय वळखतात. ह्या इमारतीक सद्या ताकतिकेन जिर्णोद्धाराची गरज आसा. इमारतीची रचणूक पुर्तुगेज काळांतली आसून 1300 चौखण मिटर सुवातेंत ती पातळ्ळ्या. तातूंत खूबशो कुडी, एक गॅलरी आनी एका सभाघराची वेवस्था आसा. ही वास्तू फक्त मुखेल अशी नासून तिका वारसो मुल्य लेगीत आसा. ताका लागून तिचो सांबाळ करप गरजेचो आसा.
ह्या इमारतीच्या तळ माळ्यार कोमुनिदाद प्रशासक कचेरेचो गुदंव आसा, आनी थंय पोरणें दस्तावेज आसात. ह्या दस्तावेजांची देखभाल जावंक नाशिल्ल्यान वाळटी लागिल्ली. आदल्यो महसूल मंत्री जेनिफर मोंसेरात हांचे नदरेक कांय कोमुनिदादीच्या पदाधिकाऱ्यांनी हो प्रकार हाडून दिले उपरांत तांणी रोखडीच ह्या गुदांवाची दुरुस्ती करून वाळटी लागिल्ल्या दस्तावेजांचो सांबाळ केलो.
पुर्तुगेज काळांतले हे इमारतीच्या वण्टींक वेरो गेल्ल्यान तशेंच पाख्याचे सिमेंट सकयल पडत आशिल्ल्यान भितरल्या लोखंडाच्यो सळयो भायर दिसतात. लांकडी पाखेंय पेड्डेर जालां. देखभालाच्या उणावाक लागून सद्या इमारतीची स्थिती खालावत चल्ल्या.
हाका लागून इमारतींत काम करपी कर्मचारी आनी कामकाजा खातीर येवपी लोकांक धोको निर्माण जाला. इमारतीच्या ह्या दुरावस्थेक लागून बीएसएनएलचो दूरध्वनी विभाग आनी हेर कचेऱ्यो हाचे आदींच थंय सावन स्थलांतरीत जाल्यात.
दिसानदीस पेड्डेर जायत आशिल्ल्या इमारतीच्या दुरुस्ते विशीं कोमुनिदादीच्या प्रशासक कचेरेन 2018 सावन सरकाराच्या महसूल खात्या कडेन खूबशे फावटी पत्रवेव्हार केलो. पूण ह्या पत्रांची दखल अजून घेतिल्ली ना. तशेंच म्हापशें कोमुनिदादीन ह्या इमारतीचेर मालकी हक्क दाखयिल्ल्यान सरकारानूय इमारतीची डागडुजी वा जिर्णोद्धाराचो प्रस्ताव मुखार व्हरपाक रस दाखयलो ना.
ह्या प्रशासक कचेरी इमारतीची जीर्ण जाल्ली स्थिती आनी ताचे दुरुस्ते विशीं सरकाराच्या संपर्कांत आमी आसात अशें उत्तर गोंय कोमुनिदादीचे प्रशासक शिवप्रसाद नायक हांणी सांगलें.
उत्तर गोंय कोमुनिदाद प्रशासना कडेन कर्मचाऱ्यांच्या उणावाचो मोटो प्रस्न आसा. ताका लागून कचेरेच्या कामकाजाचेर परिणाम जायत आसा. हाचो सद्या काम करपी कर्मचाऱ्यांचेर कामाचो ताण पडटा. उत्तर गोंयांतल्या 75 कोमुनिदाद आनी प्रशासक कचेरेच्या कार्यक्षेत्रांत आसात. पूण फावोसो कर्मचारी नाशिल्ल्यान दीसपट्ट्या कामाचेर परिणाम जावन अर्ज निकालांत काडपाक कळाव जाता.
कोमुनिदाद सुवातेंत अतिक्रमण आनी हेर मेळून सरासरी सुमार 50 ते 60 कागाळी येतात. सद्या हे कचेरेंत स कारकून एक निवृत्त कर्मचारी अशे सातूच कर्मचारी कामकाज पळयतात. तशेंच कचेरेंत अद्ययावत संगणक आनी हे संगणक हाताळपा खातीर प्रशिक्षीत कर्मचाऱ्यांचाे उणाव आसा आनी कचेरेक स्वताची वाहन वेवस्थाय ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
