भांगरभूंय | प्रतिनिधी
फोंडें पालिका मंडळाचो निर्णय; एप्रील 2023 सावन लागू
फोंडें: फोंडें पालिकेचे नगराध्यक्ष रितेश नायक हांचे अध्यक्षताये खाला बुधवारा सकाळीं खासा बसकेचें आयोजन केल्लें. बसकेंत पालिकेचे अर्थीक स्थिती विशीं नियाळ घेवन रहिवासी आनी वेवसायीक घरपटींत वाड करपाचो निर्णय घेतलो. रहिवासी करांत 15 रुपया प्रति चौखण मिटर जाल्यार वेवसायीक 100 (पोरणें बांदकाम) रुपया प्रति चौखण मिटर नवो दर लागू केलो. तेच बरोबर नव्या बांदकामा खातीर 206.08 रुपया प्रति चौखण मिटर दर लागू जातलो.
फोंडें पालिकेची अर्थीक स्थिती फाटल्या कांय म्हयन्यां सावन बिकट जाल्ल्यान बुधवारा सकाळीं अध्यक्ष रितेश नायक हांणी आयोजीत केल्ले खासा बसकेंत घरपटी दरांत वाड करपाचो निर्णय घेतलो. कर्मचाऱ्यांच्या पगारा खातीर दर म्हयन्याक 60 लाख रुपया खर्च करतात. कर्मचाऱ्यांक पांचवो आनी सवो वेतन आयोग लागू जाल्ल्यान पालिकेचेर अदीक खर्च करपाची वेळ आयल्या. घरपटींत वाड केल्ल्यान पालिकेच्या महसुलांत आनीक वाड जावपाची शक्यताय आसा. नवो दर एप्रील 2023 सावन फोंडें पालिका वाठारांतल्या लोकां खातीर लागू जातलो.
पालिका वाठारांत 1997 वर्सा 5 रुपया प्रति चौखण मिटर घरपटी लागू केल्ली. उपरांत 2016 वर्सा घरपटींत 50 पयशे वाड केल्ली. 2019 वर्सा पालिका मंडळान घरपटी दरांत देड रुपयांची वाड केल्ली. ते प्रमाण रहिवासी घरपटी 7 रुपया जाल्यार वेवसायीक घरपटी 20 रुपया घेताले.
पालिका प्रशासनान हाचे पयलींच खूबशे फवटी घरपटी दरांत वाड करपाचो आदेश दिल्लो. पूण पालिका मंडळान कांय प्रमाणांत घरपटी दरांत वाड करपाचो निर्णय बुधवारा जाल्ले बसकेंत घेतलो. नवो दर एप्रील 2023 सावन फोंडें पालिका वाठारांतल्या लोकां खातीर लागू जातलो अशें नगराध्यक्ष रितेश नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
