भांगरभूंय | प्रतिनिधी
भाजप कार्यकर्त्यां मदीं मात गोंदळाची स्थिती
वास्को: काँग्रेसीचे आमदार संकल्प आमोणकार हांणी अपेक्षे प्रमाण भाजपांत प्रवेश केल्ल्यान मुरगांव मतदारसंघांतलीं कांय समिकरणां बदलपाची शक्यताय आसा. आमोणकार हांच्या निर्णयान काँग्रेस कार्यकर्ते आनी तांचे समर्थक खूश जाल्यात. आतां मुरगांव मतदारसंघांतल्या कामांक गती मेळटली अशें ते सांगतात. जाल्यार दुसरे वटेन भाजपा कार्यकर्त्यां मदीं गोंदळाची स्थिती निर्माण जाल्या. कांय जाणांनी पक्षाच्या निर्णयाक येवकार दिला जाल्यार कांय जाणांनी आमकां हे संबंदी विस्वासांत घेवंक नाशिल्ल्याचें सांगलां.
मुरगांव मतदारसंघांतल्यान काँग्रेसी वतीन संकल्प आमोणकार हे 2012 आनी 2017 वर्सा जाल्ल्या वेंचणुकांनी आदले मंत्री मिलिंद नायक हांचे कडल्यान हारिल्ले. पूण 2022 वर्साचे वेंचणुकेंत मिलिंद नायक हांचेर एक प्रकरण शेकिल्ल्यान ताचो लाव संकल्प आमोणकाराक जाल्ल्यान ते जैतिवंत जाले.
पूण भाजपा सरकार सत्तेर आयले उपरांत आमोणकार हे भाजपांत वतले अश्यो वावड्यो पातळटाल्यो. त्या वेळार आमोणकार हांणी त्यो गजाली न्हयकारिल्ल्यो. पूण तांणी आतां भाजपांत प्रवेश केल्ल्यान तांचे विशीं पातळटाल्यो त्यो वावड्यो नाशिल्ल्यो ती सत्यपरिस्थिती आशिल्ली हें सिद्ध जालां.
आमोणकार हांणी आपल्या समर्थकांची मतां आजमायिल्लीं. तांणी तांकां आपल्या भाजपा प्रवेशा विशीं विस्वासांत घेतिल्ले. मुरगांव काँग्रेस गट अध्यक्ष महेश नायक हांणी सांगिल्लें की आमोणकार हांणी भाजपांत प्रवेश करचो. हे विशीं आमी पुराय तेंको तांकां दिल्लो. भाजपांत प्रवेश केल्ल्यान मुरगांव मतदारसंघांतलीं विकासाचीं कामां जातलीं. काँग्रेसीच्यो वेगळ्योवेगळ्यो समित्यो आमोणकार हांचे फाटल्यान उब्यो आसात.
समाजीक कार्यकर्ते शंकर पोळजी हांणी काँग्रेसीच्या त्या आमदारांचेर टिका केली. भाजपाक विरोधक कोणूच नाका आशिल्ल्यान तांणी ही खेळी खेळ्ळ्या. जाल्यार काँग्रेसीन लोकांचो विस्वासघात केल्ल्याचो दावो तांणी केलो. सरकाराचें काम सारकें चलचें हे खातीर घटमूट विरोधी पक्षाची गरज आसता. पूण ती आतां फोल थारल्या. पयलीं भाजपाचेर टिका करपी त्या आमदारांच्या तोंडांत आतां बंडलां गेल्यांत काय कितें असो प्रस्न उपस्थीत केलाे.
मजगतीं, संकल्प आमोणकार हांणी आपल्या समर्थकां सयत बोगदा, सडा हांगासरल्या देवळांनी भेटी दिवन देवांचें आशिर्वाद घेतले. उपरांत तांणी आपल्या समर्थकां सयत बसका घेवन आपल्या निर्णया संबंदी म्हायती दिली. तांकां तांच्या समथर्कांनी तेंको दिला. कसलोच भेदभाव करिनासतना आपूण विकासकामां करतलों अशें आमोणकारान सांगलें. विकासकामां आनी हेर कामां जावपा खातीर सरकारांत आसप गरजेचें आशिल्लें. ताका लागून आपणाक हो निर्णय घेवचो पडलो अशें तांणी स्पश्ट केलें.
जाल्यार दुसरे वटेन भाजपा मंडळाचीय बसका जाली. पूण ते बसकेंत कसली चर्चा जाली हें मात समजूंक शकले ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
