भांगरभूंय | प्रतिनिधी
वाहन चालकांक करची पडटा सर्कस; सोदचो पडटा रस्तो
उसगांव: भाजपाच्या केंद्र सरकाराचें एक धोरण आसा. सबका साथ सबका विकास. सगल्यांक बरोबर घेवन सर्वांगी विकासाचो मेळ घालप. पूण अशें जाता? हो संशोधनाचो विशय जाला. सगल्यांत ताजें उदाहरण म्हणल्यार सद्या सत्तरी म्हालांतल्या चोर्ला घांटांतल्यान बेळगांवां वतना वाहन चालकांक हाचो अणभव येता.
चोर्ला घांटांतली गोंयची शीम हुपले उपरांत कर्नाटक सरकाराचे शिमेंत चोर्ला ते कणकुंबी, जांबोटी मेरेनचो रस्तो फोंडकुलांनी भरिल्ल्यान वाहन चालकांक रस्तो खंय आसा हें सोदचें पडटा. व्हड व्हड फोंड पडिल्ल्यान दुचाकी चालकांक सर्कस करची पडटा. तातूंतच चोर्ला वाठारांत सदांच धुकें पडिल्लें आसता. अशे स्थितींत हेर गाडयांचो सांगात घेवचो पडटा.
चोर्लांतल्यान अवजड वाहनां आसतातूच. घांटांत अशीं वाहनां ‘ब्रेक डावन’ जावपाचे प्रकार जायत आसतात. तशें पळोवंक गेल्यार गोंयांत आनी कर्नाटकांत भाजपाचेंच सरकार आसा. तरी लेगीत दोगांय सरकारांचो एकामेका मदीं रस्त्या विशींची फाटपुरवण जायना, ही गंभीर गजाल जाल्या.
कणकुंबी ते जांबोटी मजगतच्या रस्त्या वयले एके चडटेर व्हड फोंडकूल रस्त्यार पडलां. त्या फोंडकुलांतल्यान मोटार काडप म्हणल्यार चालकाक नाका पुरो जाता. चोर्लांत कर्नाटकाची शीम सुरू जाली की फोंडकुलांची माळ सुरू जाता. चोर्ला घांटांत धुक्याची चादरूच दिसून येता. दुसरे वटेन रस्त्या कुशीक आशिल्ले घसघशे पावसाक लागून परतून प्रवाहीत जाल्ल्यान येरादारी करप्यांक सैमाचो वेगळोच आनंद अणभवूंक मेळटा.
ह्या वाठारांत पालसणां कोसळत आशिल्ल्यान हो वाठार असंवेदनशील आसून हो वाठार घातक क्षेत्र म्हूण नांवरुपाक आयला. धुकेंय पडत आशिल्ल्यान वाहन चालक पार्कींग लायटी पेटोवन आपल्यो मोटारी चलयतात. चोर्ला घाटांतली पालसणां दुर्लक्षितूच उरल्यात. तातूंतल्यानूच येरादारीचो धोको वाडला. जंय सेगीत पालसणां कोसळटात थंय राखणे वणत बांदपाची गरज आसा. पूण कर्नाटक वाठारांतल्या फोंडकुलांक लागून सद्या मात सबका साथ सबका विकास ही संकल्पना मात वाऱ्यारूच विरगळिल्ल्याचें स्पश्ट जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
