द. गोंयांत नारायण राणेच थारायतले भाजपाची रणनिती

भांगरभूंय | प्रतिनिधी

सदानंद तानावडेः मंत्री, आमदार, कार्यकर्ते हांच्या संपर्कांत रावून घेतले म्हायती

पणजी : देशांत जे मतदारसंघ भाजपा कडेन नात, ते मतदारसंघ जिखपा खातीर रणनिती थारावपाची जापसालदारकी भाजपान केंद्रीय मंत्री तशेंच मुखेल फुडाऱ्यां कडेन सोंपयल्या. दक्षीण गोंयची जापसालदारकी केंद्रीय मंत्री नारायण राणे हांचे कडेन सोंपयल्या. हाका लागून रणनिती थारावपाचे मुखेल सुत्रधार तेच आसतले अशी म्हायती भाजपाच्या गोपां कडल्यान मेळ्ळ्या.

मंत्री, आमदार तशेंच कार्यकर्त्यांच्या संपर्कांत रावून ते मतदारसंघाची म्हायती घेतले. शेनवारा लेगीत तांणी दक्षीण गोंया विशीं राजकी स्थिती समजून घेतली अशें प्रदेश भाजप अध्यक्ष सदानंद शेट तानावडे हांणी सांगलें.

2014 परस 2019 वर्सा भाजपाक 300 परस चड सुवाती मेळ्ळ्यो. उत्तर प्रदेश, गुजरात, महाराष्ट्र , राजस्थान ह्या राज्यांनी भाजपाक व्हड प्रमाणांत येस मेळ्ळें. जी सुवात पक्ष जिखूंक ना ती सुवात जिखपाचेर भाजपाचो भर आसतलो. दक्षीण गोंयांत पक्षाक हार स्विकारची पडिल्ली. ही सुवात मेळोवपा खातीर यत्न करचे अशी सुचोवणी केंद्रीय फुडाऱ्यां कडल्यान आयल्या. दक्षीण गोंयांत पक्षाच्यो बसका तशेंच लोकसंपर्क सुरू आसा. हाचो अहवाल अध्यक्ष ह्या नात्यान हांव दितलों अशें तानावडे हांणी सांगलें.

एकंदर स्थितीचो विचार करून रणनिती थारतली आनी उमेदवारांची निवड जातली. उमेदवारा विशीं आजून निर्णय जावंक ना. इतले बेगीन तो जावचो ना अशें प्रदेश अध्यक्ष सदानंद शेट तानावडे हांणी सांगलें.

1991 वर्सा सावन भारतीय जनता पक्ष लोकसभा वेंचणूक लडयता. 1999 आनी 2014 ह्या दोन वेंचणुकांनी भाजपाक जैत मेळ्ळां. 1999चे लोकसभा वेंचणुकेंत भाजपाचे रमाकांत आंगले हांणी काँग्रेसीचे ज्योकीं आलेमांव हांकां हारयिल्लो. हाचे उपरांत 2014चे वेंचणुकेत भाजपाचे अॅड. नरेंद्र सावयकार हांणी काँग्रेस उमेदवार आलेक्स रेजिनाल्ड हांकां हारोवन भाजपाक जैत मेळोवन ​दिलें. 1999 आनी 2014 ची वेंचणूक सोडली जाल्यार हेर वेंचणुकांनी दक्षीण गोयांत भाजपाक हार स्विकारची पडल्या. उत्तर गोंयांत मात 1999 सावन केंद्रीय मंत्री श्रीपाद नायक सेगीत जैतिवंत जायत आसात.

विधानसभा वेंचणुके उपरांत पंचायत वेंचणुकांनी पक्षाक मोठे येस मेळ्ळां. ते भायर मगो पक्ष सरकारांत आसा. दक्षीण गोंयांत पक्षाचे खूबशे आमदार आसात. आतां पसून यत्न केरीत जाल्यार दक्षीण गोंयांत पक्षाचे जैत निश्चित आसा, अशें अध्यक्ष तानावडे हांणी सांगलें.

फाटले वेंचणुकेंत दक्षीण गोंयांत 9755 मतांनी हार जाल्ली. ही तूट भरून काडप शक्य आसा. भाजपाक बरे वातावरण आसा, अशें तांणी सांगलें.

पक्षान उमेदवारी दिल्यार स्विकारतलों : अॅड. सावयकार

फाटल्या दोन वेंचणुकांनी अॅड. नरेंद्र सावयकार हे भाजपाचे उमेदवार आशिल्ले. पक्षान उमेदवारी दिली जाल्यार हांव ती स्विकारतलों, अशें अॅड. नरेंद्र सावयकार हांणी सांगलें. हे खेपे आदले मंत्री मनोहर आजगांवकार तशेंच चंद्रकांत कवळेंकार हांच्या नांवांची चर्चा आसा. पक्ष जो कितें निर्णय घेता तो आपणाक मान्य आसतलो, अशें अॅड. नरेंद्र सावयकार हांणी सांगलें.