भांगरभूंय | प्रतिनिधी
सांगेंच्या लोकांचो, शेतकारांचो प्रकल्पाक विरोध
भांगरभूंय । प्रतिनिधी
सांगें: आयआयटीक अजून सांगेंच्या शेतकार तशेंच गांवच्या लोकांचो विरोध आसा. लोकांचें लुकसाण करून, दोंगर, सैम, सासाय पेड्डेर करून कपेल, मसुंडी मातये भरवण करून आयआयटी जायच कित्याक? आमच्या पुर्वजांनी राखून दवरिल्लीं शेतां नश्ट करून आपल्या फायद्या खातीर आमदार सुभाष फळदेसाय ह्या वाठारांत आयआयटी हाडपाक सोदता. आमी आमची जमीन दिवचे नात, अशें नागवें चींच वाठारांतल्या कपेला मुखार घेतिल्ले पत्रकार परिशदेंत जमिल्ल्या शेतकारांनी निर्णय घेतलो. ह्या वेळार शंबरा वयर शेतकार तशेंच गांवचे लोक हाजीर आशिल्ले.
आमदार फळदेसाय हांणी शेतकारांक विस्वासांत घेनासतना आयआयटी प्रकल्प सांग्यार हाडपाक सोदता. सध्या सांगें मतदारसंघांत वीज आनी उदक फावोश्या प्रमाणांत मेळना. हे स्थितींत ह्या वाठारांत आयआयटी आयली जाल्यार आमचें कितें जातलें? 90 टक्के लोकांक आयआयटी जाय अशें आमदार सांगता जाल्यार तो चोरयांनी शेतांत कित्याक येता? ताका पुलीस संरक्षणाची गरज कित्याक लागता? ह्या वाठारांत सुमार 250 शेतकार आसात. तांचे वांगडा बसका घे. आमदार फळदेसाय हो फक्त आपल्या फायद्या खातीर हो प्रकल्प सांग्यार हाडपाक सोदता, अशें शेतकार जोजफ फर्नांडीस हांणी सांगलें.
रुपाबाई च्यारी हांणी सांगलें, दोंगर, शेतांचो इबाड करून, आमच्या पुर्वजांनी आमचे खातीर राखून दवरिल्लीं शेतां पुरोवन, भुरग्यांचो फुडार काबार करून आमका आयआयटी नाका.
अविता पिसेतो हांणी सांगलें, आमी उदक आनी विजे खातीर त्रास सोंसतात. आयआयटी आयली जाल्यार उदक आनी वीज आमकां सारकी मेळची ना. आयआयटीचो आमकां सांगेंकारांक कसलोच फायदो ना जाल्यार तो प्रकल्प कित्याक, असो तांणी प्रस्न केलो.
ह्या वेळार विकी डिसोझा, लुसी बार्रेटो, रुजाद कुलासो, मिलाग्रीस कुलासो आनी हेर शेतकारांनी आपले विचार मांडले तशेंच ह्या प्रकल्पाक विरोध केलो.
आमचीं शेतां आमकां जाय, आमचे दोंगर आमकां जाय, आमचें कपेल आमकां जाय, ह्या घोशणांनी पत्रकार परिशद सोंपयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
