भांगरभूंय | प्रतिनिधी
कोणूच पावचो न्हय म्हूण रस्तोच दवरलो खणून
आस्थापनाचेर मोर्चा व्हरपाची लोकांची शिटकावणी
फोंडें: करमणें-किर्लपाल ते खांडेपार मेरेनच्या दुदसागर न्हंयेंत खदूळ उदक सोडिल्ल्यान कांय थळाव्या लोकांनी कालेंच्या एका आस्थापनाचे सुवातेर भेट दिवन पळोवणी केली. पूण खदूळ उदक सोडत आशिल्ले सुवातेर कोणूच पावचो न्हय म्हूण आस्थापना वतीन पुराय रस्तोच खणून दवरिल्ल्यान तिडकल्ल्या थळाव्यांक परतून येवचें पडलें. पूण न्हंयेंत परतून खदूळ उदक सोडल्यार आस्थापनाचेर मोर्चा व्हरपाची शिटकावणी कोडली वाठारांतल्या तिडकल्ल्या लोकांनी दिल्या.
दुदसागर न्हंयेंत खूबशा सुवातींनी पंप बसोवन न्हंयच्या उदकाची पुरवण लोकां खातीर केल्या. न्हंयेंतल्या खदूळ उदकाक लागून लोकांक पियेवपा खातीर तशेंच रांदपा खातीर खदूळ उदक वापरचें पडटा. ताका लागून वाठारांतल्या लोकांचे भलायकेक धोको निर्माण जावपाची शक्यताय आसा.
मंगळारा परतून न्हंयेंत खदूळ उदक आयिल्ल्यान कोडली वाठारांतले पंच वांगडी भानुदास गांवकार, रमाकांत गांवकार आनी हेर ग्रामस्थांनी काल्यां वचून न्हंयेंत उदक सोडीत आशिल्ले सुवातेर वचपाचो यत्न केलो. पूण थंय कोणूच पावचो न्हय हे खातीर आस्थापना वतीन पुराय रस्तोच खणून दवरला. ताका लागून खदूळ उदक सोडिल्ले सुवातेर तिडकल्ल्या ग्रामस्थांक वचूंक मेळ्ळें ना. हे विशीं ग्रामस्थांनी धारबांदोड्यां उदका स्रोत तशेंच बांदकाम खात्याच्या अभियंत्यांक म्हायती दिवन वाठाराक भेट दिवपाची मागणी केली.
कोडली वाठारांतल्यो सगल्यो खणी बंद आशिल्ल्यान खदूळ उदक न्हंयेंत भरसप कठीण आसा. फाटल्या वर्सा न्हंयेंत खदूळ उदक येत आशिल्ल्यान थळाव्यांनी करमणें ते कालें मेरेनचे न्हंयेंत पळोवणी करून खदूळ उदक सोडीत आशिल्ले सुवातेर भेट दिवन अधिकाऱ्यां कडेन चर्चा केल्ली. त्या वेळार उदक सोडत आशिल्ल्या आस्थापना वतीन खदूळ उदक शुद्ध करपा खातीर प्रक्रिया करपाचें आस्वासन ग्रामस्थांक दिल्लें. पूण अजून मेरेन आस्थापना वतीन प्रक्रिया प्रकल्प सुरू करूंक नाशिल्ल्यान खदूळ उदक सरळ न्हंयेंत सोडपाचो प्रकार घडत आसा. हे विशीं सरकारान गंभीरतायेन लक्ष दिवपाची मागणी थळाव्या लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
