भांगरभूंय | प्रतिनिधी
पणजी : गोंय, महाराष्ट्र आनी कर्नाटकाचे शिमेर आशिल्लो विर्डीच्या घसघश्याक भेट दिवप हो एक खोसदिणो खीण आसता. घसघश्या लागसारचो वाठार लेगीत सैमीक नदरेन खूब सोबीत आसा. घसघसो तशेंच विर्डी वाठारांत पर्यटन उदरगत म्हामंडळान आयतारा ट्रेकींग मोहिमेचें आयोजन केलां. सैमीक वाठारांत भोंवपाची आवड आशिल्ल्यान विर्डी घसघश्याक भेट दिवपाची ही बरी संद आसा.
आयतारा 11 सप्टेंबराक ट्रेकिंगेची ही कार्यावळ आसा. नोंदणी खातीर 1200 रुपयांचे शुल्क आसा. हातूंत जेवणाची वेवस्था आसतली. नोंदणे खातीर अनील दलाल (9422057704, 8379022215) हांचे कडेन संपर्क सादचो. ऑनलायन नोंदणे खातीर goa-tourism.com ह्या संकेतथळाक भेट दिवची. विर्डी वचपा खातीर येरादारीची वेवस्था आसा. म्हापशें सावन सकाळी 7 वरांचेर जाल्यार पर्यटन भवन, पणजे सावन सकाळी 7.30 वरांचेर बस सुट्टली. ते भायर बाणस्तारी, सांखळे (सकाळी 7.45 वरांचेर), मडगांव (सकाळी 6.45 वरांचेर) पिकअप सुविधा आसतली. ट्रेकींग मोहिमेंत वांटेकार जावपी लोकांनी कपडे, ट्रेकींग शूज, स्नॅक हाडपाची गरज आसा. सिगार ओडप वा सोरो पियेवपाचेर बंदी आसा अशें पर्यटन म्हामंडळान कळीत केलां.
तिळारी रानांत विर्डी घसघसो आसा. रानांत हरणा, सांबर, काळो चितो, बिबटो आनी वाग आसा. भोंवता, भोंवता हातूंतलो एखाद दुसरो प्राणी नदरेक पडूंकशकता. पयली, पयली घसघश्या कडेन वचपी मार्ग सरळ आनी सोंपो आसा. उपरांत मात मार्ग अशीर आनी आडखळीचो आसा. हाका लागून ट्रेकींग मोहीम साहसी आनी आनंददायी जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
