भांगरभूंय | प्रतिनिधी
धारबांदोड्यां गोरवांचो उपद्रव वाडिल्ल्यान अपघाताची माळ सुरूच
फोंडें: धारबांदोडें ते खांडेपार मेरेनच्या राष्ट्रीय म्हामार्गार गोरवांचो उपद्रव वाडिल्ल्यान सद्या अपघाताची माळ सुरू जाल्या. आयतारा संजिवनी साकर कारखान्या मुखा वयल्या रस्त्यार मारुती व्हॅनीचो धपको गोरवांक बसलो, जाल्यार धारबांदोड्यां दुचाकीचो धपको गोरवांक बशिल्ल्यान दोगूय चालक किरकोळ जखमी जावपाचे प्रकार घडले. फाटल्या म्हयन्या सावन वाठारांत रस्त्यार गोरवांक लागून अपघात घडत आसात.
आयतारा फांतोडेर धारबांदोडें सावन तिस्क-उसगांवां मारुती व्हॅन वता आसतना अचकीत रस्त्यार गोरवां आयिल्ल्यान व्हॅनीचो धपको गोरवांक बसलो. हातूंत चालक किरकोळ जखमी जालो. अपघातांत व्हॅनीचें व्हड प्रमाणांत लुकसाण जालें.
धारबांदोड्यां उपजिल्होधिकारी कचेरे मुखा वयल्या रस्त्यार आयतारा रातीं तिस्क-उसगांव सावन मोलेंचे दिशेन वचपी दुचाकीचो धपको गोरवांक बसलो. हातूंत दुचाकी चालक किरकोळ जखमी जालो. गोरवांक धपको बशिल्ल्यान दुचाकीचें लुकसाण जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
