भांगरभूंय | प्रतिनिधी
पणजी : बेकायदाे रेंव काडपी कामगारांचेर फारपेट करपी गुन्यांवात आरोपींचो तपास लावपाक येस येवंक नासलें तरी पुलिसांक आरोपींचे धागेदोरे मेळ्ळ्यात. पुलिसां कडल्यान फारपेटीचो नेटान तपास सुरू आसा. पुलीस म्हासंचालक जसपाल सिंग हांणी ही म्हायती दिली.
चवथीचे रातीं बाणसाय – कुडचड्यार बेकायदाे रेंव काडपी कामगारांचेर फारपेट जालो. रानवटी जनावरां खातीर वापर जावपी बंदुकींतल्यान हो फारपेट जालो अशी म्हायती पुलिसांनी दिल्या. फारपेटीच्या तपासा खातीर पुलिसंनी पयली पांच जाणांक अटक केल्ली. अटके उपरांत पुलिसांक फारेपट करपी सुत्रधारा मेरेन पावप अजून मेरेन शक्य जावंक ना. तपासात पुलिसांची खासा प्रगती नासली तरी म्हत्वाचे धागेदोरे मेळ्ळ्याचें पुलीस म्हासंचालकांनी सांगलें.
मध्यान रातीं रेंव काडपी व्हड्याचेर फारपेट जालो. व्हड्याचेर तीन कामगार आशिल्ले. गुळी लागिल्ल्यान युसून अलम (23) ह्या कामगाराक जाग्यारूच मरण आयलें जाल्यार मोहम्मद साहु हो कामगार जखमी जालो. एका कामगाराक कांयच जावंक ना.
राज्यांत रेंवेची मागणी दिसान दीस वाडत आसा. रेंव काडपाचेर निर्बंध आसात. हाका लागून बेकायदाे रेंव काडपाचें प्रमाण वाडून झगड्यांचेय प्रमाण वाडलां. रेंव माफिया मदल्या दुस्मानकायेंतल्यान हो फारपेट जावपाचो कयास आसा. हे फाटभुंयेर पुलिसांचो तपास सुरू आसा.
सीआरझॅड वाठारांत रेंव काडपाचेर बंंदीची तजवीज 2011चे अधिसुचोवणेंत आसा. हे अधिसुचोवणेंत दुरुस्तीची सरकाराची मागणी आसा. गोंंय सरकारान सीआरझॅड अधिसुचोवणेंत दुरुस्ती करपाचो प्रस्ताव केंद्रीय रानां आनी पर्यावरण मंंत्रालयाक सादर केलो. केंद्रान हे विशीं अजून निर्णय घेवंंक ना. हाका लागून रेंवे विशीं पर्यावरणीय दाखले दिवपाक आडखळी निर्माण जाल्यात. फारपेटी उपरांत मुख्यमंत्र्यांनी एक म्हत्वाची बसका घेतली. हे बसकेंत पर्यावरणी दाखले बेगीन दिवपा खातीर पावलां उबारपाचे आदेश दिल्यात.
गिमाच्या दिसांनी गोंंयच्या न्हंंयांनी भरपूर उदक आसता. तशेंच गिमांत तांंकां सुकती येना. हाका लागून रेंव काडली तरी न्हंंयो आटच्यो नात अशें एनआयओन म्हणलां. हाका लागून सेआरझॅड अधिसुचोवणेंत दुरुस्तीचे यत्न आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
