भांगरभूंय | प्रतिनिधी
पेडणें ः पेडणें म्हालांतल्या पेडणें मतदारसंघांत जाता त्या आंतरराष्ट्रीय मोपा विमानतळार काम करता आसतना हालींच एक व्हडलें भुंयार सांपडलें. मोपा विमानतळा वयले धांवपट्टे वयल्यान फकत दोन मिटर कुशिकूच हें भुंयार मेळिल्ल्यान बरोच बोवाळ जाला.
मोपा विमानतळार हे आदीं भुंयारां सांपडिल्लीं. पूण कोणेच जाग केली ना. फुडारांतलो धोको मतींत घेवन सरकारान हाचो सोद घेवचो अशी मागणी मोपा विमानतळ पंचक्रोशी जन संघटणेचे निमंत्रक उदय महाले हांणी केल्या.
भुंयार सांपडटकच बोवाळ जातलो म्हणून सगल्या कंत्राटदारां कडल्यान 15 टन मातयेचे ट्रक कामाक लावन सुमार 200 ट्रक माती ओतोवन रातयां भुंयार पुरयलें अशी चर्चा आसा. मोपा विमानतळाचें बांदकाम करपी कंपनी भुंयाराचें आशिल्लें अस्तित्व लिपोवन कितें सादपाची आसा हें कुवाडें अजून कोणाक सुटूंक ना.
मोपा पठाराचेर कितलींशींच भुंयारां सांपडल्यांत. ताका लागून हे सुवातेर फुडारांत धोको उप्रासचो ना हाची शाश्वती कोण दितलो असोय प्रस्न आसा. सरकारान हाची जाप दिवंक जाय अशी मागणी बाया वरक हांणी पेडणेंच्या लोकांचे वतीन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
