भांगरभूंय | प्रतिनिधी
पणजी: गोंयांत देड दिसांच्या गणपतीचें काल (बिरेस्तारा) रातीं भक्तीमय वातावरणांत विसर्जन केलें. लोकांनी भक्तीमय तशेंच भावूक वातावरणांत गणपती बाप्पाक निरोप दिलो. पणजे शारांत सांजवेळा 6 वरांचेर लोकांनी गणपतीच्यो मुर्ती विसर्जना खातीर भायर काडिल्ल्यो. मिरामार दर्यादेगेर तशेंच सांता क्रुच चार खांब्या कडेन गणपतीचें विसर्जन केलें.
फाटलीं दोन वर्सा कोरोनाक लागून गणपती व्हड दबाज्यान मनोवंक मेळ्ळो ना. ह्या वेळार मात भक्तीमय वातावरणांत गणपती उत्सव मनयतात. गोंयांत देड दिसांच्या गणपतीचें विसर्जन वेगळ्यावेगळ्या सुवातींनी व्हड दबाज्यान केलें.
भजन, दिंडी, मिरवणूक बी काडून कांय कडेन गणपतीचें विसर्जन केलें. गोंयांत देड दीस, पांच दीस, सात दीस, णव दीस तशेंच 11 दीस गणपती पुजतात. भौशीक गणपतींचें विसर्जन 11 दिसांनी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
