भांगरभूंय | प्रतिनिधी
शिवोली: गोंयांत चवथीचो उत्सव मनयता आसतना पुलीस येरादारी आनी सुवेवस्था राखपा खातीर वावरत आसतात. हें काम करीत आसतना खूबशा पुलीस कर्मचाऱ्यांच्या नशिबांत कुटुंबां बरोबर उत्सव मनोवप शक्य जायना.
खंयचोय उत्सव आसता तेन्ना पुलीस, बंदोबस्ता खातीर जाय आसता. म्हत्वाचे उत्सव आसले की व्हड संख्येन पुलीस बळ कार्यरत आसता. सगले जेन्ना उत्सव मनयतात तेन्ना आपूणय आपल्या कुटुंबा सयत उत्सव मनोवचो अशें पुलिसांक दिसप सहाजिकूच आसा. पूण तांच्या नशिबांत ते नासताच.
इतले बलिदान करून लेगीत खूबशे फावटी कांय लोक पुलिसां मुखारूच वाद घालतात. अशे अवस्थेंत संयम सांबाळून पुलिसांक काम करचें पडटा. कांय पुलीस जाल्यार कुटुंबां पसून कितलेशेच किलो मिटर पयस आसतात. अशा वेळार ड्युटी पयली अशें मानून काम करचें पडटा.
बंदोबस्ताक आशिल्ल्या पुलिसां मुखार वाद घालपी खूब जाण आसतात. अशा लोकांनी समाजीक जापसालदारकी वळखून वावुरचें. पुलिसांच्या घरांतूय चवथ आसता. ताका लेगीत आपल्या कुटुंबां सयत चवथीक रावचें अशें सहाजिकूच दिसता. इत्सा आसून लेगीत तशें करूंक मेळना अशें आसगांवचे सरपंच हनुमंत नायक हांणी सांगलें.
नोकरेंत आसतना केन्नाच कुटुंबा बरोबर उत्सव मनोवपाची संद मेळ्ळी ना. उत्सव मनयले उपरांतूच सुटी मेळटाली. सेवेंतल्यान निवृत्त जाले उपरांत खऱ्या अर्थान आतां कुटुंबां बरोबर उत्सव मनोवपाची संद मेळटा अशें निवृत्त पुलीस उपनिरिक्षक प्रताप देसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
