भांगरभूंय | प्रतिनिधी
देशांतल्या १.१९ लाख शाळांनी वीज ना; नीती आयोगाचो अहवाल जाहीर
नवी दिल्ली: निती आयोगान हालींच जाहीर केल्ल्या अहवाला प्रमाण देशांत शिक्षकांच्या उणावांत बिहार पयल्या नंबराचेर आसा. अहवाला प्रमाण बिहारांत २.०८ लाख प्राथमीक, ३६,०३५ माध्यमीक आनी ३३,०३५ उच्च माध्यमीक शिक्षकांचीं पदां रितीं आसात. म्हणल्यार सुमार २,७७,०७० पदां रितीं आसात.
बिहारांत शिक्षक भरती करपाचे मागणे खातीर निशेध चालू आसतना हो अहवाल जाहीर जाला. ८ मे तारखेर BPSC TRE-4 अधिसुचनेचे मागणे खातीर निदर्शनां करपी उमेदवारांचेर लाठीचार्ज जालो, सुमार ५०० निदर्शकांक ताब्यांत घेतले. ४ जाणांक अटक केली.
बिहार सोडल्यार झारखंड, मध्य प्रदेश ह्या राज्यांनीय मुळाव्या, माध्यमीक आनी उच्च माध्यमीक शिक्षकां खातीर रित्यो सुवातो आसात. नीती आयोगाच्या अहवालांतल्यान ११ म्हत्वाचे इनसाइट्स :
नीती आयोगान ७ मे दिसा ‘भारतांतली शाळा शिक्षण पद्दत’ नांवाचो अहवाल जाहीर केला. ह्या अहवालांत फाटल्या १० वर्सांत भारतांतल्या शाळा शिक्षण वेवस्थेचें पुराय चित्र सादर केलां.
1. दर १० विद्यार्थ्यां मदले ४ विद्यार्थी उच्च माध्यमीक शिक्षणांतल्यान भायर सरतात
सद्याची शाळा शिक्षण पद्दत सरळ पिरामिडा सारकी आसा. तातूंत मुळाव्यो शाळा खूब आसात, पूण ग्रेड वाडत वता तसो शाळांचो आंकडो उणो जाता.
देशांत मुळाव्या पांवड्यार ९०.९% सकल नोंदणी प्रमाण (जीईआर) आसा, म्हळ्यार चडशीं भुरगीं सुरवातीच्या ग्रेडांत शाळेंत पावतात, पूण माध्यमीक पांवड्यार पावतकच हो आंकडो ७८.७% मेरेन देंवता. उच्च माध्यमीक पांवड्यार तो आनीक देंवून फकत ५८.४% मेरेन पावता. हाचो अर्थ दर धा भुरग्यां मदलीं सुमार ४ भुरगीं उच्च माध्यमीक पांवड्यार पावचे पयलीं शाळा सोडटात.
अहवाला प्रमाण फकत ५.४% शाळा अश्यो आसात जंय भुरगीं पयली ते १२वी मेरेन सेगीत शिक्षण घेवपाक शकता. उरिल्ल्या चडशा भुरग्यांक मदीं शाळा बदलची पडटा. भुरग्यांक शिकप सोडपाचेंय हें एक मुखेल कारण आसा.
प्राथमीक पांवड्यार शिक्षण सोडपाचें प्रमाण ०.३%, वयल्या प्राथमीक पांवड्यार ३.५% आनी माध्यमीक पांवड्यार ११.५% आसा.
अहवाला प्रमाण अस्तंत बंगालांत सगळ्यांत चड शिक्षण सोडपाचें प्रमाण २०% नोंद जालां. ताचे उपरांत अरुणाचल प्रदेश आनी कर्नाटक १८.३ – १८.३% जाल्यार आसामांत माध्यमीक पांवड्यार १७.५% शिकप सोडपाचें प्रमाण आसा.
२. १.१९ लाख शाळांनी वीज ना, १४,५०५ शाळांनी पिवपाचें उदक ना
अहवाला प्रमाण युडीएसई+ २०२४- २५ च्या आंकडेवारी प्रमाण देशांतल्या १.१९ लाख शाळांनी अजूनय योग्य वीज सुविधा ना. उदक आनी नितळसाण सुविधांचीय स्थिती सगळेकडेन सारकी ना.
पूण २०१४ वर्सा जंय ९६.५% शाळांनी पिवपाच्या उदकाची सुविधा आशिल्ली, ती २०२५ मेरेन ९९% मेरेन वाडली. अशें आसून लेगीत अजूनय १४,५०५ शाळा आसात जंय पिवपाच्या उदकाची योग्य वेवस्था ना. जाल्यार सुमार ५९,८२९ शाळांनी हात धुवपाची सुविधा लेगीत नाशिल्ल्यान भुरग्यांचे भलायकेचेर आनी नितळसाणेचेर परिणाम जाता.
अहवाला प्रमाण सुमार ५०% सरकारी माध्यमीक शाळा विज्ञान प्रयोगशाळा नासतना चलतात. शाळांनी इंटरनेटाचो वापर फाटल्या कांय वर्सांत आठ पटींनी वाडून ६३.५% जाला. अशें आसून लेगीत एक तृतीयांश शाळांनी अजूनय इंटरनॅट जोडणी ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
