भांगरभूंय | प्रतिनिधी
पणजी: वाळपयच्या कम्युनिटी हेल्थ सेंटरांत जाल्ल्या कथीत वैजकी निश्काळजीपणाक लागून आपल्या पांयांची हालचाल वगडायिल्ल्या सत्तारीच्या ११ वर्सांच्या भुरग्याच्या कुटुंबियांक, भलायकी मंत्री विश्वजीत राणे हांणी आपल्या वयक्तीक ट्रस्टा वतीन २५ लाख रुपयांची अर्थीक मजत जाहीर केल्या.
पत्रकारां कडेन उलयतना राणे हांणी हे घडणुकेक दुर्दैवी म्हळें आनी फुडें अशीं घडणूक जावंची न्हय म्हणून सरकारान सगळ्या सरकारी हॉस्पिटलांची तपासणी करपा खातीर आनी खर वैजकी नेम तायर करपाखातीर एक समिती स्थापन केल्या अशें सांगलें. वैजकी निश्काळजीपणाक लागून भुरग्याक आपलो पांय वगडावचो पडलो, हें दुर्दैवी आसा, अशें राणे हांणी सांगलें.
मंत्र्यांच्या सांगण्या प्रमाण, हे समितींत भलायकी सचिव, भलायकी सेवा संचालक, भलायकी विभागाचे सल्लागार फ्रेझेला अरौजो आनी हेर अधिकार्यांचो आसपाव आसा. सरकारी भलायकी सुविधांमदीं प्रक्रियांचो आढावो घेवप आनी उत्तरदायित्व निश्चीत करपाची जापसालदारकी हे समितीक दिल्या. आमी जाल्लें लुकसाण भरून काडपाक शकनात, पूण अशी घडणूक परत जावची न्हय, हाची आमी खात्री करूंक शकतात, अशें राणे हांणी भरपाय जाहीर करतना सांगलें.
२७ एप्रिल दिसा पडिल्ल्यान दाव्या पांयाक दुखापत जाले उपरांत ताका पयलीं वाळपयच्या कम्युनिटी हेल्थ सेंटरांत हाडिल्लो. चवकशी अहवाला प्रमाण, ड्युटीचेर आशिल्ले वैजकी अधिकारी डॉ. जयंती गावडे हांणी तांची तपासणी केल्ली.
मागीर ताका ताप, ओकारी आनी ग्लानी येवपाची लक्षणां दिशिल्ल्यान परत कॅज्युअल्टी विभागांत हाडिल्लो, थंयच्यान ताका गोंय मेडिकल कॉलेजीक रेफर केले. फुडें ताच्या पांयांच्या बोटांक सूज आयली आनी प्लास्टरांत भितर गँग्रीन जाल्ल्यान ताचो तो पांय कापचो पडलो.
चवकशी अहवालांत नमुद केल्ल्या निश्काळजीपणाक जापसालदार धरून गोंय सरकारान डॉ. यवंती गावडे हाचेर निलंबनाची कारवाय केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
