भांगरभूंय | प्रतिनिधी
पणजी : २०२६-२७ ह्या शिक्षणीक वर्सा खातीर सरकारी महाविद्यालयांनी कंत्राटी आनी व्याख्याते तत्वाचेर २६५ पदां भरतले. साहाय्यक प्राध्यापक, समुपदेशक, ग्रंथपाल पदां खातीर उमेदवारां कडल्यान अर्ज मागोवपी जायरात सध्या जारी जाल्या.
सरकारी महाविद्यालय सांखळे, सरकारी महाविद्यालय खांडोळा, सरकारी महाविद्यालय केपें, संत सोहिरोबानाथ आंबिये सरकारी महाविद्यालय विर्नोडा, सरकारी महाविद्यालय मडगांव, गृहविज्ञान महाविद्यालय कांपाल आनी संगीत महाविद्यालय आल्तिनो या महाविद्यालयांत ही पदां भरतले.
बायोटेक्नोलॉजी, बॉटनी, बिझनेस लॉ, ऑर्गेनिक केमिस्ट्री, इनऑर्गेनिक केमिस्ट्री, कॉमर्स, कॉम्प्युटर सायन्स, इकोनॉमिक्स, इलेक्ट्रॉनिक्स, इंग्लिश, हिंदी, जॉग्राफी, जीओइन्फॉर्मेटिक्स, जीओलॉजी, हिस्ट्री, कोंकणी, मराठी, मॅथेमेटिक्स, मायक्रोबायोलॉजी, मॅनेजमेंट, फिजिक्स, पॉलिटिकल सायन्स, सायकोलॉजी, सोशिओलॉजी, स्पोर्टस सायन्स, झुओलॉजी, फूड न्युट्रिशन, टेक्स्टाईल ऍण्ड क्लोथिंग, ह्युमन डेव्हलपमेंट, तबला, हार्मोनियम, वोकल, थिएटर आर्टस, लायब्ररियन, शारीरिक शिक्षण संचालक, महाविद्यालय समुपदेशक अशीं हीं पदां आसात.
कॉमर्स विशया खातीर सगल्यांत चड २८, जाल्यार कॉम्प्युटर सायन्स विशया खातीर १८ कंत्राटी पदां आसात. महाविद्यालय समुपदेशकाचीं १० पदां कंत्राटी स्वरूपाचीं आसात.
हे अर्ज उच्च शिक्षण संचालनालयाचे वेबसायटीचेर उपलब्ध आसात. ऑनलायन अर्ज सादर केले उपरांत उमेदवारांक ई-मेल येतलो. ई-मेल आयले पूर्ण भरलेले अर्ज प्रमाणपत्राचे हार्ड कॉपी सयत २६ मे मेरेन सादर करप गरजेचें. राखीवते विशीं गोंय सरकाराचे जे नेम आसात, ताची कार्यवाही जातली. मुलाखतीची तारीख आनी सुवात ई-मेला वरवीं कळयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
