भांगरभूंय | प्रतिनिधी
घुमट वादक प्रशिक्षकांची मागणी; इनामांच्या मानधनांतूय वाड करची
पणजी: फाटल्या कांय वर्सांत गोंयांत घुमट वाद्य प्रशिक्षणाच्यो कार्यावळी वाडत आसात, पूण अजून घुमट वाद्य कलेक योग्य तो दर्जो मेळिल्लो ना. घुमट वादन हें गोंयचें परंपरीक वाद्य म्हूण वळखतात. ही कला वाडोवपा खातीर कला अकादमींत खासा घुमट वाद्य प्रशिक्षण केंद्र तयार करचें, अशी मागणी गोंयांतल्या घुमट वादक प्रशिक्षकांनी केल्या.
घुमट वाद्य कला ही गोंयची वळख आसा. घुमट हें राज्य वादक म्हूण वळखत आसलें तरी योग्य तो दर्जो मेळिल्लो ना. कला अकादमींत खासा प्रशिक्षण केंद्र ना. गोंयांतले कांय प्रशिक्षक खाजगी पांवड्यार प्रशिक्षण दितात. सरकारान ही कला तिगोवन दवरपा खातीर सहकार्य करचें. तशेंच घुमट आरती सर्तींच्या इनामांच्या मानधनांतूय वाड करची अशें घुमट वादक प्रशिक्षक प्रद्युम च्यारी हांणी सांगलें.
घुमट वादनांची मंडळां वाडत आसात
आतां चवथ लागीं पाविल्ल्यान सगले कडेन घुमट आरती सर्तीचें प्रशिक्षण सुरू आसा. दादल्यां खातीर फाटलीं खूबशीं वर्सा ही घुमट आरती सर्त जायत आसा. आतां बायलां तशेंच बाल कलाकारूय हे सर्तींनी वांटेकार जातना दिसता. गोंयांत वट्ट 300 दादल्यांचे घुमट आरतीचे गट आसात. जाल्यार बायलांचे वट्ट 50 गट तयार जाल्यात. बायलांची घुमट आरती सर्त 2019 सावन सुरू जाली अशें घुमट आरती प्रशिक्षक रामकृष्ण गांवस हांणी सांगलें.
म्हाल पांवड्यार घुमट आरती
सर्तीचें आयोजन करचें
राज्य पांवड्यार घुमट आरती सर्त आयोजीत करतात. तेच प्रमाण आतां म्हाल पांवड्यार घुमट आरती सर्त आयोजीत करच्यो, जेणे करून दरेक म्हालांतल्या घुमट आरतीच्या गटांक तातूंत वांटेकार जावंक मेळटलें. गोंयांत फाटल्या कांय वर्सां सावन घुमट आरती मंडळाची संख्या वाडत आसा. पूण ते प्रमाण सर्तींचें आयोजन जायना. ताका लागून ह्या घुमट आरती गटांक आपले कलेचें प्रदर्शन करपाक वाव मेळना अशें रामकृष्ण गांवस हांणी सांगलें.
गोंयांत दादलो गट, बायलां गट भजन सर्तीं प्रमाण घुमट आरती सर्तींय जातात. फाटल्या कांय वर्सांत घुमट आरती सर्तीचें प्रशिक्षण गांवांगांवांनी वाडत आसा. खूबशीं बायलां, भुरगीं चवथीची परब लागीं येतकूच घुमट आरतीचें प्रशिक्षण घेतात. फाटल्या कांय वर्सांत घुमट आरती सर्तीचें आयोजन वाडत आसा. ताका लागून घुमट सर्त गटूय वाडत आसात. गोंयची घुमट आरती कला आतां हेर राज्यांतूय पातळत आसा. घुमट वादन आतां चवथी पयलीं मर्यादीत उरूंक नाशिल्ल्यान ती आतां केन्नाय खंयचेय कार्यावळी खातीर आयोजीत करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
