भांगरभूंय | प्रतिनिधी
ज्या- ज्या वेळार डोनाल्ड ट्रम्प हांचे आड जनमत तयार जाता वा तांची लोकप्रियता उणी जाता, त्याच वेळार तांचेर असो हल्लो जाता, हो एक अजब योगायोग म्हणचो पडटलो.
व्हायट हावसाचें वार्तांकन करपी जगभरांतल्या पत्रकारां खातीर हाॅटेल हिल्टनांत 25 एप्रीलाक अमेरिकेचे अध्यक्ष डोनाल्ड ट्रम्प हांणी स्नेहभोजनाचें आयोजन केल्लें. हे कार्यावळींत ट्रम्प हांचेर फारपेट करून तांकां जिवेशीं मारपाचो यत्न जालो. कॅलिफोर्नियांतल्या थॉमस अॅलन ह्या 31 वर्सांच्या तरणाट्यान तांचेर हो जीवघेणो हल्लो केलो. नशीबान ते ह्या हल्ल्यांतल्यान वांचले. ह्या हल्ल्याचो व्हिडिओ सोशल मिडियाचेर खूब व्हायरल जाला.
ह्या हल्ल्या उपरांत संवसारांतली सगल्यांत सुरक्षित व्यक्ती मानतात त्या अमेरिकेच्या राष्ट्राध्यक्षांचे सुरक्षा वेवस्थेंतले दोश परतून एकदां मुखार आयल्यात. ‘परतून एकदां’ म्हणपाचें कारण अशें की, ट्रम्पाचेर जाल्लो हो पयलो जीवघेणो हल्लो न्हय. हाचे पयलीं 8 फावटी अशे हल्ले जाल्यात. अर्थात दर खेपे ते ह्या हल्ल्यांतल्यान सुखरूप सुट्टात, देखून हे हल्ले डोनाल्ड ट्रम्प स्वताच घडोवन हाडटात, अशी चर्चा अमेरिकन प्रसारमाध्यमांत सध्या नेटान चलता. आपल्या जिवाचेर विरोधक कशे टपून बसल्यात, अशें घडये तांकां दाखोवपाचें आसत.
ज्या- ज्या वेळार डोनाल्ड ट्रम्प हांचे आड जनमत तयार जाता वा तांची लोकप्रियता उणी जाता, त्याच वेळार तांचेर असो हल्लो जाता, हो एक अजब योगायोग म्हणचो पडटलो.
जेन्ना ते वेंचणुकेचो प्रचार करताले, तेन्ना तांचेर पयलो हल्लो जालो. त्या वेळार वेंचणूक सर्व्हेक्षणांत ते फाटीं आशिल्ले. हल्ल्या उपरांत तांकां लोकांची व्हड प्रमाणांत सहानुभूती मेळ्ळी आनी ते व्हडा मताधिक्यान वेंचून आयले. वेंचून आयले उपरांत तांणी अशे कांय निर्णय घेतले जे जनतेक मात पसून मानवलें नात. अमेरिकन जनता तांच्या निर्णया आड रस्त्यार देवली आनी तांची लोकप्रियता उणी जाली…. बरोबर त्याच वेळार तांचेर परतून हल्लो जालो. आतां लेगीत तांची लोकप्रियता सामकी उणी जाल्या. तांणी इराणचेर हल्लो केला तो अमेरिकन लोकांक इल्लो पसून आवडूंक ना. इराणान केल्ल्या प्रतिहल्ल्याक लागून जगांत अमेरिकेक लज जाल्या. हाका लागून कोट्यांनी लोक ट्रम्प हांच्या विरोधांत रस्त्यार आयले…. आनी कांय दिसांनी ट्रम्पाचेर हो हल्लो जालो.
नेमक्या ह्याच वेळार हो हल्लो जाल्ल्यान लोक दुबाव घेतात. अमेरिकेचे राष्ट्राध्यक्ष हे वयर सांगलां ते प्रमाण, संवसारांतले सगळ्यांत शक्तिशाली मनीस. तांची सुरक्षा वेवस्था एकदम कडक आसता. अशी सुरक्षा भेदून एक हल्लेखोर थेट हॉटेलान भितर सरता आनी राष्ट्राध्यक्षांचेर हल्लो करता, हें लोकांक पचपाक जड जालां. अमेरिकन राष्ट्राध्यक्षांची सुरक्षा इतली तकलादू आसूंक शकता, हाचेर लोकांचो विस्वास ना, देखूनच ह्या हल्ल्या विशीं दुबाव व्यक्त जावंक लागला.
बदलत्या हवामानाचो फटको
बदलत्या हवामानाचो फटको सगळ्याच मळांक बसता, पूण तातूंत शेती मळाचेर ताचो परिणाम चड प्रमाणांत दिसता. आयज एप्रील सोंपता. सध्या सगले कडेन कडक वत जाणवता. चडशा शारांचें तापमान 40 अंशां वयर आसा. दिल्ली, राजस्थान राज्य, महाराष्ट्रांतल्या विदर्भांतल्या कांय वाठारांनी तर तापमान 42 ते 45 अंश सेल्सिअस नोंद जालां. जम्मू -काश्मीरा सारक्या राज्यांनीय उष्णताय वाडल्या.
तापमान वाडिल्ल्यान लोकांचे भलायकेचेर परिणाम जाता. ह्या कडक वताक लागून घुंवळ येवप, काळजाचो आताक येवप, रक्तदाब वाडप, कुडींतलें उदक उणें जावप, दोळ्यांचे विकार आनी भुरग्यांच्या नाकांतल्यान रक्त येवप, उश्माघात जावप असले विकार जातात.
तीन वर्सां फाटीं खारघर गांवांत घडिल्ली घटना अजूनय ताजी आसा. उश्माघाताक लागून महाराष्ट्र भूषण पुरस्कार सुवाळ्यांत 15 श्री सेवेकऱ्यांक आपलो जीव वगडावचो पडिल्लो. दोतोरांनी ह्या वतांत चडांत चड उदक आनी फळांचो रोस पियेवपाचो सल्लो दिला. तशेंच दनपरां 11 ते 4 वरां मजगतीं, घरा भायर वचप टाळचें, अशेंय सांगलां. कांय लोकांक कारण नासतना टायमपासाक भोंवपाची संवय आसता. थोडे शाॅपां, विंडो शाॅपिंग करपाक भोंवतात. हरकत ना. पूण तें सकाळीं 10 वा सांजवेळा 5 जाल्या उपरांत करचें. सामकें गरजेचेंच आसा जाल्यार मफलर, तोपी, सत्री, गाॅगल, उदकाची बाटली बी घेवन भायर सरचें. कारण गर्मी वाडल्या, हें रोखडेंच लक्षांत येता.
एक वटेन कडक वत आसतना, वादळी वाऱ्या सांगाता आडोळो पावस पडपाक लागला. ह्या पावसामुळे शेताचें लुकसाण जाता. वर्सभराची मेहनत खिणांत इबाडटा. ऐन गिमांत पावस पडप ही आतां नित्याचीच गजाल जाल्या. देशांतल्या एका भागांत कडक वत तर दुसऱ्या भागांत उटंगाराचो पावस, अशी विशम परिस्थिती आसा. गेल्या कांय वर्सांत झाडांची आनी रानांची व्हड प्रमाणांत कत्तल जाल्या, काँक्रिटीकरण वाडलां आनी शारां शिमिटचीं रानां जाल्यांत, पर्यावरणाचो नाश जाल्ल्यान सैमाचें चक्र बदललां. पावस आतां फकत पावसाळ्यांतच पडना, तर तो वर्सभर खंय ना खंय पडत आसता. डिसेंबरांत पसून पावस पडला.
पावसाळ्यांत दोन-दोन म्हयने पावस पडना आनी केन्ना तरी चार दिसांतच दोन म्हयन्यांचो सरासरी पावस पडून वता. हाका लागून शेतकार गोंधळांत आसा. आमी प्लाॅट करून राज्या भायल्या लोकांक विकीत सुटल्यात. गोंया सारक्या राज्यांत तर जागो सोंपिल्ल्यान आतां दोंगर कापप नेटान सुरू आसा. शेतां, दलदलीचे वाठार पुरोवन थंय काँक्रिटाचीं घरां उबारल्यांत. हाचो सैमीक फटको बसचो न्हय हे खातीर मनशान निसर्गाचेर केल्लें आक्रमण आतां थांबोवपाक जाय. जर आमी सैमाच्या नेमां आड गेले, तर ताचें व्हड मोल फुडले पिळगेक फारीक करचें पडटलें. ताची सुरवात आतां जाल्या.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
