बागा दुचाकीं मदीं अपघात: दोगांक मरण
भांगरभूंय | प्रतिनिधी
म्हापशें: बागा, कळंगूटे दोन दुचाकींचो एकामेका मुखार धपको बसून अपघात जालो. ह्या अपघातांत मूळ गुजरातचो अनिल उग्रेजिया (27, रा. कांदोळी) आनी अरूण गोडीचा (26, रा. गिरी) ह्या दोगां तरणाट्यांक मरण आयलें. जाल्यार ठाणे मुंबयचो शशांक जाधव (36) आनी श्रीजी नायर (22) हे दोगूय जखमी जाले. अपघाताक कारण थारिल्लो दुचाकी चालक शशांक हाचे आड कळंगूट पुलिसांनी सदोश मनीसवधाचो गुन्यांव दाखल केला.
हो अपघात आयतार 26 एप्रील दिसा फांतोडेर 5.15 वरांच्या सुमाराक बागा हांगासरल्या रॉनील हॉटेला कुशीक घडलो. मयत अरूण गोडीचा हो मयत अनील उग्रेजिया हाचे सयत जीए 03 एक्यू 6602 क्रमांकाचे दुचाकी वेल्यान कळंगूट सावन बागाचे दिशेन वताले. जाल्यार जीए 07 एजे 3872 क्रमांकाचे स्कुटरी वेल्यान जाधव आनी नायर हे दोगूय विरुद्ध दिशेन वताले. घडणूक थळार दुबावीत शशांक जाधव हाणें मुखा वेल्या मयतांचे दुचाकीक नेटाचो धपको दिलो.
ह्या अपघातांत चौगूय जाण जखमी जाले. जखमीं मदल्या गंभीर जखमी जाल्लो अनील हाका पुलीस रॉबर्ट जीपींतल्यान कांदोळे भलायकी केंद्रांत दाखल केलो तेन्ना दोतोरांनी ताका मरण आयिल्ल्याचें जाहीर केलें. जाल्यार हेर तिगाय जखमींक एम्बुलन्सींतल्यान गोमॅकाँत हालयले. तातूंतलो अरुण हाका दनपारां उसरां उपचारा मजगतीं मरण आयलें. जाल्यार शशांक आनी श्रीजी ह्या जखमींक उपचारा उपरांत डिस्चार्ज दिलो.
कळंगूट पुलीस उपनिरिक्षक स्नेहल मळीक आनी सहाय्यक उपनिरिक्षक रवी गांवस हांणी ह्या अपघाताचो पंचनामो केलो. तशेंच पुलिसांनी अपघाताक कारण थारिल्लो दुचाकी चालक शशांक जाधव हाचे आड भारतीय न्याय संहिता तशेंच मोटार वाहन कायद्या वरवीं सदोश मनीसवधाचो गुन्यांव दाखल केला आनी फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
