भांगरभूंय | प्रतिनिधी
पणजी: धावेचो निकाल जाहीर जाल्ल्यान उच्च माध्यमीक विद्यालयांत यत्ता इकरावी खातीरची प्रवेश प्रक्रिया आयज सावन सुरू जातली. म्हाविद्यालयीन प्रवेशा भशेन समान प्रवेश प्रक्रिया नाशिल्ल्यान दरेका उच्च माध्यमीक विद्यालयांतली प्रवेशा खातीरच्यो तारखो वेगळ्यो आसतल्यो.
धावेचो निकाल आयतारा जाहीर जालो. आयज सोमार सावन प्रवेश अर्ज तशेंच म्हायती पुस्तिका उपलब्ध करतले अशी म्हायती प्राचार्य मंचाचे अध्यक्ष उमेश नायक हांणी दिली. विद्यार्थ्यांक गूण पत्रिका तशेच लिविंग सर्टीफिकेट मेळपाचे आसात. गुणपत्रिका आनी लिविंग सर्टीफिकेट मेळपाक थोडो वेळ लागता. हाका लागून आयज सावन प्रवेश दिवप शक्य जावचें ना. मात प्रक्रिया सुरू जातली. सुचोवणी फलकाचेर नोटीस दिवन अर्ज व्हरपा सयत त्यो सादर करपाची तारीख जाहीर करची पडटली. शुल्क तशेंच हेर आवश्यक गजाली निश्चीत जाले उपरांत प्रवेश दिवप शक्य जातलें.
धावी जाले उपरांत कला, वाणीज्य, विज्ञान आनी वेवसायीक ह्या चार फांट्यांनी चडशे विद्यार्थी प्रवेश घेतात. कांय विद्यार्थी आयटीआय तशेंच पॉलिटेक्निकांत प्रवेश घेतात. वेवस्थापनाच्या धोरणा प्रमाण शुल्क तशेंच उच्च माध्यमीक विद्यालयातली प्रवेश प्रक्रिया थारता. अर्ज घेवन गुणवत्ता वळेरी जाहीर करून ते प्रमाण चडशी उच्च माध्यमीक विद्यालयां प्रवेश दितात. कांय उच्च माध्यमीक विद्यालयांनी पयली येता ताका प्रवेश अशे तरेन प्रवेश दितात. जागे भरले काय प्रवेश दिवप बंद जाता.
अंदूं धावेचो निकाल विक्रमी लागला. हाका लागून इकरावी प्रवेशा खातीर विद्यार्थ्यांची गर्दी जातली. मात निकाल फाटल्या वर्सा परस मातसो उणो आसा. हाका लागून सगल्या विद्यार्थ्यांक प्रवेश मेळटलो, अशी वेवस्था जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
