भांगरभूंय | प्रतिनिधी
निकाल 94.51 टक्के
पणजी: धावेच्या परिक्षेंत चल्या परस चलयांची कामगिरी चड बरी जाल्या. चलयांचो निकाल 96.51 टक्के जाल्यार चल्यांचो निकाल 94.37 टक्के लागला. परिक्षेक बशिल्ल्या 20618 विद्यार्थ्यां पैकीं 19486 विद्यार्थी पास जाल्ल्यान सरासरी निकाल 94.51 टक्के लागला. फाटल्या वर्सा परस हो निकाल मातसो उणो आसा. फाटल्या वर्सा 2024 – 25त निकाल 95.35 टक्के लागिल्लो.
शालान्त मंडळाचे अध्यक्ष भगिरथ शेटये हांणी पर्वरे पत्रकार परिशद घेवन निकाल जाहीर केलो. ह्या वेळार मंडळाचे सचीव विद्यादत्त नायक, उपसचीव (आयटी) भारत चोपडे, उपसचीव रिमा मडगांवकार हाजीर आशिल्ल्यो.
शालान्त मंडळान 13 मार्च 2026 ते 9 एप्रील 2026 मेरेन 32 केंद्रांनी धावेची परिक्षा घेतिल्ली. हे परिक्षेचो निकाल जाहीर जाला. निकाल results.gbshsegoa.net आनी digilocker app GOI हांगा उपलब्ध आसा. विद्यार्थ्यांक विद्यालयाच्या लॉगिनाचेर सविस्तर निकाल उपलब्ध जातलो.
परिक्षेक बशिल्ल्या 10813 भुरग्यां पैकीं 10072 जाण पास जालें. परिक्षेक बशिल्ल्या 9805 चलयांं पैकीं 9414 चलयो पास जाल्यो.
मजगतीं, परिक्षेक बशिल्ल्या 20618 विद्यार्थ्यां पैकीं 19486 विद्यार्थी पास जाले. नीडस इम्प्रूवमेंट गटांत 594 विद्यार्थी आसा, एटीकेटी 417 जाल्यार 191 विद्यार्थ्यांचो निकाल राखीव दवरला. तशेंच सर्वसामान्य गटांतली उत्तिर्णाची टक्केवारी 95.17 टक्के, ओबीसी 98.36 टक्के, एससी 94.38 टक्के, एसटी 97.38 टक्के आसा.
……………………..
बॉक्स
फाटल्या 5 वर्सातल्या निकालाची टक्केवारी
2021 – 99.72 टक्के
2022 – 92.75 टक्के
2023 – 96.64 टक्के
2024 – 92.38 टक्के
2025 – 95.35 टक्के
……………………..
बॉक्स
178 विद्यालयांचो निकाल 100 टक्के
गोंयांत वट्ट 178 विद्यालयांचो निकाल 100 टक्के लागला. हातूंत सरकारी विद्यालयां 34, अनुदानीत विद्यालयां 137 जाल्यार विनाअनुदानीत 7 विद्यालयांचो आस्पाव आसा.
म्हालवार 100 टक्के निकाल लागिल्ल्या विद्यालयांचो आंकडो असो :
बार्देस – 17, दिवचल – 14, काणकोण – 11, धारबांदोडें – 9, केपें – 11, मुरगांव – 10, पेडणें – 22, फोंडें – 29, साश्ट – 22, सांगें – 4, सत्तरी – 6 आनी तिसवाडी – 23.
……………………..
विशया प्रमाण सगल्यांत चड गूण आनी निकाल
इंग्लीश – 99.64 टक्के 98 गूण
हिंदी – 97.87 टक्के 98 गूण
मराठी – 98.38 टक्के 98 गूण
कोंकणी – 95.34 टक्के 99 गूण
उर्दू – 99.16 टक्के 99 गूण
संस्कृत – 100 टक्के 98 गूण
अरेबीक – 100 टक्के 98 गूण
फ्रेंच – 100 टक्के 99 गूण
पुर्तुगीज – 100 टक्के 99 गूण
स्टर्ण्डड गणीत – 99.74 टक्के 100 गूण
बेसीक गणीत – 91.44 टक्के 100 गूण
विज्ञान – 94.74 टक्के 100 गूण
समाजीक विज्ञान – 94.48 टक्के 100 गूण
इंडियन सायन लँग्वेज 86.79 टक्के 78 गूण
म्हालवार धावेच्या निकालाची टक्केवारी
बार्देस – 95.54 टक्के, दिवचल – 96.27 टक्के, काणकोण – 97.49 टक्के, धारबांदोडें – 98.47 टक्के, केपें- 94.12 टक्के, मुरगांव – 91.70 टक्के, पेडणें – 98.35 टक्के, साश्ट – 94.35 टक्के, सत्तरी – 93.88 टक्के, तिसवाडी – 95.54 टक्के, फोंडें – 95.78 टक्के, सांगें – 97.29 टक्के
दिव्यांग विद्यार्थ्यांचो निकाल 98.73 टक्के
संजय सेंटर, पर्वरी, लोकविश्वास प्रतिश्ठान तशेंच हेर विद्यालयांनी मेळून 550 दिव्यांग विद्यार्थ्यांनी परिक्षा दिल्ली. हे पैकीं 543 विद्यार्थी पास जाले. ही टक्केवारी 98.73 टक्के आसा.
एटीकेटी तशेंच कोणे परिक्षा दिवंक ना त्या विद्यार्थ्यां खातीर 6 जून 2026 सावन पुरवणी परिक्षा जातली. पुरवणी परिक्षेचे तारखेंत बदल जावप शक्य आसा.
निकाला विशीं कागाळ वा हरकतींचेर विचार करपा खातीर दरेका विद्यालयाक तीन वांगड्यांची समिती स्थापन करपाक सांगल्या. हातूंतलो एक वांगडी बायल शिक्षक आसतली. समुपदेशकाचो लेगीत आस्पाव करपाची मेकळीक आसा.
उत्तरपत्रिकेच्या फोटोकॉपी सयत व्हेरिफिकेशन – एकग विशयाक 350 रु. शुक्क – 2 मे 2026 मेरेन अर्ज करपाची तारीख.
उत्तरपत्रिकेचे रिवॅलुएशन- एका विशयाक 700 रू. शुक्क – 11 मे 2026 मेरेन अर्ज करपाची तारीख
गैरहाजेरेत वेरिफीकेशन – एके विशयाक 100 रू. शुक्क – 2 मे 2026 मेरेन अर्ज करपाची तारीख
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
