भांगरभूंय | प्रतिनिधी
पंचायत कर्मचाऱ्यांक सातवो वेतन आयोग जातलो लागू
पणजी: टॅक्सी वेवसायांत पारदर्शकताय हाडपा सयत समान दर लागू करपा खातीर टॅक्सीकारांक डिजिटल प्लॅटफॉर्माचेर येवचेंच पडटलें. आमदारांनी टॅक्सीकारां कडेन चर्चा करून एकमत घडोवन हाडपाक मजत करची, अशें येरादारी मंत्री मॉवीन गुदिन्हो हांणी सांगलें. पंचायत कर्मचाऱ्यां खातीर सातवो वेतन आयोग लागू करपाची प्रक्रिया सुरू आसा. प्रस्तावाक प्रशासकी मान्यताय मेळ्ळ्या आनी अर्थीक मान्यताय मेळ्ळे उपरांत सातवो वेतन आयोग लागू जातलो अशें पंचायत मंत्री मॉवीन गुदिन्हो हांणी सांगलें.
पंचायत, येरादारी, उद्देग खात्याच्या मागण्यांचे चर्चेक जाप दितना तांणी ही म्हायती दिली.
केंद्रान पंचायतीचो निधी 65 टक्क्यान उणो केला. तरी लेगीत उपलब्ध सुविधांचो योग्य तरेन वापर करून पंचायती बरी सेवा दिवपाचो यत्न करतात. पंचायतींनी ऑनलायन सेवा दिवपा खातीर कंत्राटी पद्दतीचेर एका अभियंत्याची नेमणूक जातली. 65 पंचायतींनी ऑनलायन सेवा दिवप सुरू जालां. स्वच्छ भारत अभियाना खाला नागवा, चिखली, बोगमोळो, हरवळें, कारापूर, नावेली, पैंगीण, कोरगांव, शिरोडें, शेल्डें, असोल्डें, सांवड्डें ह्या पंचायतींनी कोयर एकठांय करपाचो वावर बरे भशेन सुरू आसा. तशेच 109 पंचायतींनी कोयर सांठोवन दवरपा खातीर एमआरएफ सोय उपलब्ध आसा. 75 पंचायतींनी तात्पुरती एमआरएफ सोय उपलब्ध आसा.
वित्त आयोगान दिल्ल्या निधीचो योग्य प्रकारान विनीयोग जावपा खातीर पंचायतींनी खासा फांटो तयार जातलो. दीनदयाळ मुळाव्यो सुविधा येवजणे खाला अंदूं तरेकवार पंचायतींनी 76 प्रकल्प पुराय जातले.
राजकी चेपणाक लागून बदली आदेश फाटी घेवचे पडले
सरपंचा कडेन अरेरावी करपी 10 ते 11 कर्मचार्यांच्या बदलीचे आदेश जारी जाल्ले. सहकारी आमदारांची शिफारस तशेंच राजकी चेपणाक लागून ते फाटी घेवचे पडले. गोंय हें ल्हान राज्य आशिल्ल्यान सगल्यांचें आयकुचें पडटा, अशें मंत्री मॉवीन गुदिन्हो हांणी सांंगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
