भांगरभूंय | प्रतिनिधी
नवे पिळगेन विज्ञान, तंत्रज्ञानाचेर भर दिवपाक जाय, अशें कांय बुद्धीजिवी म्हणटात. गजाल सामकी खरी. विज्ञानाक लागून विचार प्रगल्भ जातात. उमळशीक वाडटा, तर्कशक्त, निर्णय घेवपाची तांक वाडटा. प्रस्न विचारपाची संवय लागता. प्रयोगांतल्यान शिकपाची संवय लागता. अपेसाचो भंय दिसना. संवसारांतले बदल समजून घेवपाक मेळटात. व्यक्तीमत्व सुदारता. विज्ञान शिरंतरांनी खेळोवपी तरणाटो भविश्य घडयता, तर विज्ञान टाळपी भविश्याचेर अवलंबून रावता. तंत्रज्ञान शिकपी पिळगी तर फाल्यांची दिशा थारायता. मात हें सगलें जमता सत्याच्या मार्गार चलप्यांक. आतां विज्ञानांतूय फटींगपणां रिगल्यांत. हुशार भुरग्यांनीच तीं केल्यांत काय कोणा शिक्षकान तें अजून स्पश्ट जावंक ना. मात भारतीय विज्ञान मळाक लजेक घालपी अशी ही गजाल म्हणची पडटली. दिल्लींत सुरू आशिल्ल्या एआय परिशदेच्या एक्स्पो विभागांतल्यान नोयडाच्या गलगोटियास विद्यापिठाक भायर काडलां. कारण जालें तांचोच व्हिडियो. एका रोबोटीक सुण्यांचो आमी सोद लायला, असो दावो शिक्षक आनी विद्यार्थ्यान केल्लो तातूंत दिसता. ‘ताचें नांव ओरियन. तो आमच्या विद्यापिठान विकसीत केला. मशिनाचेर नदर दवरपाचें, देखरेख करपाचें काम तो करता. कॅम्पसांत खंयूय भोंवपाक शकता,’ अशें प्राध्यापिका, विद्यार्थी सांगतात. ताचेर 350 कोटी रुपया खर्च आयला, असोय दावा जाला. उपरांत बऱ्याच तंत्रज्ञान जाणकारांनी हो सुणो चीनी कंपनी युनिट्रीचो ‘Go2’ माॅडेल आशिल्ल्याचो दावो केलो. ताचें मोल 2 ते 3 लाख रुपया. काय फुडाऱ्यांनीय रोबो सु्ण्याची तुस्त करून ‘प्रधानमंत्री मोदी हांचे दूरदिश्टीचीं हीं फळां’ अशेंय म्हणलें. मात, सत्य भायर येतकच विद्यापिठान, ‘आमी तो फक्त विद्यार्थ्यांक उर्बा, स्फूर्त येवची म्हूण हाडला. आमी रोखडेंच असलें तंत्रज्ञान विकसीत करतले’, अशेंय सांगलें.
हो चीनी बनावटीचो सुणो सोंपणां चडप, खडबडीत रस्त्यां वयल्यान चलप, आडमेळीं वळखप असलीं जायतीं कामां तोंडी आदेश दिले काय करता. तंत्रीक संशोधन आनी शिक्षण मळाचेर ताका मजती खातीर वापरतात. ही कंपनी कारखाने आनी हेर मळां खातीर सवाय भितर रोबो तयार करता. हो रोबो विद्यापिठान तयार करूंक ना, हें कळटकच आयोजकांनी परिशदेंतलें तांचें पॅव्हिलियन रिकामी करपाक लायलें. तातूंत भितर गरज नासतना प्रधानमंत्री मोदी हांचें नांव ओडिल्ल्यान हो सगलोच विशय आतां राष्ट्रीय चर्चेक कारण थारला. कारण, एकदां कितेंय सोशल मिडियाचेर पावलें आनी ताका राजकी स्पर्श जालो काय कितें जाता, तें कोणूच सांगपाक शकना. श्रेय घेवपा खातीर विज्ञान, तंत्रज्ञानाच्या मळार हे असले नाका जाल्ले दावे करपाची गरज नाशिल्ली. चीनांतल्यान शिकपा खातीर हाडला, अशें सांगल्यार कोण गोळाक लावचो नाशिल्लो.
हेरांची कला, साहित्य, उत्पादनांची नक्कल करून तीं स्वताचीं म्हणून विकपाचे प्रकार पयलीं सावन जायत आयल्यात. सिनेमाची कथा, संगीत जायते फावटी चोरयेचें तें कळटा. उपकरणांचे उत्पादक पेटंट घेतात. अॅपल आनी सॅमसंग कंपनीचें डिझायन आनी साॅफ्टवॅर झूज गाजिल्लें. व्हॅक्यूम क्लिनराच्या सायक्लोन तंत्रज्ञानाची नक्कल जाल्ली. उत्पादनांत बौद्धीक तांक खूब म्हत्वाची आसता. तंत्रज्ञानांत काॅपी रातयां जाता, ताका लागून पेटंट, ट्रेडमार्क, काॅपीरायट, ब्रँडाची वळख सांबाळची पडटा. कंपनीक गुणवत्ता, सेवा, गिरायकांचो विस्वास ह्या सगल्यांचेर भर दिवचो पडटा. अपडेट जावपाचो वेग नक्कल करप्यां परस चड जाय. सरकारानूय कोण बुद्धीची चोरी करचो ना, हॅक करचो ना, हे खातीर कायदे कडक करपाक जाय.
गलगोटियास विद्यापिठाच्या विद्यार्थ्यांनी निरशेवचें न्हय. तांणी
फुडल्या वर्स- देड वर्सा भितर चीनाच्या सुण्या परस दर्जेदार, बरें काम करपी रोबो सुणो तयार करचो. आत्मविस्वासान यत्न केल्यार कसलीच गजाल अशक्य न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
