भांगरभूंय | प्रतिनिधी
म्हापशेंः सावड्डें-कुडचडें 2022त घडिल्ल्या मनीषा नायक खून प्रकरणांतलो दुबावीत दत्तक घेतिल्लो पूत प्रथमेश नायक हाका उच्च न्यायालयान सशर्त जामीनाचेर सोडलो.
अर्जदार आरोपी फाटलीं चार वर्सां बंदखणींत आशिल्ल्यो ताका लागून प्रकरणाची सुनावणी अजून पुराय जावंक ना. आनीक 8 साक्षीदारांची तपासणी जावपाची आसा, जाका वर्सा परस चड वेळ लागपाची शक्यताय आसा अशें निरीक्षण नोंद करुन न्यायाधीश डॉ. नीला गोखले हांणी 50 हजार हमी रक्कम आनी तेच रक्कमेच्या हमीदाराच्या हमी प्रमाण हो जामीन अर्ज मंजूर केला.
खटल्याच्या दर एका सुनावणेक हाजीर रावप, दर म्हयन्याच्या पयल्या सोमारा पुलीस स्टेशनांत हजेरी लावप, न्यायालयाची परवानगी नासतना देशांतल्यान भायर वचप ना, साक्षीदारांच्या पुराव्यांत हस्तक्षेप करप ना वा तांकां हांयस दाखोवप ना आनी हेर अटी न्यायालयान घाल्यात.
मजगतीं, सावड्डें 28 मार्च 2022त लोखणाचे सळयेन हल्लो करुन मनीषा नायकाचो खून केल्लो. ह्या प्रकरणांत कुडचडें पुलिसांनी मनीषाचो दत्तक पूत प्रथमेश हाका खूनाच्या आरोपांत अटक केल्ली आनी ताचे नेण्टे इश्टणीक ताब्यांत घेतिल्ली.
प्रथमेश नायक हांणी घडणुकेच्या आदल्या दिसा आपल्या इश्टिणी कडेन लग्न जावपाक विरोध केल्यार आपल्या आवय-बापायक मारून उडोवपाची धमकी दिल्ली. ताणें आपल्या बॅगेतली सुरीय तांकां दाखयल्ली. पुलिसांनी अटक केल्या उपरांत आरोपी बंदखणींत आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
