भांगरभूंय | प्रतिनिधी
नवी दिल्ली, खबरां संस्थाः भारतांत अपहरण करपाच्यो आनी उखलून व्हरपाच्या घडणुकांनी अनपेक्षितपणान वाड जाल्या. हालींच भोपाळांतल्या आयएएस अकादेमीच्या संचालकाचे अपहरण आनी 1.89 कोटी रुपया खंडणीच्या प्रकरणां लागून देशांतल्या सुरक्षा वेवस्थेचेर प्रस्न उप्रासल्यात.
अधिकृत आंकडेवारीच्या विश्लेशणा प्रमाण 1953 ते 2024 ह्या काळांत देशांत वट्ट 20 लाखां परस चड अशो केशी नोंद जाल्यात. धक्को दिवपी गजाल म्हळ्यार ह्या सात दशकांतल्या वट्ट केशींतल्या 54% (11.24 लाख) केशी फकत फाटल्या 11 वर्सांत (2013-2024) नोंद जाल्यात.
खंडणी खातीर फकत 0.7% अपहरण
आंकडेवारी प्रमाण, 1953-62 वर्सा वट्ट गुन्यांवांत अपहरणाचो वांटो 1.01% आशिल्लो, जो 2013-24 वर्सा 3.04% मेरेन वाडला. अपहरणा फाटलीं व्हड कारणां म्हळ्यार लग्ना खातीर बायलांचें अपहरण आनी सामान्य अपहरण ही आसात.
खंडणी खातीर जावपी संघटीत अपहरणाचे प्रमाण वट्ट प्रकरणांतले फकत 0.7% आसा. राज्यांची तुळा केल्यार उत्तर प्रदेश आनी महाराष्ट्रा उपरांत बिहार तिसऱ्या क्रमांकाचेर आशिल्लो, पूण 2024 वर्साच्या आंकडेवारी प्रमाण पयल्या स राज्यांत बिहाराची नोंद सकयल्या क्रमांकाचेर आसा.
सायबर गुन्यांवांत अश्लील सामुग्री, 90% भुरग्यां आड
भारतांत भुरग्यां आड जाल्ल्या सायबर गुन्यांवांच्या 10 प्रकरणांतल्या सुमार 9 प्रकरणांनी भुरग्यां कडेन संबंदीत लैंगीक नदरेन अश्लील सामुग्री प्रकाशित वा प्रसारीत जाल्ली अशें दिसून आयलां.
एनसीआरबीच्या ताज्या आंकडेवारी प्रमाण, देशांत वट्ट गुन्यांव उणे जाले आसले तरी, भुरग्यां आड गुन्यांव सेगीत वाडत आसात. 2024 वर्सा भुरग्यां आड गुन्यांवांच्यो 1,87,702 केशी नोंद जाल्ल्यो. 2023 वर्साच्या 1,77,335 प्रकरणां परस 5.8% चड आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
