भांगरभूंय | प्रतिनिधी
नवी दिल्ली, खबरां संस्थाः केंद्र सरकारान भारतीय सैन्याचे संरचनेत म्हत्वाचे बदल केल्यात. लेफ्टनंट जनरल एन. एस. राजा सुब्रमणी हांची देशाचे नवे ‘चीफ ऑफ डिफेंस स्टाफ’ (CDS) म्हणून नेमणूक केल्या. सध्याचे सीडीएस जनरल अनिल चौहान 30 मे 2026 दिसा निवृत्त जावपाचे आसात. उपरांत सुब्रमणी पदभार हातांत घेतले. सुब्रमणी हांचेर ह्या तिनूय सेवांचें समन्वय करपाची आनी लश्करी वेव्हार विभागाच्या सचीव पदाची जापसालदारकी आसतली.
लेफ्टनंट जनरल सुब्रमणी हांचो सैन्य दळांतलो प्रवास सुमार 40 वर्सांचो आसा. तांणी भारतीय लष्कराच्या उपमुखेल पदा सयत सेंट्रल कमांडाचे जनरल ऑफिसर कमांडिंग-इन-चीफ म्हणून काम केलां. जम्मू-काश्मीर, आसाम आनी देशाच्या अस्तंत शिमे सारक्या संवेदनशील वाठारांनी तांणी लश्करी कारवायांचें फुडारपण केलां. 8 गढवाल रायफल्सांतल्यान आपली कारकीर्द सुरू केल्ल्या सुब्रमणी हांणी लष्कराच्या स्ट्राइक कोर्चेंय फुडारपण केलां. तांच्या ह्या अतुलनीय सेवे खातीर तांकां परम विशिश्ठ सेवा पदक (पीव्हीएसएम), अति विशिश्ठ सेवा पदक (एव्हीएसएम) अशें जायते लश्करी पुरस्कार फावो जाल्यात.
सुब्रमणी सध्या राष्ट्रीय सुरक्षा परिशद सचिवालयांत लश्करी सल्लागार म्हणून काम करता देखून तांकां रणनिती नियोजनाचो व्हड अणभव आसा. आधुनिकीकरणाच्या काळांत भारतीय सैन्याक चड सक्षम करपाचें काम तांचेर आसतले.
नौदळ मुखेली व्हायस एडमिरल स्वामीनाथन
सीडीएसचे नेमणुके वांगडाच केंद्र सरकारान व्हायस एडमिरल कृष्णा स्वामीनाथन हांची नवे नौदळ मुखेली म्हणून नेमणूक केल्या. सध्या ते मुंबयंत अस्तंत नौदळ कमांडाचे मुखेली म्हणून काम करतात. 31 मे दिसा ते पदभार स्वीकारतले आनी तांचो कार्यकाळ 31 डिसेंबर 2028 मेरेन आसतलो. स्वामीनाथन हांकां ‘कम्युनिकेशन’ आनी ‘इलेक्ट्रॉनिक वॉरफेअर’ तज्ञ मानतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
