भांगरभूंय | प्रतिनिधी
गोंयची ‘डबल’ उदरगत जायत आसा. तेन्ना गोंयकारांनी खऱ्यांनीच ‘भिवपाची गरज’ ना.
गोंयची उदरगत जायत आसा. वाळपय उजो पालोवपी दळाच्या अत्याधुनीक प्रकल्पाचें मुख्यमंत्री डॉ. प्रमोद सावंत हांणी लोकार्पण केलें. आपत्कालीन सेवा जाता तितले बेगीन दिवपा खातीर यत्न करतात म्हूण मुख्यमंत्री सावंत हांणी सुवाळ्यांत सांगलें. मुख्यमंत्री सावंत हांचो कार्यकाळ पळयत जाल्यार तांकां कितलो संघर्श करचो पडलो, हें कळटलें. ‘भिवपाची गरज ना’ अशें म्हणीत ते प्रत्येक आडखळींचेर योग्य उपाय काडीत मुखार वता.
कोरोनाच्या अरिश्टां वेळार मुख्यमंत्री सावंत हांणी एका प्रस्नाक ‘भिवपाची गरज ना’ अशें सहज म्हणलें. त्या वेळार प्रुडन्टान तीच ब्रेकींग केली. उपरांत सगल्याक ‘भिवपाची गरज ना’ म्हूण फामाद जालें. मुख्यमंत्री गोंयकारांक धादोशी करपा खातीर हें वाक्य म्हणून गेले. मात, त्या वाक्याक ते जागले. गोंयच्या उदरगती खातीर सदांच सकारात्मक आशिल्ल्या मुख्यमंत्र्यान सध्या विरोधकांक आडवे घेवपाक सुरवात केल्या. दाबोळी विमानतळाच्या विशया वयल्यान विरोधकांनी सरकाराचो फोग काडपाक सुरवात केल्या. मात, आक्रमक गजालींक थंडपणान मुख्यमंत्र्यांनी जाप दितना दाबोळीचो वापर हो राजकारणा खातीर जाता आनीक काय ना, अशें सांगीत विरोधकांक थोमणो मारलो. विरोधकांक वेवस्थीत जाप दितना तांणी गोंयांतल्या दोनूय विमानतळांचें म्हत्व सांगलें.
दाबोळी विमानतळ नौदळ ताब्यांत घेवपाचे तयारेंत आशिल्ल्यान बेगिनूच तो बंद जातलो. दाबोळी विमानतळा विशीं सरकारान सात दिसां भितर धोरण स्पश्ट करचें, ना जाल्यार आंदोलन करतले म्हूण गोवा फॉरवर्डचे अध्यक्ष विजय सरदेसाय हांणी शिटकावणी दिल्या. दाबोळी विमानतळ हो भुतांचो विमानतळ जातलो. थंय कोण आसचो ना, असो भंय विरोधी पक्ष फुडारी युरी आलेमांव हांणी उलोवन दाखयिल्लो. दाबोळीची चर्चा दिल्लीकूय पाविल्ल्यान खासदार विरियातो फर्नांडीस हांणीय संसदे भायर व्हिडियो काडून दाबोळी विमानतळ बंद जातलो अशें विधान केलें. फाटले दोन-तीन दीस सगल्याक दाबोळी विमानतळा विशींच चर्चा चालू आशिल्ली.
वेंचणूक लागीं पाविल्ल्यान विरोधक अशे उलयतात म्हूण हें उक्तें सत्य मुख्यमंत्र्यांनी उलोवन दाखयलें. पणजे म्हापालिकेची प्रतिश्ठेची वेंचणूक फुडल्या म्हयन्यांत जातली. ते फाटभुंयेर विरोधक एकठांय जावन भाजपा आड झूज दितले. हातूंत दुबावूच ना. भाजपाक गोंयांत वयर काडपी आदले मुख्यमंत्री सर्गेस्त मनोहर पर्रीकार हांचें पूत उत्पलाक तेंकों दिवपाचें विरोधकांनी उलोवन दाखयलां. हाचें वयल्यान पणजेची वेंचणूक खंयच्या पांवड्यार पावपाक शकता, हाचो अदमास करूं येता. पणजेंत प्रभागांची फेररचना जाल्या. राखीव प्रभागांक लागून समिकरणां बदलतात. ह्या बदलिल्ल्या समिकरणाचो लाव कसो मेळटलो, हाचो हिशेब वेंचणुकेक उबे रावपी पक्ष, तांचें कार्यकर्ते, इत्सूक उमेदवार करपाक लागल्यात. तातूंतच सत्तेर आशिल्ल्या भाजपाक फाटीं घालपाक विशय जाय. तेन्ना दाबोळी हो विशय मुखार येता, अशें सूचक विधान आयलां आसत.
विधानसभा वेंचणूक जावपाक खूब वेळ आसा. मात, ते खातीर तयारी आतां सावनूच सुरू जाल्या. जिल्हो पंचायत वेंचणुकेंत विरोधकांची कामगिरी बरी जाल्या. ना म्हणल्यार काँग्रेसीन बरी मतां काडलीं. ह्या वेंचणुकेचो निकाल ते सकारात्मक पद्दतीन घेतात. पूण, जिल्हो पंचायत वेंचणूक आनी विधानसभा वेंचणूक हातूंत फरक आसा. विधानसभेची रंगीत तालीम म्हूण जिल्हो पंचायत वेंचणुकेक पळयतात. मात, आतां शारांनी नगरपालिका वाठारांनीय व्हड प्रमाणांत मतदार आसात. गांवांतले लोक शारांत स्थलांतरीत जाल्यात, जातात. ताका लागून नगरपालिका वाठारांतूय व्हड प्रमाणांत मतदार आसात. पणजी जिखप म्हणल्यार दिल्ली जिखप अशेंच आसा. दिल्लींत राज्य करप्यांक व्हडलो मान मेळटा, तसोच मान आतां पणजेकूय मेळपाक लागला. मडगांवांय तशेंच. पणजी बाबूश मोंसेराताक लागून भाजपा कडेन आसा. ती आपले वटेन हाडपा खातीर काँग्रेस सगले तरेन यत्न करतली. भाजपाक हारोवपाक विरोधकांनी एकठांय येवपाची गरज विरोधी पक्ष फुडारी युरी आलेमांवान उलोवन दाखयलां. मात, वेंचणूक लागीं येता तेन्ना विरोधकांक फांटे फुट्टात. आम आदमी पार्टी आपलेच वाटेन वता. आरजी गोंयकारपण म्हूण आपली वेगळी रणनिती आंखता. तातूंतच जिल्हो पंचायत वेंचणुकेंत काँग्रेसीन आयत्या वेळार घात मारलो म्हूण तांचो दावो आसा. युती खातीर वाट पळयत रावले आनी कळाव जालो, अशी परिस्थिती जाल्ली. काँग्रेसूय उमेदवार पयलींच जाहीर करून वा थारावन काम करिना, निमाणें मेरेन रावता. गोवा फॉरवर्ड पक्ष गोंयकारांच्या तेंक्यार फुडें वतनाच काँग्रेसीचो हातूय धरता.
विरोधक एकठांय आसा अशें चित्र निर्माण जाता, मात ऐन झुजा वेळार एकठांय दिसना. लोकविस्वासाचेर भाजप व्हड जाला खरो, मात तेंगशेर पावप सोंपें आसता. थंय तिगून रावप कठीण. पर्रीकारान भाजपाक तेंगशेर पावयलो. मात, थंय भाजपाक तिगोवन दवरपाचें काम मुख्यमंत्री सावंत हांणी केलें. राज्यांत म्हामार्गांचे काम चालू आसा. लोकांक सध्या त्रास सोंसचें पडटा. मात, कितें जाय जाल्यार पाशियेंस म्हणटात तें काडचेंच पडटा. पणजेंत स्मार्ट सिटीचें काम चालू आसतना पणजेकारांनी तशेंच पणजेंत कामाक येवप्यांनी खूब त्रास काडले. मात, आतां पणजी स्मार्ट जावपाक लागल्या. पणजेंतल्या स्मार्ट कामांचें उक्तावणूय जाता. पणजेंतल्या स्मार्ट लोकांनी पणजी स्मार्ट करपा खातीर तेंकों दिवचो, अशें मुख्यमंत्री सावंत उलोवन गेले. तशेंच उदरगती विशीं पणजेकारांनी भिवपाची गरज ना, अशें तांणी सूचक सांगलें.
गोंयच्या इतिहासांत विकसनशील मुख्यमंत्री म्हूण सावंत हांचें नांव अग्रक्रमान येता. कोवीड अरिश्टां वेळार तांणी घेतिल्ले निर्णय, हाताळिल्ली परिस्थिती, उपरांत सरकार राखूंक तांणी दाखयिल्लें कसब, नोकऱ्यांचे बाबतींत पारदर्शकताय, तरणाट्यांक खाजगी आस्थापनांनी नोकऱ्यांच्यो संदी उपलब्ध करप, शिक्षणीक मळार क्रांती घडोवप अश्या कामांक लागून गोंयची ‘डबल’ उदरगत जायत आसा. तेन्ना गोंयकारांनी खऱ्यांनीच ‘भिवपाची गरज’ ना.
अमर पाटील
7507495151
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
