भांगरभूंय | प्रतिनिधी
दावो सिद्ध करून दाखोवचो: संकल्प आमोणकार
वास्को: मुख्यमंत्री डॉ. प्रमोद सावंत हांणी ‘हर घर जल’ 100 टक्के जाल्ल्याचो दावो पुरायपणान फट आशिल्ल्याचो आरोप करून मुरगांवचे आमदार संकल्प आमोणकार हांणी मुख्यमंत्र्यानी तांचो दावो खराे आशिल्ल्याचें सिद्ध करचें अशें आव्हान दिलां. सड्यार काल (बिरेस्तारा) रोंपे वांटपाचे कार्यावळी उपरांत पत्रकारां कडेन उलयतना ते उलयताले.
मुरगांव मतदारसंघांत हर घर जल ही येवजण पुरायपणान अपेशी थारल्या. गोंयांतल्या चडशा वाठारांनी फक्त नळ आसात, पूण त्या नळांक उदक ना. 100 टक्के हर घर जल हो मुख्यमंत्र्याचो दावो 100 टक्के उक्ताडार शौचमुक्त ह्या दाव्या सारकोच आसा अशें आमोणकारान म्हणलें.
भाजपा फक्त बिनबुडाचे ट्वीट करून लोकांची दिशाभूल करता. फटीचीं आस्वासनां दिवन गोंयकारांक पिश्यांत काडटा. ‘हर घर जल’चे 100 टक्के प्रमाणपत्र मेळोवपी गोंय हें देशांतलें पयलें राज्य आशिल्ल्याचें ट्वीट भाजपान केलां. हो सगल्यांत व्हडलो विनोद आसा. हें ट्वीट पुरायेन फटीचें आसा. गोंय सरकार सगल्या मळार अपेशी थारलां असो दावो आमोणकारान केलो.
मुरगांव मतदारसंघांत उदका पुरवणेचो सगल्यांत व्हड फटको बसला. चड करून सडो, बोगदा, जेटी हांगासरल्या कांय वाठारांनी लोकांक फांतोडेर फक्त एक वरूच उदका पुरवण जाता.
मुरगांवां शेंकड्यांनी लोकांच्या घरांत नळूच ना. तांकां नळ जोडणे खातीर धांवपळ करची पडटा. भौशीक बांदकाम खातें, मुरगांव पालिका बी हांचे कडल्यान हरकत ना दाखलो मागून त्रास दितात अशी म्हायती आमोणकारान दिली.
भाजपान वेंचणुके पयलीं सांगिल्लें की ते फुकट उदकाची पुरवण करतले म्हूण, पूण फाटल्या दारान लोकांक उदकाची सुमारा भायर वाडिल्लीं बिलां मेळ्ळ्यांत, जे लोक तीं भरूंक शकनात अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
