गोंय उपाशीच

भांगरभूंय | प्रतिनिधी

नव्या कुशावती जिल्ह्या खातीर 500 कोटींचें पॅकेज आनी हेर उदरगतीच्या कामां खातीर चार हजार कोटींचो निधी गोंय सरकारान मागिल्लो. पूण अर्थसंकल्पांत गोंय उपाशीच उरलें. मात नाल्ल आनी काजींच्या उत्पादनाक मजत, फार्मा उद्देग वाडोवपाक मजत, उच्च शिक्षणा खातीर बायलांक वसतीघरांत, बोटी बांदपाक उर्बा ताचो फायदो गोंयांक जातलो. नाल्लाचें, काजीचें पीक कितलें जातलें, ताचेर सवलत अवलंबून आसतली. गोंयाक वित्त आयोगा कडल्यान निधी मंजूर जाला. पूण, अर्थसंकल्पा वरवीं कितें तरी मेळपाक जाय आशिल्लें. अर्थवेवस्थेंत व्हडलेशी चडटी, देंवती नाशिल्ल्यान अर्थसंकल्पांत व्हडल्यो घोशणा मात नात. पूण, पोरुंचे तुळेन अर्थसंकल्प वाडून 53.47 लाख कोटी रुपयांचेर पावला.
लश्कराक 1 लाख कोटी चड मेळ्ळ्यात. हें सिंदुराक लागून आसुये. फाटल्या 10 वर्सांतली ही सगल्यांत व्हडली वाड. विमानां आनी लश्करी सामान घेवपाकूय तरतूद केल्या. मात हो म्हाल आधुनिक आसतलो, हाची खबरदारी खरेदीची शिफारस करपी जाणकारांनी घेवची पडटली. कारण,भारता सारके विकसनशील देश हे ‘डंपीग ग्रावंड’ म्हूण वापरपाचो प्रकार पयलीं पासून चलत आयला. देशाक वखदां निर्मितीचें केंद्र करपाचो हावेस अर्थसंकल्पांत उक्तायला. हांगा वैजकी उपचार सवाय. देखून हजारांनी दुयेंती खास येतात. वखदा निर्मिती वाडल्यार वैजकी येणावळीचो झरो चड नेटान व्हांवतलो. कॅन्सराचें प्रमाण वाडटा, हें मतींत घेवन ताचीं 17 वखदां सवाय केल्यांत, हें बरें जालें. मात, हीं वखदां, उपचार थळाव्या हाॅस्पिटलांनीय मेळत जाल्यार दुयेंतींक थाकाय मेळटली. गोडेंमूत, किडनी दुयेंसाचीं वखदांय सवाय जावपाक जाय. डायलेसिस उपचार ल्हान हाॅस्पिटलांनीय मेळ्ळ्यार बरें.
लोकांच्या अपेक्षा कायम वाडिल्ल्यो आसतात. अर्थसंकल्पांत ताचे कडेनूय लक्ष दिवप गरजेचें. सामान्य नोकरदारांक आयकरांत सवलत मेळटली, अशें दिशिल्लें. मात पोरुंचेच सवलतीचेर तांकां समाधान मानचें पडलां. फक्त पगारुच न्हय, तर लोक गुंतवणूक करतात, थंय- थंय आयकराची कापाकापी चालूच आसता. फिक्स्ड डिपाॅझिटाकूय व्हडली कातर लागता. देखून लोक म्युच्युअल फंड, भांगरांत गुंतवणूक करपाक लागल्यात. आयकर रिटर्न (आयटीआर) फायल करपाची मुजत मात वाडयल्या. आतां आयटीआर 3, 4 हे आॅगस्ट सोंप मेरेन भरपाक मेळटलें. रिटर्न रिवायज 31 मार्च मेरेन (तीन म्हयने वाड) करपाक मेळटलें.
इलेक्ट्राॅनिक्स उत्पादनां खातीर नवी येवजण हाडल्या. चीन, तैवानाचेर आमी अवलंबून रावतात, तें उणें जावंये. रोजगार, स्वावलंबनाचे बाबतींत हाचो फायदो जावचो. सध्या रेअर अर्थ मिनरल्सा खातीर पुराय संवसार चीनाचेर अवलंबून आसा. आतां भारतांत ताचे काॅरिडाॅर तयार करपाचें थारलां. हे मिनरल्स बॅटरी, मोबायल फोन, गाडयो, लायटींनी वापरतात. सौर उर्जा ही फुडाराची गरज. ती चडांत चड वापरूंक जाय. ते नदरेनूय तजवीज केल्या. रस्ते, रेल्वे, डिजीटल सेवा, बंदरां हातूंत बुन्यादी सुविधांचेर भर दितले. ताका लागून अप्रत्यक्ष रोजगार वाडूं येता. तरणाटे आनी रोजगार म्हत्वाचो. कुशळटाय विकास, स्टार्ट अप, लघुउद्देग मळाक उर्बा दितले. मात थंय चडांत चड तरणाटे येतले, हे खातीर यत्न जावप गरजेचें. युरोपियन युनियनाचे कबलातीक लागून विदेशी गुंतवणूक वाडटली. ते वरवीं रोजगाराची समस्या सुटावी जावंची. भारतांतल्यान विदेशांत जावपी निर्गतूय वाडूंक जाय. शॅरबाजार गुंतवणुकदारांचे वागणुकेचेर चलता. ती वाडल्यारुच तो थीर रावतलो. देशभरांत काजू, नाल्ल उत्पादनाक उर्बा दिवपाची तरतूद आसा. पूण ते खातीर जमीन जाय. ती तिगोवन, वापरून उत्पादन वाडयल्यार शेतकारांक फायदो जातलोच, वयर सैमूय तरतरतलें! अर्थसंकल्पांत तशें प्रत्यक्ष कांय मेळूंक नासलें तरी केंद्रीय निधी खातीर अजून संकल्प सोडचो आनी यत्न करचे.