बरे दीस येवं

भांगरभूंय | प्रतिनिधी

युरोप- भारताची ही कबलात यशस्वी जाली जाल्यार जागतीक बाजारपेठेक मोडण मेळूंक शकता.

अखेरेक 18 वर्सांचे चर्चे उपरांत भारत आनी 27 देशांच्या युरोपियन युनियना मदीं इतिहासीक मुक्त वेपार कबलात (एफटीए) जाली. युरोपियन कमिशनाची अध्यक्ष उर्सुला वाॅन डेर लेयेन हांणी म्हणलां ते प्रमाण ही खरेंच ‘मदर आॅफ डील.’ युरोप आनी भारत मेळून संवसारीक जीडीपीच्या सुमार 25 टक्के जाता. दोन अब्ज लोकांची बाजारपेठूय तयार जातली. युरोपी देशां वांगडा आमच्यो कबलाती आसल्यो तरी हो एकवटीत करार सगल्यांक फायद्याचो पडटलो. निर्गत वाडटली. थंयच्यान भारतांत येवपी 97 टक्के वस्तूं वयलें शुल्क देंवतलें वा रद्द जातलें. ताका लागून युरोपी कंपनींची 4.75 अब्ज डाॅलर बचत जातली. वेपारी, उद्देजकांक ही भांगराची संद. संवसारांतली दुसरी आनी चवथी सगल्यांत व्हडली अर्थवेवस्था आशिल्ले हे बाजारपेठेक जोडपी हो पूलच म्हणचो पडटलो. 2092 लाख कोटींचे एकवटीत बाजारपेठेक लागून वेपार आनी नवनिर्मणेच्या मळाचेर व्हडली संद आसा. हे कबलातींत एका मूळ गोंयकाराचोय हात आशिल्ल्यान आमचे खातीर ही अभिमानाची गजाल. युरोपियन परिशदेचे अध्यक्ष आंतोनियो लुईस सांतोस दा कोस्ता हांचे बापूय मडगांवचे. कोस्ता हांचे कडेन ओव्हरसीज सिटीझन आॅफ इंडिया कार्डूय आसा.
ही कबलात जावपा फाटल्यान अमेरिकेचे अध्यक्ष डोनाल्ड ट्रम्प हांचीं धोरणां जापसालदार आसात. तांणी टॅरीफ वाडयलां, वाडोवपाच्यो धमक्योय दिल्यात. आतां युरोप, भारत एकवटला. ते वटेन रशिया, चीन, जपान एक जावपाचे वाटेर आसात. हाचो धपको अमेरिकेक बसूं येता. आमचे खातीर ही हुस्क्याची गजाल. कारण थंय हजारांनी गोंयकार आसात. वारकऱ्याक पांडुरंगाचो ध्यास लागचो, तसो अमेरिकेचो जप करपी लाखांनी भारतीय आसात. युरोपी, अमेरिकी दिसाळ्यांचे वेबसायटींचेर हे कबलातीचेर प्रतिक्रिया आयल्यात. ट्रम्प हांकां सडेतोड जाप, ट्रम्पाचे सांवळेंत भारत- युरोपी संघान संबंद बळिश्ट केले, अशें द न्यूयाॅर्क टायम्सान म्हणलां. ट्रम्पाच्या धोरणांक लागून संवसारीक वेवस्था आनी पोरण्या युतींचेर प्रस्नचिन्न निर्माण जावपाक लागलां, अशा वेळार ही कबलात जाल्या. चीन जागो दिसता थंय सवाय वस्तू रकयत आसा आनी अमेरिकेक आतां कोण विश्वास दवरपा सारको अर्थीक भागिदार मानिनात, अशेंय तांणी म्हणलां. युरोप- भारताची ही कबलात यशस्वी जाली जाल्यार जागतीक बाजारपेठेक मोडण मेळूंक शकता.
मुक्त वेपार कबलाती वांगडाच सुरक्षा, संरक्षण भागिदारी, मायग्रेशन करार जाल्यात, लश्करी संबंद वाडीक लागतले, तशेंच कुशळ लोकांक युरोपांत, भारतांत वचपाची संद मेळटली. हे कबलातीक लागून वखदां, आयटी, कपडे, लेदर, शेतकी उत्पादनांची निर्गत वाडटली. भारतीय म्हाल सवाय भितर थंय पावतलो. उत्पादन, निर्गत, आयटी, स्टार्ट अपांनी रोजगार वाडटलो. विदेशी गुंतवणूक वाडटली. कारण युरोपी कंपनी भारतांत येतल्यो.तंत्रज्ञानाच्या मळाचेर फायदो जातलो. भारतांत उत्पादन खर्च उणो आशिल्ल्यान कंपनींक फायदो जातलो. बँकींग, विमो, लाॅजिस्टीक मळाचेर युरोपांतल्यो कंपनी येवंक शकतात. भारतांत स्वदेशीचेर भर दिवप गरजेचें. कारण तातूंत लघुउद्देग, घरगुती उद्देग आसात. तांचेर परिणाम जावं येतात. पूण योग्य नियंत्रण. दवरल्यार फायदो चड, लुकसाण उणें जातलें. युरोपी वस्तू सवाय आनी दर्जेदार आशिल्ल्यान गांवांतल्या लघुउद्देगांक मार बसपाक शकता. देखून आमच्या सरकाराक ह्या उद्देजकांक उर्बा दिवन वयर काडचें पडटलें. आयुर्वेदाक बरे दीस येतले. गिरायकांचेरूय सगलें आसा, कारण आमकां ‘फाॅरेना’ फाटल्यान धांवपाचें पिशें. तें उणें जावंक ना जाल्यार ल्हान धंदेकार, शेतकार, सहकारी संस्था बावतल्यो. देखून आयाती परस निर्गतीचेर भर दिवचो पडटलो.
आमी सर्तींत देवन युरोपा परस दर्जेदार म्हाल तयार केल्यार भिवपाची गरज ना. म्हणटकच हे इतिहासीक कबलातीक येवकार दिवया आनी बरेंच जातलें, असो सकारात्मक विचार मनांत केळोवया.