तकलेचो विकास नाका ?

भांगरभूंय | प्रतिनिधी

पयलींच वाचन संस्कृती म्हणटात ती उणीच जाल्या तातूंत जर चड पोस्टेज दिवचें पडलें जाल्यार पुस्तक घेवपीय फाटीं सरचेनात?

फाटल्या साठ वर्सांत जें जालें ना तें सद्याचें सरकार करता म्हणपाचें सत्ताधारी सांगतात. ते कितें सांगता तें मानून घेवचेंच पडटलें. कोट्यांनी रुपया मोडून चलिल्लो विकास सामको दोळ्यां मुखार तर दिसता. सगलेंच कशें चकाचक जातना पळोवंक मेळटा. पूण हें सगलें पळेतना हाकाच विकास म्हणप काय कितें होय प्रस्न मनांत येताच. ह्या चलिल्ल्या विकासाक लागून कांय काँट्रेक्टरांचीं बोल्सां फुगतात, तांचो विकास जाता पूण सामान्यांचें कितें? ते समाधानी आसात? तांचोय विकास जाता? बेकारांक काम मेळटा? हाचोय विचार जावंक जाय न्ही! सरकारान सगल्यांत पयलीं विकास ह्या उतराची व्याख्या सांगूक जाय म्हणजे विकास म्हणल्यार कितें तें सामान्यांक कळूंक बरें पडटलें. फाटल्या साठ वर्सांत कितें जालें तें नाका. आयआयटी, आयएएम, धरणां, कॉलेजी सगलें विसरुंया. सद्याक कितें चल्लां ताचेरूच नदर मारुंया.
पयर पोस्टांत गेल्लों. एक पुस्तक पोस्ट करपाचें आसलें. आतांचीं पोस्टां पयलींवरी नात. तांचोय विकास जाला. सगल्याक कंप्युटर बसयल्यात. सगलो वेव्हार ऑनलायन जावपाचो. पोस्टांत बशिल्ल्यांक कितेंय विचारल्यार ते रोखडेच कंप्युटराचे बटन दामतात आनी जाप मेळटली हाची वाट पळेत बसतात. बरोच वेळ वाट पळेले उपरांत ते आपल्या लागसरच्या पोस्टाक फोन लायतात आनी आमी विचारिल्ली म्हायती ताचे कडेन आसा जाल्यार पळेतात. ‘हांगा नेट सारकें मेळना रे, तुका नेट आसा जाल्यार मात्शें अमकें पळोवन सांग पळोवया.’ चडशें फावटी अशेंच घडटा. कंप्युटर आसा पूण नेट ना. आमचो विकास हो असो चलता. ह्या कंप्युटराक लागून कितें जालां तर कामगार आळशी जाल्यात अशें म्हाका तरी दिसता. सगलें कंप्युटराचेर रोखडेंच मेळटा मागीर तें तकलेंत कित्याक सांठोवन दवरपाचें? शिकून कित्याक घेवपाचें? सगलेच जाण कंप्युटराचेर पातयेवन रावतात. आनी नेट मेळना जातकूच सगल्यांचोच ‘नेट’ देंवता.
हांव गेल्लों पुस्तक पोस्ट करूंक कितली तिकेट लागतली हें विचारूंक. थंयच्या मनशान पुस्तकाचें वजन केलें आनी तिकेटिची दर तो कंप्युटरार सोदूंक लागलो. नेट चलना आनी ताका जाय आशिल्ली म्हायती मेळना. ताणें दुसऱ्या ऑफिसाक फोन लायलो. तोय कंप्युटराचेर सोदूंक लागलो. पयलीं अशें जाय नासलें. जो कोण कावंटराचेर आसतालो ताका पोस्टाच्यो दरो सामक्यो पाठ आसताल्यो. नव्यान कितेंय बदल जाल्ले आसल्यार तो आपणा कडेन आशिल्लें पत्रक काडून ताचेर पळेतालो. आतां कंप्युटराक लागून कोण दरांच्यो यादीय दवरना आनी कोणा कडेन पत्रकूय आसना. कितें गरज त्या पत्रकाची, सगलें तर कंप्युटरार आयतें मेळटा. पूण नेट ही जेन्ना व्हडली समस्या म्हणून आमकां खबर आसा तेन्ना तकलेंत नासल्यार खंय तरी कागदार बरोवन दवरूंक जाय न्ही? पूण ना.
बरोच वेळ फोनाफोनी करून ताणें दर घेतली आनी म्हाका पन्नास रुपयांची तिकेट दिली. हांवें म्हणलें, आरे बाबा हें प्रिंटेड बूक आनी ताका इतली तिकेट? ताणें परत फोनार विचारून म्हायती घेतली आनी म्हाका कळ्ळें, छापील पुस्तकांक आशिल्ली सवलत आतां पोस्टान काडून उडयल्या. आतां सामान्य दरानूच पुस्तकां धाडपाचीं. फाटल्या साठ वर्सांत हें कोणाकूच कित्याक सुचलें ना काय? काँग्रेस ही सवलत कित्याक म्हूण दिताली काय? पुस्तकांक म्हूण सवलत दिवपाची? कितलें लुकसाण जालां आसतलें पोस्टाक ह्या सवलतीक लागून. आतां कोणूय एखाद्रो पुस्तक मागयतलो तर ताका पोस्टेजचे चड दुडू फारीक करचे पडटले. पयलींच वाचन संस्कृती म्हणटात ती उणीच जाल्या तातूंत जर चड पोस्टेज दिवचें पडलें जाल्यार पुस्तक घेवपीय फाटीं सरचेनात? एके वटेन सरकारूच ‘वाचाल तर वाचाल’ असो घोश लायता. पुस्तकाची दर वाडली जाल्यार मागीर वाचतलो कोण? वाचन तकलेचो विकास करता. हो विकास जर जालो ना जाल्यार बाकीच्या विकासाक अर्थ खंय उरतलो?
भुरग्यांनी शाळेंत येवचें, शिकचें म्हणून सरकार भुरग्यांक पुस्तकां फुकट वांट्टा. तांकां शाळेंत वचचें अशें दिसचें म्हणून तांकां मीड डे मील वा जेवण दिता. हें सगलें कित्याक करतात तर भुरग्यांचो विकास जावचो म्हणुनूच मूं? होच भुरगो जेन्ना वाचूंक शिकतकूच एखादें पुस्तक मागयतलो तेन्ना ताका तें पोस्टेजीक लागून घेवंक मेळ्ळें ना जाल्यार ह्या शाळेंत वचून शिकपाचो फायदो कितें जातलो? सरकारान हाचो विचार करूं नाका? फाटल्या साठ वर्सांत जावंक ना तें करतना नाका आशिल्लेंय करप कितलें योग्य? असलें पावल आमच्या खऱ्या विकासाक मारक थारतलें हाचें भान सरकाराक आसूंक जाय. तकलेचो विकास चड गरजेचो आनी तो पुस्तकांतल्यानूच जावंक शकता हें मतींत दवरूंक जाय. पोस्टाक लुकसाण जाता आसलें तरी पोस्टान तें सोंसून पुस्तकांक प्राधान्य दिवकूंच
जाय.
म्हजो एक इश्ट गोंयांत प्रकाशीत जावपी पुस्तकांची यादी दर दोन म्हयन्यांनी एके पुस्तिकेंत छापून ती सुमार तीन हजार घरांनी पावयता. हांतल्यान तो कांयच जोडिना जालो तरी एक व्हडलें काम तो करता म्हणचें पडटलें. आमकां गोंयांत प्रकाशीत जावपी पुस्तकांची यादी मेळटा. तांची इल्ली म्हायतीय मेळटा. पुस्तक खंय मेळटलें तेंय कळटा. खंयचेंय पुस्तक जाय तर तें घेवंक मेळटा. छापील पुस्तक म्हणून हे पुस्तिकेक एक रुपयाची तिकेट लागताली आतां सामान्य दरेन चार ते पांच रुपया मोडचे पडटले. तीन हजार प्रतींचो विचार करात. परवडटलें हें काम? घरांतलें घोडें धांवडायिल्ल्या वरींच जावंचें ना हें? बऱ्या कामाक सरकारान सदांच तेंको दिवंक जाय. कोण घेवन बसतलो असल्यो उठाठेवी? पोस्टान हाचेर जरूर विचार करचो आनी तकलेचो विकास मतींत घेवन ही सवलत चालू दवरची.

अभयकुमार वेलींगकार
9423884687