भांगरभूंय | प्रतिनिधी
पिडेतांच्या कुटुंबांक भेश्टावन तांकां गरजे भायलो उपचार घेवपाक भाग पाडपी पाड्या वैजांचेरूय खर निर्बंध येवपाची गरज आसा.
बरी भलायकी मेळप आनी जिवनभर भलायकेवंत जियेवप हें सामक्या थोड्या लोकांक भोगूंक मेळटा. कांय जाण जल्मतनाच रोगयाळे आसतात. जायते जाण जाणटेपणांत पिडेस्त जातात. तरणे आसतना बरी भलायकी भोगिल्ल्यो व्यक्ती जाणटेपणांत पिडेस्त कित्याक जातात हाचें गुपीत cellular nutritionत मेळटा.
आमचे प्रौढ कुडींत 53 अब्ज पेशी आसतात. तातूंतले दर एके पेशीक वेवस्थीत खावड, उदक, बी मेळूंक जाय. एक पेशी सुक्षीमदर्शका पोंदा घालून पळयशात जाल्यार तातूंत जायत्यो गजाली दिसतल्यो. हें आमी Inter Scienceक ( आतांची बारावी) आसतना पळयलां. उपरांत ह्या गजालीं कडेन कोण लक्ष दिता? “आसा न्हय, खातां जेवतां बरो, म्हाका कितें जाता?” अशें म्हणप्याक केन्नाय कितेंय जावं येता. कारण, भितरलें माक्न कशें चलता तें आमकां खबर नासता. दोतोराक लेगीत कळना. आनी म्हणुनूच दोतोर वयलेवयर तपासता, स्टॅथोस्कोप कानाक लायता आनी म्हणटा, तूं बरो आसा. आतांचे दोतोर हो घात पत्करिनात. मातशें कितेंय आगळेंउणें दिसल्यार ते रोखडेच रगत, गू- मूत तपास, CT scan कर, MRI कर, बी अशें सुचयतात. खंय तो मूत पळोवनूच परिक्षा करपी पणजेंतलो दो. गोविंद वैद्य आनी खंय हे आमचे फातोर! आयच्या ह्या फातरांक सादें निदान करपाक कळना. म्हणुनूच ते हें तपास, तें तपास म्हणटात. तातूंतल्यान कमिशनूय मेळटा.
भुरगेपणांत थंडी बारखूण जाताली तेन्ना वास्को आमच्या वाड्यारूच रावपी दो. रोल्दांव एंर्रिकीश आमकां तपासतालो. केन्नाय (मातयेंत खेळून) खोरोज बी जाताली तेन्ना म्हजो बापूय फार्मासेवतीक जाल्ल्यान पोमाद, आयोडीन, बी लावन घरच्या घरा पेखयतालो. म्हाका तीन ‘व्हडले’ क्लेश जाल्यात. म्हणजे, थंडे बारखुणे परस व्हड पूण दियाबेत, कांक्र, बी न्हय! ‘जिवाची मुंबई’ करून येतकच म्हयनोभर कामणीन इश्कोलाक वचूंक मेळ्ळें ना. उपरांत मुतखडो. हालींच म्हजें काळीज irregular चलता अशें समजलें.
ताचें अशें जालें. 15 आगोस्ताक प्रधानमंत्र्यान केल्ल्या भाशणाचो आकाशवाणी खातीर पांच वरां लागून अणकार केलो. दुसऱ्या दिसा, 16 तारखेक, कचेरेचे तिसरे माळयेर पावतां पावतां गची आंवळिल्ले भशेन जालें. दोतोरागेर वचून कार्दियोग्राम काडटकच काळीज अनियमीत चलता अशें पयले फावटीं कळ्ळें. एक दीस आनी एक रात ओश्पितालांत उरलों. दोतोरान दिल्ली गुळी घेतली. तीच गुळी एका ज्येश्ठ साहित्यकारान घेतकच ताच्या मुतांतल्यान रगत वतालें ही गजाल आयकल्ली. धा गुळयांची ती strip सोंपतकच बंद करून Nutrilite कम्पनीची Garlic heartcare ही nutraceutical चालू केली. आज हांव कसलेंच वखद (pharmaceutical) घेना. फकत Garlicच्यो दोन गुळयो भरिल्ल्या पोटार. हांव हेंच ‘वखद’ लोकांक सुचयतां कारण तें एक पुरक अन्न. हें वखद न्हय आनी वखद सुचोवपाक हांव दोतोर न्हय…
डॉ. रे स्ट्रँड ह्या अमेरिकी वैजाचें पुस्तक हांवें वाचलां. तुमीय वाच्चें. पुस्तकाचें येदें व्हडलें नांव आसना. ह्या पुस्तकाचें नांव What your doctor doesn’t know about nutritional medicine MAY BE KILLING YOU by Dr Ray D. Strand, MD. ताचीं आनिकूय पुस्तकां आसात. हें पुस्तक मराठींतूय आसा अशें Google दाखयता. ताणें सामके उमेदी, क्रियाशील, घोडो उलोवपी, बी बायलेन जेन्ना इल्ली इल्ली करून बरी ना जावन हांतरूण धरलें आनी जायत्या वैजांचो उपचार करुनूय गूण पडलो ना तेन्ना दोतोरान ताचे फाटलें कारण सोदून काडून हें पुस्तक बरयलें. आनी तें कारण म्हणल्यार तिच्या पेशींचें पोशण वेवस्थीत जायनाशिल्लें. Cellular nutrition दिवन दिवन घोवान तिका पयलीं भशेन केली.
भारतांत कितें घडटा तें आमकां कळना. केन्नाकेन्नाय video, reels, बी पळोवन कळटा. गोंयांत कितें घडटा तें पळोवया. दोतोर- फार्मास, दोतोर- रोगनिदानशास्त्रज्ञ (pathologist) हांचे घनिश्ट वेवसायीक संबंद आसतात. हालीं कांय दोतोरांच्यो कोंसुल्तोरी फार्मासिंतूच एका कोनशाक आसतात. जायते दोतोर अमकें वखद अमकेच फार्मासींत घे म्हणटात, आनी मजा म्हणजे तें तेच फार्मासींत मेळटा; आनीक खंयच न्हय!
गोंयांत फार्मासींची एक माळ आयल्या. तिचो संबंद लोक एका मंत्र्या कडेन जोडटात. ही chain सुरवातीक लोकाक संदेश धाडून, फोन करून आपली जायरात करताली. म्हाकाय एक फोन आयलो. म्हणलें, म्हाका कसल्याच वखदाची गरज ना, आनी पडचीय ना. म्हज्यानूच तुमकां जाय जाल्यार बरे भलायकेचो सल्लो दिवं येता. फोन बंद! अशीं हीं फटींगपणां चल्ल्यांत. ओश्पितालांत कोनशाक फार्मास घालपाचीय प्रथा रूढ जायत चल्ल्या. फार्मासींचे chain भशेन ओश्पितालांची chain वाडत वता.
कांय वर्सां फाटीं रातच्या वेळार लागींचे लावांदारींत कपडे फेर्राक दिवंक वता आसतना रस्ताद सुण्यांचो हल्लो जालो. तातूंतल्या एकान म्हज्या घोंट्याक घांस मारलो. सायकल तशीच दामून लावांदारींत गेलों आनी धनयाक गजाल सांगली. ताचें घर शेजराच. ताणें घरकान्नीक उलो मारलो. बायलांची बुद्द तोखेवपाची. तिणें कळावा विणें हळडी पिठो हाडून दिलो. तो सारोवन लागींच्याच एका इश्टाचे स्कुटरीन बांबोळे गेलों. ही कोवीडा पयलींची खबर. तेन्ना मुळावीं भलायकी केंद्रां 24 वरां उकतीं आसनाशिल्लीं. आतांचें नकळं, कोवीड काळांत आसतालीं. मजा म्हणल्यार, रस्ताद सुणीं भलायकी संचालकाच्या घरा भायर बशिल्लीं आसतालीं.
बांबोळे लेप लावन तांणी इंजेसांवांचो एक तकटो बरोवन दिलो. त्या दिसाचें (पयलें) इंजेसांव कुशीचे खाजगी फार्मासींतल्यान विकतें घेवन तोपून घेतलें. जीव वाटावपी वखदां भौसान विकतीं घेवप? उरिल्लीं पणजे फुकट मेळ्ळीं. हालीं सरकार दियाबेता आडचें insulin फुकट दिता. हाचोच अर्थ, सरकाराक दियाबेत (गोडेंमूत) ही पिडा पसरत आसा हाची जाणविकाय आसा. पूण cellular nutritionची माहिती सरकारी तशेंच खाजगी वैजांक मात्तूय ना! खरें म्हणल्यार, सरकारान हे माहितीचो वखदां परस चड प्रसार करूंक जाय आशिल्लो. पूण वखदांचेर जें कमिशन मेळटा तें माहितीच्या प्रसारांतल्यान मेळना. म्हणटकच, सरकार ही माहिती फुकट कित्याक दितलें?
तरणाट्यां मदीं फोफशे जावपाचें प्रमाण वाडत आसा. हाचें एक कारण म्हणल्यार steroid तोपून कृत्रीम रितीन फुगयिल्लें चिकन खावप. मोटें जावपाचें प्रमाण चल्यां परस चलयां मदीं चड दिसता. हाचीय सरकारान वासपूस करची. हेर पिडा कित्याक वाडटात ताचीय सरकारान चवकशी करची. कितल्या तरांच्यो पिडा गोंयांत आसात, कितल्यो पसरत आसात हांची statistics सरकारान काडची. खाजगी ओश्पितालांतल्या वायट गजालींचेर निर्बंध घालचे. सरकारी ओश्पितालां नियंत्रीत करचीं. दोतोरांच्या वायट कर्तुबांचेर guillotine येवपाची खर गरज आसा. पिडेतांच्या कुटुंबांक भेश्टावन तांकां गरजे भायलो उपचार घेवपाक भाग पाडपी पाड्या वैजांचेरूय खर निर्बंध येवपाची गरज आसा.
ल्हानपणांत आमी म्हणटाले, “दोतोर दोतोर बोल्सांत फातोर.” आज वस्तुस्थिती तश्शी आसा…
दामोदर घाणेकार
8459998914
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
