भांगरभूंय | प्रतिनिधी
तिसरो जिल्हो गोंयच्या राजकारणाक आनीक थिराय दितलो, शिस्त हाडटलो, प्रशासनाक घटाय दितलो जाल्यार दीस- रात वावराक लागचें पडटलें.
गोंयच्या दोनूय जिल्हो पंचायतींचेर नवे अध्यक्ष, उपाध्यक्ष आयल्यात. तिसरो जिल्हो कुशावती चार तालुक्यांतल्या गांवांक आस्पावन नकाशे, कागदपत्रांनी बांदला. एका तेंपार हे तालुके शेतां, रानां, झरे, कुळागरांचे. ल्हान व्हड बदल ह्या तालुक्यांनीय जाल्यात. चार तालुक्यांतले तीन तालुके गोंयच्या अर्थकारणाचो फाटीचो कणो जावन आशिल्ल्या खण वेवसायांत घुस्पल्ले. राज्याचे पयले मुखेलमंत्री भाऊसायब बांदाेडकार ह्या चार तालुक्यांतल्या गांवांची उदरगत करपाची सपनां पळोवपी. बदल जातना, तंत्रगिन्यान आपणायतना सैम राखुया, सैमाची नवी बांदावळ करुया, भूंय सांबाळुया हें तांचें सांगणें. तांच्या आदर्शांतल्यान राज्याचे ग्रामीण अर्थवेवस्थेक नवी दिका दिवपाक आतांचे मुख्यमंत्री डाॅ. प्रमोद सावंत मुखार वतात.
जेन्ना नवे पूल, रस्ते, मुखेल न्हंयांतली येरादारीची कोंयडी, अॅक्सिडेंटय कांय वरां वाडटना दिसतात. अॅक्सिडेंट उणे करपाक तिसरो जिल्हो धिगी जावंक शकता.
सेवेचें विकेंद्रीकरण गोंयच्या फुडाराचीं भांगराळीं सपनां पळोवपी तरणाट्यांक भावता, जाण्ट्यांक उपेगी. तरणाटी पिळगी पयश्यांनी गिरेस्त जाता, बेगीन, बऱ्यो येरादारीच्यो सुविधा मेळिल्ल्यो तांकां मानवतात. स्टारलींक इंटरनेट येतना चार तालुक्यांतल्या कोनशांतले गांव जोडपी कुशावती जिल्ह्याची बांदावळ धिटायेन जाल्या. 2027 त जावपी विधानसभा वेंचणुकेंत 27 – 30 मतदारसंघ मेळोवपाची मोख दवरून सरकारान कुशावती जिल्हो केला आसुये. चार तालुक्यांतल्या लोकांक येरादारी, सेवेची सोंपेपणां कुशावतीतल्यान दिवपाचो हावेस सरकारान उक्तायला. प्रशासन दारां मेरेन पावतना चार तालुक्यांतल्या गांवांतले बेकायदो वेव्हार, वेवसायाचेर अधिकारी नदर दवरतले अशी आस्त आसा.
लोक चळवळीचो उजो चार दिकांनी पेटचे आदीं चळवळीची दिका सरकाराक होलमली हें सत. तिसऱ्या जिल्ह्याची घोशणा आदींची, चालीक लावपाक कळाव लागला. सरकार सादूर जालां, प्रशासन धांवतलें हो रकाद तिसऱ्या जिल्ह्याचे बांदावळींतल्यान मेळ्ळा.
आमची भांगरभूंय राखपाचो सोपूत घेवन 2026 वर्सा गांवची अस्मिताय समजून घेवपाचो येत्न लोकप्रतिनिधिंनी करचो. घर घर चलो अभियानांतल्यान सरकारी, विरोधी पक्षाचे सध्याचे, फुडारांतले लोकप्रतिनिधी दारांनी 2026 वर्सा पावतले. लोकप्रतिनिधी तुमच्या हातांतल्या मोबायलार म्हायती धाडटले, आयकयतले. मेळिल्ली म्हायती वाचात, चूक- अचूक सोदून काडात. कार्यकर्ते, लोकप्रतिनिधींक घरा दारांनी येवकार दितना मन मेकळें करात, प्रस्न विचारात, चुको दाखयात, विचारून सेल्फी घेयात.
धारबांदोडें, सांगें, केपें, काणकोण तालुक्यांतल्या मतदारसंघांतले विधानसभेंत तीन लोकप्रतिनिधी सरकारांत आसात, चवथो 2027 त कित्याक मेळचो न्हय? दोन वर्सां भितर दुदग्राम, अटल बाजार हे प्रकल्प तालुक्यांनी विंगड विंगड खात्याच्या येवजण्यांतल्यान नव्या वेवसायाचें मुळावण घालपी जावपाक जाय. एक कोयर वेवस्थापन प्रकल्प कुशावती जिल्ह्यांत आसा, आनीक एकाची गरज आसा व्हय? उंचेलें शिक्षण, भलायकी सेवा गांवांतल्या लोकां मेरेन पावोवप, कुशळटाय आशिल्ल्या गुणेस्त युवा, अस्तुरेक ल्हान उद्देगांक प्रशिक्षण दिवप, तांचीं घरावीं उत्पादनां व्हड शारां मेरेन पावोवपाची मोख कुशावती प्रशासना मुखार आसची. काँक्रिटाचें रान चड वाडूंक दिनासतना गांवचें दायज सांबाळून गांवांची उदरगत केल्यार पर्यटना वरी वेवसायाक नवी दिका जिल्ह्यांतल्यान मेळटली. तालुक्यांतले अधिकारी, कर्मचारी दक्षीण, उत्तर गोंयांत सरकारी सेवेंत आसतले, तांकां जिल्ह्यांत हाडपाचो अभ्यास जावचो. सेवेंतल्यान निवृत्त जाल्ल्या अधिकाऱ्यांच्यो, कर्मचाऱ्यांच्यो, पयलींच्या लोकप्रतिनिधिंच्यो सुचोवण्यो घेवन जिल्ह्याक अटल आदर्श करपाचें सपन बांदावळ करतल्यांनी पळोवचें. जिल्ह्यांत रवींद्र भवनां आसात, संगीत हेर कलांचे उंचेलें शिक्षण त्या भवनांनी मेळपाक जाय. परंपरीक वेवसायांक नव्याची जोड दिवन तरणाट्यांक तांचें म्हत्व समजावन दिवपाचो वावर प्रशासनान करचो. साबार सरकारी येवजण्यांचो लाव बेगीन मेळ्ळ्यार वेवसाय, उद्देगांक बळगें मेळटलें.
तरणाट्यांक विदेशांत शिक्षण, वेवसाया पासत वच्चें दिसता, विदेशांतले वाडपी थळांतर विदेशांतल्या गोंयकारांक आपले भुंयेंत परत हाडटा. चार तालुक्यांतले थळांतरीत गोंयकार तातूंत आसतले, तांच्या अणभवाचो लाव जिल्ह्याक मेळचो.
व्हड शारांनी राज्यांतल्या गांवांतल्या वाठारांतले मूळ गोंयकार वर्सांचीं वर्सां रावतात. शारांतली, शारा लागसारची गर्दी कमी करपाक नवे जिल्हे, नवी वसणूक आयज गरजेची. कुशावतींतल्यान आरंभ जाला नवो जिल्हो सत्तरी तालुक्यांत कित्याक जावचो न्हय?
उत्तर, दक्षीण जिल्हो कचेऱ्यो जिल्ह्याचीं, शारांचीं मुख्यालयां. नवो कुशावती जिल्हो दक्षीणेंतल्या अस्तंत घांटांतल्या तालुक्यांचे उदरगतीची बुन्याद जावचो.
साळावली धरण तिसऱ्या जिल्ह्यांत आसा. धरणाच्या वाठारांत उदरगत येतना पर्यटकांकच न्हय गोंयकारांकय थंय वचपाक- येवपाक सोंपेंपण मेळचें. पियेवपाचे उदक नाशिल्ल्या गांवां मेरेन पावोवपाचें व्हड काम जिल्हो यंत्रणेक करचें पडटलें. चड उदक आसल्यार उत्तरेंतल्या कांय वाठारांक दिवपा पासत येवजण मुखार व्हरपाचो अभ्यास जावचो.
विधानसभा वेंचणूक लागीं आयिल्ल्यान कुशावती खातीर खासा प्रकल्पांची तजवीज करपाचो वावर आसा. प्रकल्प ल्हान आसचे, देशाकय त्या प्रकल्पांतल्यान जिल्ह्याची व्हडविकाय सांगूंक मेळची. नागरीकरण व्हड प्रमाणांत जालां, तें आडावपा पासत ल्हान जिल्हे, ल्हान नगरां हो एक मार्ग आसा. त्या मार्गा वेल्यान गोंय वतना फक्त जिल्हो, पंचायत प्रतिनिधीच न्हय विधानसभा, संसदेचे लोकप्रतिनिधी वाडटले. तिसरो जिल्हो गोंयच्या राजकारणाक आनीक थिराय दितलो, शिस्त हाडटलो, प्रशासनाक घटाय दितलो जाल्यार दीस- रात वावराक लागचें पडटलें.
गोंयचें राजकारण फातोड्डें, पर्वरी, सांखळी मतदारसंघांनी बदल्लें. मोपा विमानतळ गांवच्या कुळागरांतली पिकावळ, ताजीं खाणां, लोणचें, पापड देशा भायर, विदेशांत पावोवंक शकता. ब्रँडेड उत्पादनां पासत खाणांचें घरावे उद्देग तिसऱ्या जिल्ह्यांतल्यान जावचे. पर्वरी, फातोड्डें, सांखळी मतदारसंघ राजपाटण पणजी, मडगांव, दिवचल, म्हापशें शारांक पर्याय थारले, तेय व्हड जातात. लोकसंख्येचो नियाळ चल्ला, त्या नियाळांतल्यान उत्तर, दक्षीणेंत नवे विधानसभा मतदारसंघ जाय, नाका तें कळटलें. गोंयांत फ्लोटींग लोकसंख्या वाडटा अर्थकारणाक लागून. वावराक लागून आयिल्ले देश, विदेशांतले तरणाटे, जाण्टे परतून वतात? वेसनांनी तांणी गोंयांक पोखरलां? भूंय बळकायल्या? गोंय तांकां फुकट मेळ्ळां? कांय प्रस्नाच्यो जापो सोदून काडपाची गरज उप्रासल्या. सत मुखार आयल्यार उपाय करुंक मेळटात, बेगीन सेवा मेळ्ळ्यार मनीसजीण वाटावतली. तिसरो जिल्हो थळाव्यांक गांवां पसून पयस गेल्ल्यांक संजिवनी जावची.
उदरगतींतल्यान नवे प्रस्न, अरिश्टां वाडल्यांत. येणावळय वाडटा. प्रशासनाच्या विकेंद्रीकरणाची वाट तेन्ना उंचेल्या कुशळटायेच्या नव्या रोजगाराची, राजकारणाची दिका थारची.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
