भांगरभूंय | प्रतिनिधी
एकशें चाळीस कोटींचो देश मगा हो. हातूंत मध्यम वर्गीय चड. हांतल्या दर एकल्याचेर दिसाक पांचूच रुपया कर लायलो जाल्यार कितलो दुडू येतलो पळयात.
कांय वर्सां भितरूच भारत म्हणजेच इंडिया संवसारांतली व्हडली अर्थीक महासत्ता जातली म्हणपाचें सपन सद्याक आमचे राजकर्ते पळयतात. आमकां सहज शक्य आसा तें. आमच्या बँकांक हे उद्देगपती कितलीय तोपी घालूं. आमी कशेच भियेनात. कारण पयशे कशे आनी खंयच्यान हाडप हें आमकां कळ्ळां. ते कशे कोणाक वांटप आनी तातूंल्यान कसो फायदो मेळोवप तेंय आमकां कळ्ळां. विरोधक कितलोय बोवाळ घालूं आमी अर्थीक महासत्ता जातलेच. सद्याक आमी तिसऱ्या नंबराचेर पावल्यात म्हणपाचें आयकूंक मेळटा. अमेरिकेच्या राष्ट्राध्यक्षाक जाय तितलो थयथयाट करूं. आमी ताका कसलीच भीक घालचे नात. फुडल्या कांय वर्सां भितर आमी दोन आनी उपरांत एका नंबराचेर पावतलेच. मातूय दुबाव दवरपाची गरज ना.
एकशें चाळीस कोटींचो देश मगा हो. हातूंत मध्यम वर्गीय चड. हांतल्या दर एकल्याचेर दिसाक पांचूच रुपया कर लायलो जाल्यार कितलो दुडू येतलो पळयात. एकशें चाळीस कोटींतल्या चाळीस कोटी लोकांनीच हो कर भरल्यार वर्साक सुमार त्र्यात्तर हजार कोटी रुपया जमा जातले. मध्यम वर्गीय लोकांचेर असलें चेपण घालप बरें. सद्याय म्हणून कितलेशेच कर ते भरतात. जेवणा खाणाचेर, दर एके विकते घेतिल्ल्या वस्तूचेर आनी मातूय बोवाळ करिनासतना ते मोन्यांनी भरतात. इतलेंय आसून तांकां आयकरांत कसलीच सवलत मेळना. वेल्यान पयलीं मेळटाल्यो त्योय सवलती काडून उडयतात. धंदेवाल्याक गाडी घेतली वा हेर गजालींचेर डिप्रेसियेशन दाखोवंक मेळटा, आमकां तसली कितें सवलत मेळटा? ना. मागीर कित्याक महासत्तेचें सपन साकार जावचें ना सांगात.
सद्याक स्ट्रीट लायटीचें वजें आमच्या माथ्यार घालांच. आतां भौशीक जाग्यांचेर जो झगझग घालतले ताचेंय बील आमच्या माथ्यार थापपाचें सर्कुलर वीज खात्यान काडलां. कोणूय एक दोन दीस बोवाळ करतलो आनी उपरांत तोंड धांपून हें माथ्यार थापिल्लें बील भरतलो. तातूंत आतां दिसाक वापरतात ताची एक दर आनी रातची वापरतात त्या विजेचो वेगळो वाडयिल्लो दर येवपाचो आसा. वाडयात तुमी कितलींय बिलां, मध्यम वर्गीय आसात तयार तीं भरूंक. अर्थीक सत्तेचें सपन साकार करूंक जाय न्ही आमकां. म्हणटकूच हें वजें आमीच माथ्यार घेवंक नाका?
सद्याक तर भौशीक जाग्यांचेर हागपाक -मुतपाक लेगीत पयशे दिवचे पडटात. पयरचीच खबर एर्नाकुलम वचूंक म्हूण रेल्वे स्टेशनार गेलों. ट्रेन चारांक दोन नंबर प्लेटफॉर्मा वेल्यान सुटपाची. स्टेशनार पावतकूच कळ्ळें ट्रेन उसरां येवपाची. उसरां उसरां म्हणटा म्हणसर स वरां जालीं. दोन वरां उशीर. आतां इतलो वेळ उशीर जालो जाल्यार ट्रेनींत वचप्यांची रेल्वेन कितें तरी सोय करूंक नाका आसली? एक च्या तरी दिवपाची. बरें इतलो वेळ कोणाच्यान रावंक जाता? सैमाचो उलो येतलोच न्ही? तातूंत जाणटे वा दुयेंती बी आसले जाल्यार तांकां परत परत मुतूंक वच्चें पडटा. आतां मडगांवचो प्लॅटफॉर्म सामको चकाचक जाला. आनी थंयचे टॉयलेट बी पे टॉयलेट जाल्या. मुतूंक पांच रुपया, संडासाक वचपाक वीस रुपया फारीक करचे पडटात. हरशीं जाल्यार बरें आशिल्लें, पूण ट्रेन उसरां येता तेन्ना रेल्वेन लोकांक ही सेवा फुकट दिवंक नाका आसली?
विमानाक उशीर जाल्यार पॅसेंजराचो कितलो आनी कसो थातोमातो करतात. आनी हांगा हागूंक आनी मुतूंक लेगीत पयशे दिवचे पडटात. विमानांत वतात ते व्हिआयपी आनी रेल्वेंतल्यान भोंवतात ते सामान्य लोक. खरें म्हणल्यार ट्रेनीक उशीर जावप हातूंत ह्या सामान्य पॅसेंजरांची कांयच चूक आसना. अशे वेळार पॅसेंजरांची रेल्वेन सोय करूंक जाय पूण रेल्वे कितें करता तर ताचेरूय जोड करता. केन्ना केन्नाय म्हाका दिसता ट्रेनीक मुद्दम उशीर करतात आसूंक जाय. रेल्वेक उशीर जाता तेन्ना लोकांक घरा वचूंक उशीर जाता. कांय जाणांक भायले भायर कामाक वच्चें पडटा. हाचो परिणाम रेल्वेंतलें जेवण – च्या खपूंक मजत जाता. आनी स्टेशनार जे लोक आसतात तांकां झक मारीत कँटीन वा प्लेटफॉर्मा वयल्या गाड्यांचेर कितेंय घेवचें पडटा. रेल्वेक दोनूय कडल्यान उत्पन्न मेळटा. स्टेशन आनी रेल्वेंत केटरींग करप्यांची सोय करूंक रेल्वेक उशीर करिनात मूं? म्हाका हो प्रश्न सदांच पडटा.
ट्रेनींक जावपी गर्दी पळयल्यार आमच्या देशांतले लोक कितले भोंवतात तें कळटा. कित्याकूय भोवूं मागीर ते – काम धंद्याक वा पर्यटनाक पूण वर्सूयभर ट्रेनी भरिल्ल्योच आसतात. लोकां कडेन दुडू आसात आनी ते दुडू मोडटात. आनी हें चित्र पळयतकूच देश खऱ्यांनीच अर्थीक महासत्ते वटेन पावलां मारता म्हणपाचें दिसता. हांगा फक्त ट्रेनींतल्यान वचपाचोच खर्च ना जाल्यार जंय वता थंय रावपाचो आनी जेवणा खाणाचोय खर्च आसा. लोक दुडू मोडटा हाचोच अर्थ देशांत सुबत्ता आसा. पूण हें चित्र जर खरें जाल्यार दर वर्सा हजारांनी शेतकार आत्महत्या कित्याक करतात? कांदे शंबरांचेर पावले, बटाटान पन्नाशी गांठली आनी टमाट तांबडें जावन पळयता म्हणून बोवाळ कित्याक जाता? फेरीबोटींत दुचाकींक तिकेट लायली वा चारचाकीची तिकेट वाडयली जाल्यार लोक सरकाराक कित्याक खेपतात? दरवाड फाटीं कित्याक घेवची पडटा? खंयचें चित्र खरें?
जर आमचो देश अर्थीक महासत्ता जातलो जाल्यार देशांतले लोक पयलीं गिरेस्त जावचे पडले. जेन्ना लोकांची तांक लाखांनी मोडपाची जातली तेन्नाच अर्थीक महासत्तेचें सपन आमी पळोवंक पावतले. पूण जेन्ना लोकांक सरकारूच मेळत तशे लुबाडूंक पळयता, दर एक गजाल मध्यम वर्गियांच्या माथ्यार थापता तेन्ना हे मध्यम वर्गीय गिरेस्त कशे जावंक पावतले? आनी मध्यम वर्गीय वयल्या पांवड्यार पावलो ना जाल्यार अर्थीक महासत्तेचें सपन साकार जातलें?
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
