ओंकार परतून गोंयांत

भांगरभूंय | प्रतिनिधी

पाळिल्ले, मवाळ वृत्तीचे हती पसून आक्रमक जाल्ल्याचीं उदाहरणां आसात. तेन्ना ह्या ओंकार …..

गोंयांत वाग पर्यटक म्हूण येतात, अशें एका राजकी फुडाऱ्यान म्हणिल्ले. ओंकार हती त्या दाव्याक बळगें दिता. कारण तो पर्यटक कसो दक्षीण सिंधुदुर्ग, पेडणें तालुक्यांत फाटले कांय म्हयने हेडत आसा. ताचो मूळ कळप चंदगड वाठारांतल्या अटंग्या रानांत रावता खंय. ओंकाराक तांणी भायर काडला काय तांची चुकामूक जाल्या हें कळना. ताका धरपाक कर्नाटकांतल्यान जाणकारांचो पंगड येवपाचो आशिल्लो. थोड्यांच्या मतान, तो जुंवानपणांत पावल दवरतना आक्रमक जावंक शकता. म्हणून ताका ताच्या कळपांत सोडपाक वेळ काडून उपकारचें ना.
63 दिसां उपरांत ओंकार पयर पत्रादेवी पावलो. काल तोरश्यां हरिजनवाड्यार. शेतां, बागायती, पोरसांचें ताणें लुकसाण केलें. हतीचो व्हडलो देह पळयल्यार ताका खावपाक खूब जाय. तातूंत रानांत ताका भात, भाजी, केळमे, कवाथे मेळनात. मागीर ते लोकवस्तींत घुसलेच जाल्यार दरवर्सा थंय येतात. म्हणटकच तांच्या पोटाची वेवस्था रानांतूच जावंक जाय. ते खातीर कर्नाटकान फुडाकार घेवचो पडटलो. कारण द. कोंकण, गोंया खातीर तो पर्यटक हती. कुळागरांत गेलो जाल्यार तो एक केळमो खातना आशीकुशीचे चार- पांच तरी मोडटले. ऊसाचेंय लुकसाण जातलें. भाजीपालोय तो मस्तितलो. ओंकार अजून आक्रमक जावंक ना, जाल्यार पुराय पोरसूं, शेत ना करपाक शकता. तातूंतल्यान मागीर घरां, गाडयो, दुकानांय सुटपाक शकनात…. आनी हिंसक जावन लोकांचेरूच हल्लो केलो जाल्यार? मोनजातीचें कांय सांगपाक येना. कितेंय घडपाक शकता. ताका ‘वनतारां’त व्हरपाचो निर्णय जाहीर जाल्लो. पूण कृती जावंक ना. तातूंत कोंकणांतल्या गांवकारांक ताचो लळो लागला. ते ताची अपुरबाय करतात. मोबायलाचेर व्हिडियो येतात. कांय जाणांनी तर ओंकाराचेर व्हिडियो माळोय सुरू केल्यात. हें प्रकरण महाराष्ट्र सरकार कशें हाताळटा, तें पळोवपाचें. पूण सध्या ओंकार गोंयांत आशिल्ल्यान गोंय सरकाराचेरूय ताचें पुनर्वसन करपाची जापसालदारकी आसा.
तोरशेंच्या हरिजनवाड्या वयले 16 विद्यार्थी ओंकाराक भियेवन शाळेंत वचूंक नात. लोक आतां शेतां, पोरसांनीय वचप सोडटले. हतयाच्या भिरांतेक लागून समाजजीण ठप्प जावप समा न्हय. ओंकार नेमको खंय वता, तें पळोवपाक काल रानां अधिकारी हाजीर आशिल्ले. पूण, फक्त नदर दवरून कितें जातलें? तो फाल्यां कुळागरांत भितर सरून नासधूस करपाक लागलो जाल्यार ताका आडावपाक जमतलें? आफ्रिकेंत रानवटी हतयाक 3- 4 वरां बेशुद्ध करून ताचेर वैजकी उपचार करतात वा ताका दुसऱ्या रानांत सोडटात, ते तरेचे यत्न जावंक शकतात? मनशाची ताका संवकळ जाल्या. तो दोन हात अंतरा वयल्या रानां अधिकाऱ्याक कांय करिना, ताचे वयल्यान हें जाणवता. तो कोंकणांत वाड्यावाड्यार घरां मदल्यान भोंवला. म्हणटकच तो लोकांक, खास करून शेतकारांक धोक्याचो. कारण कोणाकूच भियेनासतना तो खंयूय वचून पीक खावंक शकता. तो माणसाळ्ळा काय आशिकुशीच्या लोकांक आबूज जायनासतना सोंसपाक शकता, तेंय पळोवंक जाय. देखून ताका धरपाची कारवाय बेगीन जावंक जाय.
कांय जाण म्हणटात, ओंकार मुळचो दोडामार्ग तालुक्यांत जल्मल्लो. देखून ताे ह्याच वाठारांत भोंवता. पूण, ताचे भुकेक लागून शिमे वयल्या गांवांतल्या पिकांचें लुकसाण जावंक लागलां. व्हिडियो काडपी तरणाटे सोडल्यार हेरांच्या मतान तो उपद्रवी प्राणी. देखून ताका प्रशिक्षीत कुमकी हती हाडून धरुंक जाय. हती हुशार, संवेदनशील आसलो तरी ताकाय भावना आसतात. तो केन्ना तिडकत तें कोणूच सांगू शकनात. पाळिल्ले, मवाळ वृत्तीचे हती पसून आक्रमक जाल्ल्याचीं उदाहरणां आसात. तेन्ना ह्या ओंकार बाप्पाक शक्य तितले बेगीन ताच्या कळपांत सोडप, होच एक उपाय. तीन- साडेतीन म्हयने चालू आशिल्ल्या ह्या हतीनाट्याचेर आतां पड्डो उडयल्यार बरो.